တၞၚ်သြဳ၊ အဝ်ဂေတ် (၈)
ကေတ်အာအရေဝ်ရောၚ် ကုညးရပ်သုၚ်စောဲ သြန်စက္ခူကံၚ်ဇြဳပၞာန်တက်တြးပ္တိတ်ရောၚ် တၚ်လလောၚ်တြး PDF တၞၚ်သြဳတအ်ဂှ် ဒှ်ဘပဠဒၟံၚ်ညးဍုၚ်ကွာန်တအ်ရဂှ် ညးဒေသကီု သီုညးချဳဒရာၚ်ကတိုၚ်ကၟဟ်တအ် ဟီုပါ်ပါဲလဝ်ရ။
ဒဒှ်ရဟွံသ္ပစၟတ်သမ္တီ ကုသြန်စက္ခူ ကံၚ်ဇြဳပၞာန် ၂၀,၀၀၀ ဒ္ကေဝ် သီုကေတ်အာအရေဝ် ကုညးရပ်စပ်သုၚ်စောဲတအ်ရောၚ်ဂှ် ဂကောံအုပ်ဓုပ်ညးဍုၚ်ကွာန် ပွိုၚ်ဍုၚ်တၞၚ်သြဳ ကေုာံ ဂကောံရပ်လွဟ် (၈)ဂကောံ ပါလုပ်သီုဒပ်စဵုဒၞာညးဍုၚ်ကွာန် ပွိုၚ်ဍုၚ်တယျေတ်ချောၚ်တအ် ပံၚ်တောဲလလောၚ်တြးလဝ် ပ္ဍဲဂိတုအဝ်ဂေတ်ဏံ မံက်ရ။
ညးလုပ်ဂကောံကဝ်မတဳဗကပ်ဗဗေၚ်ခရိုၚ်ထဝါဲမွဲတၠဂှ်မ္ဂး သြန်စက္ခူ ၂၀,၀၀၀ ဒ္ကေဝ်ဂှ် မ္ၚးနူရာန်ဖျာတုဲ ဟိုတ်နူဟိုတ်နာနာ စိုပ်ကၠုၚ်တဲညးဍုၚ်ကွာန်တအ်မာန်ဒၟံၚ်တုဲ ယဝ်ရဆဵုဂဗမ္ဂး ကေတ်အာအရေဝ်ဏောၚ်ဂှ် ပရေၚ်လလောၚ်တြးဏံ ညိလေဝ် ဒှ်ဟွံထေက်ရဂှ် ဟီုသ္ဂးလဝ်ရ။
သ္အာၚ်နူဂှ်ပၠန် နကဵုဂကောံဇြဟတ်ပၠန်ဂတးတအ် ပ္ဍဲအရာကၠောန်ရေၚ်တၠုၚ် ကမၠောန်ပၠန်ဂတးဂှ် ဒးရံၚ်သ္ၚဳ မုက်ညးဍုၚ်ကွာန်တအ်ထေက်ရောၚ်ဂှ် ထံက်ထ္ၜးဟီုဂးလဝ်ရ။
သ္ဂံၚ်ပၠန်ဂတးလမွဲတၠဂှ်လေဝ် ညံၚ်ဟွံဂွံသုၚ်စောဲ သြန်စက္ခူ ၂၀,၀၀၀ ဒ္ကေဝ် ၜိုန်ရပ္တိတ်လိက်လလောၚ်တြးမာန်ကီုလေဝ် တၚ်လလောၚ်တြး ရပ်စပ်ကေတ်အရေဝ်ဂှ် ပ္ဍဲအရာကုတ်ဗပိုတ် ပၞော်သြန်လုပ်ကံၚ်ဇြဳပၞာန် ဗၠေတ်မှာဒၟံၚ်တုဲ ဗီုပြၚ်ရပ်စပ် ဟွံဍာံပြပုဟ်ဂှ် ဟီုပါ်ပါဲလဝ်ရ။
အလဵုအသဳပရေၚ်ညဳသၟဟ်ကောန်ဂကူ NUG လေဝ် ဒဒှ်ရဟွံသ္ပစၟတ်သမ္တီ သြန်စက္ခူကံၚ်ဇြဳပၞာန်တက်တြးပ္တိတ်လဝ်ဂှ်ကီု စၟတ်သမ္တီလဝ် နဒဒှ်သြန်စက္ခူ ဟွံလုပ်သၞောဝ်ရဂှ် လလောၚ်တြးလဝ် ပ္ဍဲဂိတုဂျူလာၚ် စၟတ်တ္ၚဲ (၂၇) တုဲကၠုၚ်တေံရ။
ကံၚ်ဇြဳပၞာန်သီအဝဵုဂှ် နဒဒှ်စၟတ်သမ္တီကျာ်ပဋိမာရုပ်မာရဝိဇယ အာစိုပ်ဒတုဲ ကေုာံ တ္ၚဲၜံၚ်သၠးစိၚ်ဗ္တာၚ်ရဋ္ဌနန္ဒက ပေၚ်မွဲသၞာံတုဲ သ္ပတံနူဂိတုဂျူလာၚ် စၟတ်တ္ၚဲ (၃၁) စတက်တြးပ္တိတ် သြန်စက္ခူ ၂၀,၀၀၀ ဒ္ကေဝ်ရ။
ဟိုတ်နူကံၚ်ဇြဳပၞာန် ပ္တိတ်ကၠုၚ်သြန်စက္ခူတၟိ ၂၀,၀၀၀ ဒ္ကေဝ်တုဲ ထဝ်၊ ဒဝ်ဠာ သီုကပေါတ်စသုၚ်သ္ဇိုၚ်တအ် ၚုဟ်က္ဍၚ်တိုန်ကၠုၚ် မွဲလစုတ်ဓဝ် သၠာ်တိုန်တိုန်လဝ်တုဲ စဵုကဵုဗွဝ်ဖျာလီု ပရေၚ်ဟွံညိၚ်ဝတ် က္တဵုဒှ်ဒၟံၚ်ရ။
ပရိုၚ် – သြၚ်လောန်တိုၚ်(မ်)
ဗီုရုပ် – Social Media
sanlontai