ပရေၚ်ပၠန်ဂတး သ္ဂောံကလေၚ်ဂတးလက္ကရဴဟွံမွဲပုဟ်ဂှ် KNU ဟီု

ကအ်ကြိက်၊ အဝ်ဂါတ် (၈)

ပၠန်ဂတးပလှ်ဖျေံတၠအဝဵုပၞာန်စဵုကဵုရိုဟ်ကၞက်ဂွံပိုတ်အိုတ်ဂှ်ဝွံ ဟိုတ်သ္ဂောံဂတးတဴလက္ကရဴလေဝ်ဟွံမွဲ သ္ဇက်ဒးကူချပ်လေဝ်ဟွံမွဲပုဟ်ဂှ် ပဒိုဝ်သဝ်တဝ်နဳ ဂကောံကမ္မတဳဗဟဵု KNU ထ္မံက်ပ္တိတ်ဟီုဂးလဝ်ရ။

စပ်ကဵုအကာဲအရာပရေၚ်ဍုၚ်ကွာန်လၟုဟ်တုဲ ပဒိုဝ်သဝ်တဝ်နဳ မဒှ်ကောန်ဂကောံဗဟဵုလၟိုန်ဂှ်ကီု သီုကဵုဒှ်ညးဒုၚ်တာလျိုၚ် ဌာနပရေၚ်ဍုၚ်သ္အာၚ် KNU ဂှ် ဟီုထ္မံက်ပ္တိတ်ကၠုၚ် ပ္ဍဲဂိတုအဝ်ဂါတ် (၇) တေံရ။

တုဲကၠုၚ် ပ္ဍဲဂိတုအဝ်ဂါတ် ၆ တေံ စပ်ကဵုတၚ်လလောၚ်တြးပံၚ်တောဲ တၚ်ဒတူလိုၚ်လစွံစိုတ် ဂကောံပၠန်ဂတး မလုပ်ဒၟံၚ်ပေါဲဗ္တိုက် ပ္ဍဲပၠန်ဂတးက္ညၚ်ဏံဂှ်တုဲ ညးဒုၚ်တာလျိုၚ် ဌာနကာဍုၚ်သ္အာၚ် KNU ပဒိုဝ်သဝ်တဝ်နဳ ဟီုဂးလဝ် သာ်ဏံရ။

“စပ်ကဵုတၚ်လလောၚ်တြး NUG ကေုာံ NUCC မလလောၚ်ပ္တိတ်လဝ် နူဏေံတေံဂှ်တုဲ ဒးဟီုမ္ဂး ညအ်ဂှ် ဒှ်တၚ်လလောၚ်တြးပိုယ်တံဗိုန်န်ဗတ်တ်မွဲရဏောၚ်။ စပ်ကဵုညအ်တုဲ ဒးဟီုနူကဵုလဵုရောဟီုမ္ဂး အတိုၚ်တၚ်ဆဵုဂဗပိုယ်တံ တတ်ထ္ပာ်ကၠုၚ် အခိၚ်တုဲကၠုၚ်တေံတုဲ စပ်ကဵုပရေၚ်ဍုၚ်ကွာန်သာ်ဏံတုဲ အခက်အခုဲအကြေပ်အဂြတ်သာ်ဏံဂှ် ပိုယ်တံ ဂဗကၠုၚ်လဝ်တုဲယျ။ ဗွဲတၟေၚ် လ္ပာ်ဂကောံပၞာန်တံဂှ်တှ်ေ ဍေံတံကလေၚ်ရပ်စပ်ဒၟံၚ် နဲကဲတြေံတြေံတံလေပ်အိုတ်ရ။ ဟီုမ္ဂး ဗွဲတၟေၚ် ပိုယ်တံဂွံမိၚ်ညာတ်ဒၟံၚ်ဂှ်တှ်ေ ကောန်ထံၚ်ပရေၚ်ဍုၚ်ကွာန်တံဂှ် ဗီုနွံပၟိက် ရပ်ဒက်လဝ်တုဲ အခိၚ်ဒးစိုတ် ဍေံတံပ္တိတ်ရပ်စပ်ဒၟံၚ် အခိုက်တံဏံရ။ အခိုက်တံဏံဂှ် နူဏေံတေံမှ မံက်ကၠုၚ်ဟွံသေၚ်ပုဟ်။ ကၠောန်ကၠုၚ်ဂှ်လေဝ် လအ်ယျ။ မွဲအာယုက်ပိုယ်တံဂှ်လေဝ် လ္တုန်ဟွံအောန်ရပုဟ်။ အရာတံဏံဂှ် သာ်လဵုမှပိုယ်တံ ဒုၚ်တဲဟွံဂွံဂှ်ရ တၚ်လလောၚ်တြးပိုယ်ဂှ် သောၚ်ကလး ပိုတ်သ္ကုတ်ဒၟံၚ်ရဏောၚ်။ ပိုယ်တံဂှ် စပ်ကဵုကိစ္စတံဏံတုဲ သ္ဇက်ဂွံဒးကူချပ်ဒၟံၚ်လေဝ်ဟွံမွဲပုဟ်။ သ္ဇက်ဂွံဒးဂတးလက္ကရဴလေဝ် ဟွံမွဲပုဟ်” သာာ်ဝွံ ပဒိုဝ်သဝ်တဝ်နဳ ဟီုရ။

