လက်ထက်ကံၚ်ဇြဳပၞာန် ပရေၚ်ကူသာန်ဗၞိက် ဟွံလုပ်သၞောဝ် ဗၟာ-ကြုက် သၠာ်တိုန်အာ ၜါချ

မတ်မလီု၊ အဝ်ဂေတ် (၆)

ပ္ဍဲသၞာံဘဏ္ဍာတုဲကၠုၚ်တေံ ဗ္ၜတ်ကူသာန်ဗၞိဟ်ဟွံလုပ်သၞောဝ် စဵုကဵုဗ္ဒာဲ (၁၇) ဗဳလျာန် ဒဝ်ဠာအမေရိကာန် ဂၠိုၚ်တိုန်ကၠုၚ်တုဲ ယဝ်ရတၟော်ရံၚ်ကဵု ကာလတုပ်သၟဟ်မ္ဂး ပရေၚ်ကူသာန်ဗၞိဟ်ဟွံလုပ်သၞောဝ် ဂၠိုၚ်တိုန်ကၠုၚ် ၜါချရဂှ် ISP-Myanmar ဒှ်ဂကောံသုတေသနဂှ် လလောၚ်တြးလဝ် ပ္ဍဲဂိတုအဝ်ဂေတ် စၟတ်တ္ၚဲ (၃)ရ။

အတိုၚ်စရၚ်ကံၚ်ဇြဳပၞာန် ပ္ဍဲသၞာံဘဏ္ဍာ ၂၀၂၂ -၂၀၂၃ တုဲကၠုၚ်တေံမ္ဂး ဗ္ၜတ်ကူသာန်ဗၞိက် ကရောံကၟိန်ဍုၚ်ကြုက် ဒဝ်ဠာ (၉) ဗဳလျာန်ပြၚ် နွံရဂှ် လလောၚ်တြးလဝ်တုဲ အတိုၚ်တၚ်ဂၞၚ် ဂကောံပိုၚ်ပြဳအဝဵု ပရေၚ်အုပ်ဓုပ်အကံက်အခေါန်နာနာ ကၟိန်ဍုၚ်ကြုက် (GACC) မ္ဂး ဗ္ၜတ်ကူသာန်ဗၞိက် ကရောံကၟိန်ဍုၚ်ဗၟာ ဒဝ်ဠာ (၂၆) ဗဳလျာန်ပြၚ် နွံရဂှ် ဓမံက်ထ္ၜးလဝ်ရ။

အတိုၚ်တၚ်လလောၚ်တြး ဗၟာ-ကြုက် ၜါကၟိန်ဍုၚ်မ္ဂး တၚ်ပါ်ခြာဒၟံၚ် ဗ္ဒာဲ (၁၇) ဗဳလျာန် ဒဝ်ဠာအမေရိကာန်နွံတုဲ ပ္ဍဲဗ္ၜတ်ကူသာန်ဗၞိက် ဗက်ကဵုလၟေၚ်ဂိတုဂှ်လေဝ် ဇၟာပ်ဇၟာပ်ဂိတု နူ (၁) ဗဳလျာန်ဒဝ်ဠာအမေရိကာန် စဵုကဵု (၂) ဗဳလျာန် တၚ်ပါ်ခြာ နွံဒၟံၚ်ရဂှ် ISP-Myanmar ဟီုသ္ဂးလဝ်ရ။

ပရေၚ်ကူသာန်ဗၞိက်ဟွံလုပ်သၞောဝ် လက်ထက်ကံၚ်ဇြဳပၞာန်ဂှ် ယဝ်တၟော်ရံၚ်ကဵု သၞာံဘဏ္ဍာ ၂၀၂၀ -၂၀၂၁ မ္ဂး နၚုဟ်မးပါ်ခြာဒၟံၚ် ဂၠိုၚ်တိုန်ကၠုၚ် ဗ္ဒာဲၜါချရဂှ် ဓမံက်လဝ် ပ္ဍဲတၚ်လလောၚ်တြးဂှ်ရ။

ဟိုတ်ဂှ်ရ တၚ်ပါ်ခြာ ပရေၚ်ကူသာန်ဗၞိက် အကြာကၟိန်ဍုၚ်ဗၟာကဵု ကၟိန်ဍုၚ်ကြုက် ဇၞော်တိုန်ကၠၚ်ဒၟံၚ်ဂှ် ကြဴနူသီအဝဵုတုဲ ဓမံက်ထ္ၜးဒၟံၚ် ပရေၚ်ကူသာန်ဗၞိက်ဟွံလုပ်သၞောဝ် အကြာၜါကၟိန်ဍုၚ် ဂၠိုၚ်တိုန်ကၠုၚ်ဒၟံၚ်ရဂှ် ဓမံက်လဝ် ပ္ဍဲတၚ်လလောၚ်တြး ISP-Myanmar ရ။

နကၟိန်ဍုၚ်ဗၟာ ပၞောဝ်ကဵုကၟိန်ဍုၚ်ဇိုၚ်ဝုတ်ဒိုဟ် ပရေၚ်ကူသာန်ဗၞိက်ပယျဵု မၞုံဒၟံၚ်ပန်ကၟိန်ဍုၚ်ဂှ် မ္ၚးနူဍုၚ်သေံတုဲ ပ္ဍဲဍုၚ်သှ်ေဒၟံၚ်ပိဍုၚ်ဂှ် ပရေၚ်ကူသာန်ဗၞိက် အောန်စှ်ေဒၟံၚ်တုဲ ပရေၚ်ကူသာန်ဗၞိက် ဗက်ကဵုဍုၚ်မ္ဂး ကြုၚ်ဂှ် ဆက်ဒတူလာၚ်ဒၟံၚ် နဒဒှ်ဍုၚ်ဆောဖွက်ကူသာန်ဗၞိက် ဇၞော်အိုတ်ရ။

ပရိုၚ် – သြၚ်လောန်တိုၚ်(မ်)

ဗီုရုပ် – CJ