ဗြဝတဳ၊ အဝ်ဂါတ် (၄)
ဗြဲရိုပ်ဂူတုဲ ဟိုတ်နူဍာ်ၜဳဇၞော်ကၠုၚ်ဂှ်ရ ပ္ဍဲကဵုတွဵုရးကရေၚ် ပွိုၚ်ဍုၚ် (၆) ပွိုၚ်ဍုၚ် ပ္ဍဲကွာန် ကေုာံ အရာပ်သဝ်ဝ်လ္ၚဵုတံဂှ် ဍာ်ဇၞော်က္တဵုဒှ်ဒၟံၚ်တုဲ ဒးဆုဲပြံၚ်လဝ် ညးဍုၚ်ကွာန်ဒးဘဲဍာ်တံ ကာမံက်တိုန်ရောၚ်ဂှ် ဂွံတီကေတ် ဇရေၚ်ညးဒေသတံရ။
ပ္ဍဲတွဵုရးကရေၚ် ပွိုၚ်ဍုၚ်ဗြဝတဳဂှ် စနူဂိတုအဝ်ဂါတ် (၃) တေံတုဲ ဟိုတ်နူဍာ်ၜဳ(သောၚ်ရၚ်း) ဍာ်ဇၞော်ကၠုၚ်ဂှ်ရ ပ္ဍဲကဵုအရာပ်သဝ်ဝ် မၞုံလ္တူဍုၚ်တံဂှ် ဍာ်ဇၞော်က္တဵုဒှ်ဒၟံၚ်တုဲ လ္ပာ်ဍုၚ်တၟိယှိုဲကုက္ကိုဝ်၊ ကွာန်မေဝ်ပလေအ်ဂှ်လေဝ် ဍာ်ကလိုပ်က္တဵုဒှ်ဒၟံၚ်ရောၚ် ညးဒေသတံ သ္ဂးအိုတ်ရ။
စနူဂိတုအဝ်ဂါတ် (၃) တေံတုဲ ပ္ဍဲကဵုပွိုၚ်ဍုၚ်ဘာအၚ်ကဵု ပွိုၚ်ဍုၚ်လိုၚ်ဗၠဲ ဒၟါနူဍာ်ၜဳသၚ်လောန်ဇၞော်ကၠုၚ်ဒၟံၚ်ဂှ်တုဲ အရာပ်လ္တူဍုၚ်ဘာအၚ် သ္ကုတ်သဝ်ဝ်တံကဵု ပ္ဍဲကဵုကွာန်ကြပ်ကဵုၜဳတံဂှ် ဍာ်ဇၞော်က္တဵုဒှ်လဝ်ရ။
သ္အာၚ်နူဂှ်ပၠန် ပ္ဍဲပွိုၚ်ဍုၚ်ကအ်ကြိက် လ္တူဍုၚ်ကအ်ကြိက် အရာပ်သဝ်ဝ်လ္ၚဵုတံဂှ်ကဵု ပ္ဍဲကဵုအရာပ်တိသဝ်ဝ် မၞုံဍုၚ်ကြုၚ်ဒဵုတံဂှ် ဟိုတ်နူဍာ်ၜဳ(ဟောၚ်သရော) ကဵု ဍာ်ၜဳဂြာၚ်တံ ဇၞော်တုဲ ဍာ်ဇၞော်က္တဵုဒှ်ဒၟံၚ်ရ။
ပ္ဍဲကဵုဍုၚ်လှာဒကှ်ကဵု ဍုၚ်ဘာပန်တံဂှ်လေဝ် ဟိုတ်နူဗြဲရိုပ်ဂူဒၟံၚ် ဗွဲမသ္ကာတ်မြဟ်တံဂှ်ရ ဍာ်ဇၞော်က္တဵုဒှ်ဒၟံၚ်ရောၚ်ဂှ်လေဝ် ဂွံတီကေတ် ဇရေၚ်ညးဒေသတံရ။
ဟိုတ်နူဍာ်ဇၞော်တုဲ ညးဍုၚ်ကွာန်ဒေသ ဒးဒၟံၚ်ဘဲဍာ်တံဂှ် ညးမရေၚ်တၠုၚ်ရီုဗၚ်ဟံၚ်ပြာ်ကဵုဂမၠိုၚ် ပါလုပ်သီုကဵုဂကောံသိုဟ်ပၠိုတ်ပၟတ်တံဂှ် ဒးဆုဲပြံၚ်လဝ် ဒၞါဲဗၠးဘဲဍာ်တံဂှ်ကဵု ဗ္ဒိုပ်ဟံၚ်ပြာ်တံဂှ်တုဲ စရၚ်လၟိဟ်မၞိဟ်ဒးဘဲဍာ် မစိုပ်ဒၟံၚ်ပ္ဍဲဗ္ဒိုပ်ဟံၚ်ပြာ် မၞုံအပ္ဍဲတွဵုရးကရေၚ်တံဂှ် ပြဟ်ဟ်ဏံ ဟွံဂွံတီကေတ်ဏီရ။
အတိုၚ်တၚ်လလောၚ်တြး ဌာနဗြဲကျာ ဂိတုအဝ်ဂါတ် (၄) ဂှ်မ္ဂး ပ္ဍဲကဵုတွဵုရးကရေၚ်ဂှ် ဍာ်ၜဳသၚ်လောန်ဝွံ အပ္ဍဲပွိုၚ်မွဲတ္ၚဲဂတဏံ ထပ်တိုန်ကၠုၚ်ဘာ်ပေမာန်တုဲ ဍာ်ၜဳ(သောၚ်ရၚ်း) ဂှ်တှ်ေ အပ္ဍဲပွိုၚ်မွဲတ္ၚဲဂတဏံဂှ် ကလေၚ်စှ်ေအာ ဗ္ဒါဲဘာ်ပေမာန်ရောၚ်ဂှ် ဟီုဂးလဝ်ရ။
ဟိုတ်ဂှ်ရ နကဵုညးမမံၚ်တန်တဴဒၟံၚ် လ္ပာ်တိသဝ်ဝ် ကြပ်ကဵုသြၚ်ၜဳ မၞုံအပ္ဍဲပွိုၚ်ဍုၚ်ဗြဝတဳတံကဵု ပွိုၚ်ဍုၚ်ဘာအၚ်တံ သွက်ဂွံစွံသတိ ဗွဲတၟေၚ်အိုတ်ဂှ် ဌာနဗြဲကျာ ကဵုလဝ်ကသပ်ရ။
ပရိုၚ်−သြၚ်လောန်တိုၚ်(မ်)
ဗီု−CJ
sanlontai