သ္အာၚ်နူဂှ်ပၠန် အတိုၚ်ကံၚ်ဇြဳပၞာန်တံ ကၠောန်ဒၟံၚ်လၟိုန် ကဵုမက်ဂၠက်တုဲ လ္တူမကဵုကၠုၚ်အခေါၚ်အရာတံဂှ်လေဝ် ဒစဵုဒစးကဵုတၚ်ရန်တၟံဂကောံဇကုတံတုဲ သာ်လဵုမှ သ္ဇက်ဂွံဒုၚ်တဲမာန်ဟွံမွဲတုဲ ကယျာန်ပါဲလဝ် ပိုတ်တ်သ္ကုတ်တ်ရောၚ်ဂှ် ပဒိုဝ်သဝ်တဝ်နဳ ဆက်ဟီုရ။

နကဵုဗော်သွးကောန်ဂကူကရေၚ်ဂှ် တိုၚ်ပ္ကဴမိက်ဂွံဂွံတံဂှ် ဇက်ဂၠေါဲတိုန်အာ တူရူတပ်ပ်ဏောၚ်မဒှ်တုဲ ကမၠောန်လဵုဟွံဟီု မဟာဗျူဟာ၊ နဲဗျူဟာတံ နွံတဴဂှ် သ္ဂးရ။

“ပ္ဍဲကဵုသၟဝ်အကာဲအရာ မထ္ကးပြးဒၟံၚ်ဏံ ပိုယ်တံဒးဝေၚ်ဒၟံၚ်သာ်ဏံဂှ် ဟွံတၟေၚ်ဟ်ပုဟ်။ ဟိုတ်ဂှ်ရ ဒေသလ္ၚဵုဂှ်တှ်ေ ဂွံညာတ်ကေတ်မွဲဗီုဏောၚ်။ ပ္ဍဲကဵုဒေသလ္ၚဵုတံမ္ဂးလေဝ် ဂွံညာတ်ကေတ်မွဲဗီုဏောၚ်။ ဆ္ဂး လ္ဂောံကဵုမဟာဗျူဟာပိုယ်တံမ္ဂး သၞောတ်တၠအဝဵုပၞာန်လဵုဟွံဟီု ပိုယ်တံဒးပသောၚ်ပ္တိတ်ထောံ နူကဵုဍုၚ်ကွာန်ပိုယ်ဏောၚ်။ မုဒှ်ရောဟီုတှ်ေ ယဝ်ရပိုယ်ပြံၚ်လှာဲ ဂကောံအလဵုအသဳညးအုပ်ဓုပ်မွဲဂကောံဓဝ်ရမ္ဂး အကာဲအရာဍုၚ်ကွာန်ပိုယ် မ္ဒးဂဗဒၟံၚ်ဂှ်ဝွံ ညံၚ်တၠအဝဵုပၞာန်သာ်ဏံရ ကလေၚ်မံက်တုဲမံက်ပၠန် မွဲဂကောံတုဲမွဲဂကောံဂှ် ဂေတ်ဒၟံၚ်သံသာဏံရဏောၚ်။ လ္ပာ်ပၞာန်တံဂှ်လေဝ် ဇၟာပ်ပ်ဒးဂဗပြသၞာတံဂှ် မုဍေံတံကၠောန်လေပ်ရောဟီုမ္ဂး လၟုဟ်ဂှ် ဂွံကၠုၚ် ၆၀၊ ၇၀ သၞာံယျ။ လ္ဂောံကဵုတၚ်ဆဵုဂဗ ပိုယ်တံ မတတ်ထ္ပာ်ကၠုၚ်ဂှ်မ္ဂး ပရေၚ်ဆဵုဂဗသဳကၠဳတံဟီုဟီု မုဟီုဟီု အိုတ်ကၞောတ်ဂှ် နကဵုနဲကဲသောၚ်ကလးကဵုလွဟ်လက်နက်မွဲရ ဗွဲတၟေၚ် တုဲဒှ်အာ နကဵုပရေၚ်ပၞာန်သီအဝဵုဏံဂှ်ရဏောၚ်” သာ်ဝွံ ညးဟီုရ။

ဗော်သွးကောန်ဂကူကရေၚ် KNU ဝွံ ကြဴနူဒပ်ပၞာန်သီအဝဵုတုဲဂှ် ပံၚ်တောဲကဵု ဂကောံဇြဟတ်ပၠန်ဂတးအဖဝ်မိတ် ပါလုပ်သီုကဵု PDF သၟဝ်တဲအလဵုအသဳညဳသၟဟ်ဂကူ NUG တံဂှ်တုဲ ဒှ်ဂကောံရပ်လွဟ် ကောန်ဍုၚ်အရၚ်ဇြဟတ်ဇၞော်မွဲ မဗ္တိုက်ပ္တိတ်ဒၟံၚ် ဒပ်ကံၚ်ဇြဳပၞာန်တံရောၚ် မဒှ်ရ။

အပ္ဍဲကာလသီအဝဵုၜါသၞာံပြၚ်ကၠုၚ်ဏံ ပ္ဍဲကဵုတိဍာ်အုပ်ဓုပ် KNU ဂှ် အကြာဒပ်ကံၚ်ဇြဳပၞာန်ကဵု ဂကောံဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA တံဂှ် ပေါဲဗ္တိုက်ၜါလ္ပာ် က္တဵုဒှ်ဒၟံၚ် စဵုကဵု ၉၀၀၀ ဝါပြၚ်ဂှ် ဂွံတီကေတ် အတိုၚ်တၚ်လလောၚ်တြး KNU ရ။

ပရိုၚ်−သြၚ်လောန်တိုၚ်(မ်)

ဗီု−KNU