လဂုၚ်၊ အဝ်ဂေတ်(၆)
ညံၚ်ၚုဟ်မးသ္ၚုပ္ဍဲဍုၚ် ဂွံညိၚ်ဝတ်ဂှ် သ္ပတံနူ ဂိတုအဝ်ဂေတ် စၟတ်တ္ၚဲ (၇) ကၠုၚ်စိုပ်ဂတဏံတုဲ သွံတြးကဵုအာ သ္ၚုအရန် ရိုက်မသုန်လက်ရောၚ်ဂှ် ဂကောံသြောံသ္ၚုကၟိန်ဍုၚ်ဗၟာ လလောၚ်တြးလဝ် ပ္ဍဲဂိတုအဝ်ဂေတ် စၟတ်တ္ၚဲ (၅)ရ။
သ္ၚုအရန်တအ်ဂှ် စသွံတြးအာ ပ္ဍဲဒေၚ်သြောံသ္ၚု မၞုံဂၠံၚ်ဝါတာန် ဍုၚ်လဂုၚ်ကဵု ဒေၚ်သြောံသ္ၚု ဖယျေန်နံၚ်ရောၚ်ဂှ် ဓမံက်လဝ် ပ္ဍဲတၚ်လလောၚ်တြးရ။
ပ္ဍဲအရာသွံကဵုသ္ၚုဏံ သ္ၚုမောဝ်ယှိုဲဘိုဝ် မွဲရိုက်မ္ဂး ၁၂၀,၀၀၀ ဒ္ကေဝ်၊ သ္ၚုမောဝ် ဨရာဝတဳမွဲရိုက်မ္ဂး ၉၇,၀၀၀ ဒ္ကေဝ်၊ အေအ်မထ လုပ်ဂကောံသ္ၚုပရံၚ် မွဲရိုက်မ္ဂး ၆၅,၀၀၀ ဒ္ကေဝ် သွံတြးအာရောၚ်ဂှ် လလောၚ်တြးလဝ်ရ။
နညးမိက်ဂွံရာန်ကေတ်သ္ၚုတအ် မွဲတၠမ္ဂး သွက်မွဲဂိတု သ္ၚုပဝ်(ပေါ်ဆန်း) မွဲရိုက်ကေုာံ အေအ်မထမွဲရိုက် ထ္ၜးတၞးကာဒ်ကောန်ဍုၚ် ရာန်ကေတ်မာန်တုဲ ကုမ္ပဏဳ၊ ရုၚ်စက်၊ ညးယိုက်ဝန်ရုၚ်ကမၠောန် သ္အာၚ်နူဂှ် ညးယိုက်ဝန်ဌာနမဆေၚ်စပ်တအ် မွဲကရောံကဵု လိက်ထံၚ်ဂလာန် နူဌာနမဆေၚ်စပ်တအ် ပလံၚ်ဗစိုပ်အဳမေလ်တုဲ ရာန်ကေတ်မာန်ရဂှ် ဟီုသ္ဂးလဝ်ရ။
ဂကောံသြောံသ္ၚုကၟိန်ဍုၚ်ဗၟာဂှ် သြောံအရန် သွံတြးကဵု ၚုဟ်မးဒးဒးရောၚ်ဟီုဂှ် ယဝ်ဒးပ္တဝ်ကဵု ၚုဟ်မးဗွဝ်ဖျာ ပ္ဍဲဍုၚ်မ္ဂး ခြာဒၟံၚ် မွဲရိုက်မ္ဂး နူ ၅၀၀၀ ဒ္ကေဝ် စဵုကဵု ၁၅၀၀၀ ဒ္ကေဝ်ဓဝ်ဟေၚ်ရ။
ညးဆိုက်ဗ္ဒက် ပ္ဍဲကမၠောန်သြောံသ္ၚုတအ်ဂှ်မ္ဂး ပရေၚ်သွံပ္တိတ် သ္ၚုအရန်ဂှ် ၚုဟ်မးသ္ၚု ဒှ်ဒၟံၚ်လၟုဟ် ဆၜိုတ်ညိညဟေၚ် စှ်ေကၠုၚ်မာန်ကီုလေဝ် ပရေၚ်ပြံၚ်သၠာဲဂွံစိုပ်တရဴ ဒှ်ကၠုၚ်မာန် ဟွံသေၚ်ရဂှ် သ္ၚဳဂၠိပ်လဝ်ရ။
သွံကဵုသ္ၚုအရန်ဂှ် ညံၚ်ၚုဟ်မးသ္ၚု ဂွံညိၚ်ဝတ် ၚုဟ်ဂွံဒးဂှ် သွက်ညးဍုၚ်ကွာန် စသုၚ်ဒၟံၚ် ၜိုတ်ဒှ်ကဵုဒှ်တအ် ညံၚ်ဂွံဒှ် ကပေါတ်ဍာံ၊ ၚုဟ်ဍာံ ဒးစဳဇန်လဝ် နူအခန်ကဏ္ဍပုဂ္ဂလိကရဂှ် ဥက္ကဋ္ဌသြောံသ္ၚုကၟိန်ဍုၚ်ဗၟာ ဥူယျေဝ်မေန်ထောန် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ပရိုၚ် – သြၚ်လောန်တိုၚ်(မ်)
ဗီုရုပ် – CJ
sanlontai