ဗြဝတဳ၊ အဝ်ဂါတ် (၈)
လ္တူဂၠံၚ်ဇၞော်ဗြဝတဳ−ကအ်ကြိက် မဒှ်ဂၠံၚ်တရဴကုန်သာန်သွံရာန်ပယျဵု သေံ−ဗၟာဂှ် တိထပ်လာ်တုဲ ဟိုတ်နူဂၠံၚ်ပိုတ်အာဂှ်ရ ၚုဟ်ဗၞိက်ဖျာတံ သၠာ်တိုန်ကၠုၚ် လွာဲဂှ်ဂှ် ဂွံတီကေတ် ဇရေၚ်ညးဒေသတံကဵု သၟာဗၞိက်တံရ။
ပ္ဍဲဂိတုအဝ်ဂါတ် (၇) အခိၚ်နူဂယးဂှ် ဟိုတ်နူဗြဲဂူလဝ် ဗွဲမသ္ကာတ်မြဟ်ဂှ်ရ ပ္ဍဲကဵုတွဵုရးကရေၚ်၊ ဍုၚ်ဗြဝတဳ၊ ကုန်တိဍာဲဂှ် ဍာ်ဇၞော်က္တဵုဒှ်တုဲ ပရေၚ်အာကၠုၚ် ခက်ခုဲလဝ်တုဲ ပ္ဍဲကဵုလဒေါဝ်တ္ၚဲ ၁၂ နာဍဳ ၄၀ မိနေတ်ဂှ်လေဝ် ဟိုတ်နူဗြဲဇၞော်တုဲ လ္တူဂၠံၚ်ဇၞော်အာယှ ကအ်ကြိက်−ဗြဝတဳဂှ် တိလာ်ထပ်က္တဵုဒှ်လဝ်ရ။
ဟိုတ်နူဗြဲရိုပ်ဂူလဝ်ဂှ်ရ ပ္ဍဲကဵုဗ္ဒါဲဍာ်လဂေါဝ်တဝ်နဝ် ဂၠံၚ်ဇၞော်အာယှ ကအ်ကြိက်−ဗြဝတဳဂှ် တိသၟဝ်ဂၠံၚ်ကာဂှ် သရိုဟ်စှ်ေအာလဝ်တုဲ တိလာ်လဝ်ဂှ်ရ ပရေၚ်ပလံၚ်ဗစိုပ် အာကၠုၚ်တံ ပိုတ်အာလဝ်ရ။
ဟိုတ်နူပရိုၚ် သ္ကုတ်ဂၠံၚ်ဗြဝတဳ−ကအ်ကြိက် ပိုတ်အာဂှ်တုဲ လွာဲလွာဲဂှ်ဟေၚ် ၚုဟ်ဖျာတံ ထ္ပက်တိုန်ကၠုၚ်တုဲ ကပေါတ်ဗၞိက်မွဲဂကူဂှ် နူကဵု ၁၀ တၟံကၠံ ၚုဟ်သၠာ်တိုန်ကၠုၚ် စဵုကဵု ၂၀ တၟံကၠံရ။
ပ္ဍဲကဵုဂှ် ကၠေၚ်စမွဲစေဝ် တဆိပ်ၚုဲ ကၠုၚ်နူသေံ ဗ္ဒါဲပိပသာနွံဂှ်လေဝ် နူကဵု ၂၂၀၀၀ ဒ္ကေဝ်ဂှ် ဒှ်အာ ၂၅၀၀၀ ဒ္ကေဝ်၊ ခၞံကြုက်(ခေါက်ဆွဲခြောက်) မွဲဖာဂှ် နူ ၁၇၀၀၀ ဒ္ကေဝ် ၚုဟ်သၠုၚ်တိုန်လဝ် စဵုကဵု ၂၀၀၀၀ ဒ္ကေဝ်ရ။
ကပေါတ်ဗၞိက်သ္ဇိုၚ်ဂမၠိုၚ်ဝွံ ဟိုတ်နူပရိုၚ်ဂၠံၚ်ဇၞော်အာယှပိုတ်အာဂှ်တုဲ သၟာဗၞိက်လ္ၚဵု သၠုၚ်ပ္တိုန်ၚုဟ်တုဲ ဟိုတ်နူဇြဟတ်ရာန်သၠုၚ်တိုန်ကၠုၚ်တုဲလေဝ် လွာဲဂှ်ဟေၚ် ၚုဟ်သၠုၚ်တိုန်ကၠုၚ်လဝ်ရောၚ်ဂှ် သၟာဗၞိက်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဟိုတ်နူဗြဲရိုပ်ဂူတုဲ သ္ကုတ်ဂၠံၚ်အာယှ ကအ်ကြိက်−ဗြဝတဳ မပိုတ်အာဂှ် လ္ပာ်ကံၚ်ဇြဳပၞာန်တံ သွက်ဂွံကလေၚ်ပလေဝ်ဂှ် ကၠုၚ်စိုပ်ကျောဝ်လဝ်ကီုလေဝ် ဒၟါနူလီုလာ်ဂၠိုၚ်ဒၟံၚ်တုဲ အခိၚ်ဒးပလေဝ်လအ်မာန်ရောၚ်ဂှ် သ္ၚဳဂၠိပ်လဝ်တံ နွံဒၟံၚ်ရ။
သေံ−ဗၟာ ၜါဍုၚ်ဝွံ သုၚ်စောဲဂၠံၚ်ဇၞော်အာယှ ဗြဝတဳ−ကအ်ကြိက်ဂှ်တုဲ သွံရာန်ဒၟံၚ်ဗၞိက်တံတုဲ ၚုဟ်မးပရေၚ်ကူသာန်သွံရာန် ၜါဍုၚ်ဂှ်ဝွံ ဒဝ်ဠာအမေရိကာန် ဂၠိုၚ်ကဵုဗဳလျာန် နွံဒၟံၚ်ရ။
ပရိုၚ်−သြၚ်လောန်တိုၚ်(မ်)
ဗီု−CJ
sanlontai