ကံၚ်ဇြဳပၞာန်ဂြာတ်ထောံဖျေံဗုမ် ဗတိုက်ကဵုက္ၜၚ်ကျာ ပ္ဍဲဒေသမလိယာန် KIA

မလိယာန်၊ အဝ်ဂေတ်(၆)

တွဵုရးကချေၚ် ပွိုၚ်ဍုၚ်ဝိုၚ်မဝ် ဗ္ဒာဲကွာန်မလိယာန် မၞုံဂၠံၚ်ဇၞော်မျေတ်ဂျဳနာ-ဗာန်မဝ်ဂှ် ကံၚ်ဇြဳပၞာန် ဂြာတ်ထောံဖျေံဗုမ် ဗတိုက်လဝ်ကဵုက္ၜၚ်ကျာ ၜါဖ္ဍိုက်ရဂှ် ညးတာလျိုၚ်လလောၚ်ပရိုၚ် ဂကောံဗၠးၜးကချေၚ် (KIO) သ္ကိုပ်ဗိုလ်ဇၞော် နဝ်ဘူ ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။

ဂိတုအဝ်ဂေတ် စၟတ်တ္ၚဲ (၄)တုဲကၠုၚ်တေံ အခိၚ်ၜိုတ် (၁၁) နာဍဳဂှ် က္ၜၚ်ကျာဂျေတ်ဒပ်ကံၚ်ဇြဳပၞာန် တိုန်ကၠုၚ်နူသၞေဟ်က္ၜၚ်ကျာ တတာဥူ အၚ်ဝဂှ် ဂြာတ်ထောံဖျေံဗုမ် ဗတိုက်လဝ် ဗ္ဒာဲကွာန်မလိယာန် ဒၞာဲဗဒိုပ်မုက်ပၞာန် ဒပ်ပၞာန်ဗၠးၜးကောန်ဂကူကချေၚ် (KIA) မနွံဒၟံၚ်ဂှ်ရ။

ဟိုတ်နူကံၚ်ဇြဳပၞာန် ဗတိုက်ပန်လဝ်ကဵုက္ၜၚ်ကျာတုဲ ၜိုန်ရကောန်ဒပ် KIO ဒးလဝ်ဘဲဝပ်ဟၟဲကီုလေဝ် ဇုက်ပၟတ် ကေုာံတိုၚ်တာဝါ ဓာတ်လလဳဇြဟတ်ဍာ် မလိယာန် တောဲဗစိုပ်လဝ် လ္ပာ်မျေတ်ဂျဳနာ – ဝိုၚ်မဝ် ဇီုကပိုက်ဒးလဝ် နွံဒၟံၚ်ရဂှ် သ္ကိုပ်ဗိုလ်ဇၞော် နဝ်ဘူဟီုလဝ်ရ။

ပ္ဍဲဂိတုဂျူလာၚ် စၟတ်တ္ၚဲ (၂၁) ကဵုစၟတ်တ္ၚဲ (၂၇) တုဲကၠုၚ်တေံ အခိၚ်ဗ္တံဂှ်လေဝ် ပ္ဍဲကွာန်မၞုံဗ္ဒာဲနာန်သာန်ယာန်ဂှ် ကံၚ်ဇြဳပၞာန် ဂြာတ်ထောံဖျေံဗုမ် ကဵုက္ၜၚ်ကျာဂှ် ဟိုတ်နူဒတုံစှ်ေ ပါ်ခတိုဟ်လဝ် ဗ္ဒာဲရုၚ်အုပ်ဓုပ် ကေုာံ ဘာကျာ်ကာတ်တလေတ်ဂှ်ရ စမြိုၚ်တအ် ဒးလီုလာ်လဝ်တုဲ ဂၠဴပန် ဒးချိုတ်လဝ်ရ။

လၟုဟ်ဏံလေဝ် မွဲဒမြိပ် ဂၠံၚ်ကွဳစက် မျေတ်ဂျဳနာ – ဗာန်မဝ်ဂှ် ဟိုတ်နူကရောၚ်ပၞာန် ဒပ်ကံၚ်ဇြဳပၞာန် နွံဒၟံၚ်တုဲ ပရေၚ်ပၞာန်ၜါလ္ပာ် ကြံၚ်မ္ၚိုဟ်ဒၟံၚ်တုဲ လ္ပာ်ဒပ်ပၞာန် ချဳဒရာၚ်တိုန်ဗက် ပေါဲဗတိုက်ဆက်ဒှ်မာန်ရဂှ် သ္ကိုပ်ဗိုလ်ဇၞော် နဝ်ဘူ ဟီုထ္ၜးလဝ်ရ။

မွဲဒမြိပ်ဂၠံၚ်ကွဳစက် မျေတ်ဂျဳနာ-ဗာန်မဝ်ဂှ် ဟိုတ်နူဒပ်ပၞာန်ၜါလ္ပာ် ကၟာတ်လဝ်ဖိုဟ်ဏီဂှ်ရ ညးဍုၚ်ကွာန်အာတရဴတအ် ၜိုတ်သၟဟ်အစောံ ညံၚ်ဂွံပါဲဓလေတ်ကဵုဂှ် ရုၚ်အုပ်ဓုပ် ခရိုၚ်လိုၚ်ဇြာ လလောၚ်တြးကဵုလဝ်သမ္တီ နူဂိတုဂျူလာၚ် စၟတ်တ္ၚဲ (၄)တုဲကၠုၚ်တေံရ။

နူဂိတုဂျူလာၚ်မံက် တုဲကၠုၚ်တေံ မွဲဒမြိပ်ဂၠံၚ်ဇၞော် မျေတ်ဂျဳနာ – ဗာန်မဝ်ဂှ် အကြာကံၚ်ဇြဳပၞာန် ကဵု KIA တအ် ပရေၚ်ပၞာန်ၜါလ္ပာ် စကြံၚ်မ္ၚိုဟ်က္တဵုဒှ်ကၠုၚ်တုဲ ဒပ်ကံၚ်ဇြဳပၞာန် ထ္ပက်လုပ်ကၠုၚ်ကရောၚ်ပၞာန် လ္ပာ်ကွာန်နာန်သာန်ယာန် ဗ္ဒာဲဍုၚ်လိုၚ်ဇြာ ဒၞာဲဌာန်ဂအုပ် KIA မနွံဒၟံၚ်ဂှ်ရ။

သ္ပတံနူအခိၚ်ဂှ်တုဲ ပ္ဍဲသ္ကုတ်လကြဴဂိတုဂျူလာၚ်ဂှ် ဒပ်ကံၚ်ဇြဳပၞာန် ချဳဒရာၚ်ကၠုၚ်ကရောၚ်ပၞာန် ဒၞာဲပိဒၞာဲ မၞုံပ္ဍဲဂၠံၚ်ကွဳစက် မျေတ်ဂျဳနာ-ဗာန်မဝ်ဂှ်ကဵု ဒပ်ပံၚ်ကောံ ဒပ်ပၞာန်ဗၠးၜးကောန်ဂကူကချေၚ် (KIA)တအ် ပေါဲဗတိုက် ပ္ဍဲဗလးမုက်တိ ဒှ်လဝ် ဟွံအောန်နူ ပိဝါဏီရ။

ပရိုၚ် – သြၚ်လောန်တိုၚ်(မ်)

ဗီုရုပ် – The Kachin Net