ကအ်ကြိက် – အဝ်ဂေတ်(၈)
ပ္ဍဲတွဵုရးကရေၚ် ဒးဆဵုဂဗဒၟံၚ်ဘဲဒဏ်သဘာဝဂှ် ဂိတုအဝ်ဂေတ် စၟတ်တ္ၚဲ (၇) အခိၚ်ဒေါဝ်တ္ၚဲဂှ် ပ္ဍဲဂၠံၚ်ဇၞော်အာယှ ဗြဝတဳ-ကအ်ကြိက် မဒှ်ဂၠံၚ်ဆက်စၠောံဗၞိက်ပယျဵုဂှ် တိထပ်လာ်စှ်ေလဝ်တုဲ ပရေၚ်အာကၠုၚ်တရဴ ဒးဒေါံဒေၚ်လဝ်ရဂှ် ဂွံတီကေတ် အတိုၚ်လဟီု ညးအာတရဴတအ်ရ။
ပြဟ်ဟ်ဏံ ပ္ဍဲတွဵုရးကရေၚ် ဗက်ကဵုဒေသ ဗြဲဇၞော်ဂူလဝ်တုဲ ပ္ဍဲၜဳမပ္တံသြၚ်လောန်၊ တံၚ်ယျေန်၊ ဟောၚ်တယျဝ်၊ ဂြိုၚ်တအ် ဍာ်ၜဳဇၞော်ဒၟံၚ်တုဲ ညးဒေသကောန်ဍုၚ်ကွာန် ဒးဆဵုဂဗဒၟံၚ်ဘဲဒဏ်ဍာ်တအ် ဒးမံၚ်တန်တဴဒၟံၚ် ပ္ဍဲဗဒိုပ်ဇၞူ ပွိုၚ်ဍုၚ်မဆေၚ်စပ်တအ်ရ။
ဂိတုအဝ်ဂေတ် စၟတ်တ္ၚဲ (၇) အခိၚ်နူဂယးဂှ်လေဝ် ဟိုတ်နူဗြဲဂူတြိုပ်စှ်ေ သ္ကာတ်မြဟ်တုဲ ပ္ဍဲမျေနဳကုမ်၊ ဍုၚ်ဗြဝတဳ၊ တွဵုရးကရေၚ်ဂှ် ဍာ်ကၟိုဟ်လဝ်ဂှ်ရ ပရေၚ်အာကၠုၚ် ဝါတ်ဂါတ်လဝ်ကီု အခိၚ်ဒေါဝ်တ္ၚဲ (၁၂) နာဍဳ ကဵု (၄၀) မိနေတ်ဂှ်လေဝ် ဟိုတ်နူဗြဲဇၞော်တုဲ ပ္ဍဲဂၠံၚ်အာယှ ကအ်ကြိက် – ဗြဝတဳဂှ် တိထပ်လာ်စှ်ေလဝ်ရ။
ဟိုတ်နူဗြဲဂူစှ်ေသ္ကာတ်မြဟ်တုဲ ဗ္ဒာဲဍာ်လ္ဂောဝ်တဝ်နဝ် ဂၠံၚ်ဇၞော် ကအ်ကြိက်-ဗြဝတဳဂှ် တိဒုၚ်ဂတာဂၠံၚ်ကွဳစက် ကလှ်ေစှ်ေ လီုလာ်လဝ်တုဲ ဟိုတ်နူတိလာ်စှ်ေလဝ်ဂှ်ရ ဂၠံၚ်ဍာန်ဆက်စၠောံ ပိုတ်သ္ကုတ်လဝ်ကီု ဂကောံဌာနမဆေၚ်စပ်တအ် အာစိုပ်စၟဳစၟတ်တုဲ သွက်ဂွံက္လေၚ်ပလေဝ်ပလေတ် ဗဗွဲမပြဟ်မာန် စဳဇန်ဒၟံၚ်ရဂှ် ဂွံတီကေတ် နူတံရိုဟ်တၚ်ဂၞၚ်ပရိုၚ်ရ။
ပ္ဍဲဂိတုအဝ်ဂေတ် စၟတ်တ္ၚဲ (၆) တုဲကၠုၚ်တေံလေဝ် ဗ္ဒာဲဍာ်လ္ဂောဝ်တဝ်နဝ် ဂၠံၚ်ဇၞော်အာယှ ဗြဝတဳ-ကအ်ကြိက်ဂှ် တိခရိုဟ်လာ်စှ်ေလဝ်ဏီတုဲ ပွိုၚ်ကဵုနာဍဳ ဟိုတ်နူတိကၟာတ်ဂွံလဝ်ဂၠံၚ်ကွဳစက်ဂှ်ရ ပရေၚ်အာကၠုၚ်တရဴ ဒးဒေါံဒေၚ်လဝ် မွဲချိုန်ခနရ။
အတိုၚ်ဌာနစမ်ၜတ်အကာဲအရာဗြဲကျာ လလောၚ်တြးလဝ်မ္ဂး ပ္ဍဲတွဵုရးကရေၚ်ဂှ် ဗက်ကဵုဒေသ ဗြဲဇၞော်လဝ်တုဲ ပ္ဍဲဍုၚ်ကအ်ကြိက် ကေုာံ ဍုၚ်ဗြဝတဳတအ်ဂှ် သတီုဍာ်ဗြဲ စဵုကဵုဗ္ဒာဲ (၆) ၝောံတဲမၞုံတုဲ အခိၚ်နူဂယးဂှ်လေဝ် ပ္ဍဲတွဵုရးကရေၚ် ဒၞာဲစောန်ပြံက် ဗြဲဇၞော်မာန်ဒၟံၚ်ရဂှ် ချိၚ်ခယျကေတ်လဝ်ရ။
ဟိုတ်နူဗြဲဂူစှ်ေသ္ကာတ်မြဟ်ကီု သီုဍာ်ၜဳဇၞော်တိုန်ဒၟံၚ်ဂှ်ရ ပြဟ်ဟ်ဏံ ပ္ဍဲအရာပ်ကွာန် သ္ကုတ်သဝ် မၞုံပွိုၚ်ဍုၚ်ဗြဝတဳ၊ ကအ်ကြိက်၊ ဘာအၚ်၊ လှိုၚ်ဘွ၊ ဘာပန်၊ လှာဒကှ် ပ္ဍဲတွဵုရးကရေၚ်တအ်ဂှ် ဒးဆဵုဂဗဒၟံၚ်ဘဲဍာ်တုဲ ညးဒေသဂၠိုၚ်ကဵုလ္ၚီ ဒးဇူဗ္ဒာဲဒၟံၚ် ပ္ဍဲဗဒိုပ်ဇၞူပါဲဘဲဍာ်ရ။
ပရိုၚ် – သြၚ်လောန်တိုၚ်(မ်)
ဗီုရုပ် – Social Media
sanlontai