တက်ဇြေန် သ္ကိုပ်ဝန်ဇၞော်သေံတြေံ ဟီုဂးလဝ် ဒဒှ်ရထပ်ဆုဲပြံၚ်အစဳဇန်စဴဍုၚ်

ၜၚ်ကံက်၊ အဝ်ဂါတ် (၆)

ကြဴနူပေါဲရုဲမာဲသေံတုဲ အခိၚ်ဒးဆေၚ်မုက်ဒးသောၚ်ကလးဒၟံၚ် ပရေၚ်ဍုၚ်ကွာန် မထုဲထံၚ်ဒၟံၚ်ဂှ် သ္ကိုပ်ဝန်ဇၞော်တြေံ တက်ဇြေန်ယှေန်နာဝါတ်ထရာဂှ် ပ္ဍဲတ္ၚဲသ္ၚိသဝ်တေံ ဒဒှ်ရထပ်ပဆုဲထောံ အစဳဇန်စဴဍုၚ်ယျဂှ် ဟီုဂးလဝ်ရ။

တၠကမၠောန်ပရေၚ်ဆက်စၠောံထလဳကောန် တက်ဇြေန်ဂှ်ဝွံ ပ္ဍဲသၞာံ ၂၀၀၁ တေံ ဒှ်ကၠုၚ်လဝ် သ္ကိုပ်ဝန်ဇၞော်သေံတုဲ ပ္ဍဲသၞာံ ၂၀၀၆ ဂှ် ဒးဒုၚ်တးပါဲလဝ် နကဵုပရေၚ်ပၞာန်သီအဝဵုတုဲ ပ္ဍဲသၞာံ ၂၀၀၈ ဂှ် ဒးပါဲဒလေတ်လဝ် နဒဒှ်ညးဂြိပ်တိတ်နူဍုၚ်ရ။

ဂိတုအဝ်ဂါတ်ဏံ ၜိုန်ရလလောၚ်တြးလဝ် စဴကၠုၚ်ဏောၚ်ကီုလေဝ် ဒၟါနူတၚ်နွံပၟိက် သ္ဒးစၟဳတ်ဂဥုဲနွံဂှ်တုဲ ဆုဲပြံၚ်ထောံလဝ်အခိၚ်ရောၚ်ဂှ် ညးသ္ဂးရ။

ဗော်ဖဳထာဲ တက်ဇြေန်မၞုံလက္ကရဴဂှ်ဝွံ ပ္ဍဲပေါဲရုဲမာဲဂိတုမေတေံဂှ် ဗော် Move Forward တုဲမ္ဂး ဂွံဇၞးလဝ် ဒုတိယဂၠိုၚ်အိုတ်ရ။

ဗော်ဂွံဇၞးၜါဏံ ၜိုန်ရပ္တိတ်ကၠုၚ်ဇြဟတ် သွက်ဂွံဒက်ပ္တန်အလဵုအသဳကီုလေဝ် ကၠတ်ထဝ်လ္တူ နူကဵုရဲလ္ပာ်ဒစဵုဒစးရပ်လဝ်ဝါဒတြေံတံကဵု အမာတ်နူကဵုဒပ်ပၞာန်ခါန်ကၞက်လဝ်တံ မအုပ်ဓလီုလဝ်ဂှ် ကၟာတ်လဒဵုလဝ်ရ။

အတိုၚ်သၞောဝ်သ္ဇိုၚ်ဒက်ပ္တန်ဍုၚ် မချူခၞံလဝ် နူကဵုအခိၚ်ပၞာန်အုပ်ဓုပ်တေံဂှ်မ္ဂး ကၠတ်ထဝ်လ္တူ မခါန်ကၞက်ကေတ်လဝ်ဂှ်ကဵု ကၠတ်ထဝ်သၟဝ် မရုဲစှ်ပ္တိုန်လဝ်တံ ပံၚ်တောဲတုဲ သွက်ဂွံကဵုမာဲ ကုသ္ကိုပ်ဝန်ဇၞော်ဂှ် နွံပၟိက်ရောၚ် မဒှ်ရ။

ဖဳထာ မဒှ်က္ဍိုပ်သ္ကိုပ်ဗော် Move Forward မကလိဂွံလဝ်မာဲ ဒၞါဲအမာတ်ဂၠိုၚ်အိုတ် ပ္ဍဲကဵုပေါဲရုဲမာဲဂှ်ဝွံ နူကဵုကၠတ်ထဝ်ၜါဏံ သွက်ဂွံထံက်ဂလာန် နဒဒှ်သ္ကိုပ်ဝန်ဇၞော်ဂှ် ၜိုန်ရပ္တိတ်ကၠုၚ်ဇြဟတ် စဵုကဵုၜါဝါကီုလေဝ် ဒးဒုၚ်တးပါဲထောံလဝ် သီုကဵုၜါဝါရ။

ဗော်ဖဳထာဲဂှ် နဒဒှ်အလံၚ်သ္ကိုပ်ဝန်ဇၞော်ဗော်ညးတံဂှ် ပ္ဍဲသတ္တာဟဏံ ပ္တိုန်အာစရၚ် ကုသရဳထာ ထာဗဳဇြေန် Srettha Thavisin ညးတၠဓနတိသ္ၚိကၠအ်ဂှ်ဏောၚ် မဒှ်ရ။

ပ္ဍဲဂိတုအဝ်ဂါတ် (၄) ဏံ ၜိုန်ရပါလဳမာန် စဳဇန်လဝ် သွက်ဂွံကဵုမာဲသ္ဂုတ်သွာတ်အာ သွက်ဒၞါဲအလံၚ်ညးစၞးဂှ်ကီုလေဝ် ရုၚ်သၞောဝ်ဓဝ်သၞောဝ်သ္ဇိုၚ်ဂှ် ထပ်ဆုဲပြံၚ်ထောံလဝ် ကောံဓရီုပါလဳမာန်ဂှ် စဵုကဵုဂိတုအဝ်ဂါတ် (၁၆) တေံမဒှ်ရ။

Ref: Reuters