ပ္ဍဲလံၚ်လုၚ် ဟိုတ်နူပရေၚ်ပန်ပှော် PDF ဒေသတံတုဲ ကောန်အရာပ်မွဲတၠ ချိုတ်အာ

လံၚ်လုၚ်၊ အဝ်ဂါတ် (၈)

ပ္ဍဲရးတၞၚ်သဳ၊ ပွိုၚ်ဍုၚ်လံၚ်လုၚ်၊ ကွာန်အေန်သံက်ဂှ် ဟိုတ်နူပရေၚ်ပန်ပှော် ဂကောံဒပ်စဵုဒၞါညးဍုၚ်ကွာန် ပွိုၚ်ဍုၚ်လံၚ်လုၚ် (LLPDF) တုဲ ညးဍုၚ်ကွာန်ကောန်အရာပ်မွဲတၠ ချိုတ်အာလဝ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ပ္ဍဲဂိတုအဝ်ဂါတ် (၆) အခိၚ်လဒေါဝ်တ္ၚဲတေံ ကွဳစက်မွဲဖ္ဍိုက် ရာန်ဇွောံမ သွက်ဗ္ဒိုပ်တိုၚ်တာဝါမိုၚ်တေဝ် မၞုံလ္တူဒဵု(စစ်လှန်း) ကဵု ဗ္ဒိုပ်စဵုဒၞါသၞတရဴကျာ ကံၚ်ဇြဳပၞာန် မၞုံပွိုၚ်ဍုၚ်လံၚ်လုၚ်ဂှ်တုဲ မကလေၚ်စဴကၠုၚ်ဂှ် ဒပ် LLPDF တံ ဂွံပရိုၚ်တုဲ မၚ်စၟဳတ်လဝ်ရ။

ကွဳစက်မွဲဖ္ဍိုက် ရာန်ဇွောံမတုဲ မကလေၚ်စဴကၠုၚ်ဂှ်ဝွံ ဟွံဒုၚ်စၟဳတ်မွဲသာ် ဇီုဏာကောန်ဒပ်စဵုဒၞါမွဲတၠတုဲ ဟိုတ်နူဒဳဓရိပ်ဏာဂှ်ရ ဂကောံဒပ် LLPDF တံ ဗက်ပန်ပှော်လဝ် နကဵုကွဳစက်ရ။

ညးမပါဗက်ကၠုၚ် လ္တူကွဳစက် မဒဳဓရိပ်ဏာၜါတၠဂှ်ဝွံ သၠာကာခတိုဟ်တုဲ ဒေါအ်လဝ်ကွဳစက် ဂတဆေၚ်ဗဳလဳယျာတ် မၞုံဗ္ဒါဲဂၠံၚ်ပန်သွာၚ် ကွာန်အေန်သံက်ဂှ်တုဲ ဂြိပ်တိတ်အာဂှ်ရ အခိၚ်ကောန်ဒပ် LLPDF မွဲတၠ ဗက်ပန်ပှော်ဂှ် ဒးအာလဝ် မၞိဟ်တြုံမွဲတၠ မဂ္ဇအ်ဒၟံၚ်ပ္ဍဲခုၚ်ဗဳလဳယျာတ်ဂှ်တုဲ ညးဝွံ ဒးချိုတ်အာလဝ်ရ။

ကိုဝ်မျဵုဇြဝ်လာတ် ဟိုတ်နူဒးဒုၚ်ပန်ပှော်တုဲ မချိုတ်အာဂှ်ဝွံ ၜိုန်ရဒှ်ဇာတိ ပွိုၚ်ဍုၚ်လံၚ်လုၚ်ကီုလေဝ် အခိၚ်ပြံၚ်မံၚ် ဍုၚ်ထဝါဲ အဟိန်အာဝေၚ် ဇရေၚ်ရဲညး ဒၟံၚ်ကွာန်အေန်သံက်ဂှ် ဒးဒုၚ်ပန်ပှော်လဝ်ရ။

လ္တူကိုဝ်မျဵုုဇြဝ်လာတ် မဒးချိုတ်အာဂှ် ဒဒှ်ရမ္ဒးအောန်စိုတ်ဒှ်လၞီ မွဲစွံကဵုဂြောဝ်ဂတာညးတံဂှ်တုဲ ကေတ်အာလျိုၚ် နကဵုတၚ်ဒုၚ်လျိုၚ်နွံနွံရောၚ်ဂှ် ဂကောံဒပ်စဵုဒၞါညးဍုၚ်ကွာန် ပွိုၚ်ဍုၚ်လံၚ်လုၚ် (LLPDF) လလောၚ်ပ္တိတ်လဝ်ရ။

ပရိုၚ်−သြၚ်လောန်တိုၚ်(မ်)

ဗီု−LLPDF