သွက်ကၟိန်ဍုၚ်ဖေဝ်ဒရာဂှ် ပ္တဝ်အာက္ဍိုပ် ကုပၠန်ဂတးပြံၚ်လှာဲသၞောတ်ရောၚ်ဂှ် ဂကောံဇြဟတ်ပၠန်ဂတးတံဟီု

လ္ဂုၚ်၊ အဝ်ဂါတ် (၈)

သွက်ကၟိန်ဍုၚ်ပံၚ်ကောံ ဖေဝ်ဒရာဒဳမဝ်ကရေဇြဳ ကောန်ဂကူကောန်ဍုၚ်အရၚ်ဂမၠိုၚ် ပါလုပ်သီုကဵုဂကူဗမာတံ မစၟဳစလဝ်ဂှ်တုဲ ပ္တဝ်အာက္ဍိုပ် ကုပရေၚ်ပၠန်ဂတးပြံၚ်လှာဲသၞောတ်ရောၚ်ဂှ် ဂကောံဇြဟတ်ပၠန်ဂတးတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ပရေၚ်ပၠန်ဂတးရပ်လွဟ်ဂှ်ဝွံ ဒှ်ပၠန်ဂတး ပြံၚ်လှာဲကၠေံညးအုပ်ဓုပ် သ္ကဵုသၞောတ်တၠအဝဵုပၞာန်တံ သ္ဂောံဂျိုၚ်တဴဟွံသေၚ်တုဲ ဒှ်ပၠန်ဂတးပြံၚ်လှာဲသၞောတ်ရောၚ်ဂှ် ဂကောံဇြဟတ်ပၠန်ဂတးတံ ဟီုပ္တိတ်ကၠုၚ် ညဳညဳသာသာအိုတ်ရ။

ဥူအံၚ်သာန်မျေတ် ညးအုပ်ကာလၟိဟ် (၂) ဗော်တောတက်ကောန်ဂကူကရေၚ်ဍာဲ (KNPP) ဂှ် အပြံၚ်အလှာဲညးအုပ်ဓုပ်ဂှ် ဒုၚ်အာတဲဟွံသေၚ်တုဲ ပြဝကမၠောန် မဒစဵုဒစးဗၠေတ်ဗၠၚ်အာ နူကဵုဂၠံၚ်တရဴ ပရေၚ်သ္ဂောံဒက်ပ္တန်ဖေဝ်ဒရာဒဳမဝ်ကရေဇြဳဂှ် ဒုၚ်အာတဲဟွံသေၚ်ပုဟ်ဂှ် ဟီုရ။

“အနာဂတ်ဖေဝ်ဒရာ ပိုယ်တံမအာတ္ၚဲဏံဂှ် ပိုယ်တံအာကဵု Regime Change ဟွံသေၚ်ပုဟ်၊ အာကဵု System Change ဏောၚ်။ ဇၟာပ်ပ်ပြဝ မအာကဵု Regime Change ဂှ်လေဝ် ပိုယ်တံ ဒုၚ်အာတဲဟွံသေၚ်ပုဟ်။ အနာဂတ်ဂတတေံ သွက်ဂွံဒက်ပ္တန် ဒပ်ပၞာန်ဖေဝ်ဒရာ သၟဝ်အလဵုအသဳကောန်အရာပ်ဂှ်လေဝ် နကဵုပိုယ်တံ မုမှသ္ဇက်ဒးဟီုဟွံမွဲပုဟ်။ ပြဝကမၠောန်သာ်လဵုဟွံဟီု မဗၠေတ်အာနူကဵုဂၠံၚ်တရဴဒက်ပ္တန်ဖေဝ်ဒရာဒဳမဝ်ကရေဇြဳ ဂကောံဇြဟတ်ပၠန်ဂတးတံ မစၟဳစလဝ်ဂှ်ကီု၊ မဒစဵုဒစးအာကဵု ဂၠံၚ်တရဴပၠန်ဂတး နူကဵုညးဍုၚ်ကွာန်တံ မဖျေံစၟတ်လဝ် အရာရာအိုဿီုတံဂှ် ပိုယ်တံ ဒုၚ်အာတဲဟွံသေၚ်ပုဟ်” သာ်ဝွံ ညးသ္ဂးရ။

အလဵုအသဳညဳသၟဟ်ဂကူ NUG ကေုာံ ကံၚ်ဇြဳကဵုကသပ် ရေၚ်ညဳသၟဟ်ဂကူ NUCC တံဂှ်လေဝ် အကာဲအရာပရေၚ်ဍုၚ်ကွာန် မသ္ကဵုဗၠေတ်ဗၠေၚ်အာ နူကဵုသၞောဝ်အစာံ တၚ်ရန်တၟံ စပ်ကဵုပရေၚ်ပြံၚ်လှာဲသၞောတ်တၟိ၊ ခေတ်တၟိ ဇကုတံ မစၟဳစလဝ်ဂှ်သာ်လဵုဟွံဟီု ကယျာန်ပါဲအာ ပိုတ်တ်သ္ကုတ်တ်ဏောၚ်ဂှ် ပံၚ်တောဲလလောၚ်တြးလဝ်ရ။

တုဲကၠုၚ်အပ္ဍဲဂိတုဂျူလာၚ်တေံ လ္တူအပြံၚ်အလှာဲပရေၚ်ဍုၚ်ကွာန် နူကဵုကံၚ်ဇြဳပၞာန် မပြံၚ်ကၠုၚ်အခိုက်ဝေၚ်ပရေၚ်ဍုၚ်ကွာန် လ္တူဒဝ်အံၚ်သာန်သုကျဳဂှ် NUCC ကေုာံ NUG တံ ကော်ကေတ်ကောံဓရီု ပ္ဍဲဂိတုဂျူလာၚ် ၃၁ တေံတုဲ လလောၚ်ပ္တိတ်ကၠုၚ် တၚ်လလောၚ်တြး သာ်ဏံရ။

စပ်ကဵုတၚ်လလောၚ်တြး NUCC ကေုာံ NUG ဂှ်တုဲ ဒံက်တာသဳရိမန်ဆာန် ဥက္ကဌကမ္မတဳက္ဍိုက်ပ်ပရေၚ်ပၞာန်၊ ပရေၚ်ဍုၚ်ကွာန် ဒပ်စဵုဒၞါဍုၚ်မန် (MSDF) ဂှ်လေဝ် ပ္ဍဲပၠန်ဂတးက္ညၚ်ဏံ ကံၚ်ဇြဳပၞာန် ပ္တိတ်ရပ်စပ်ကၠုၚ် ဒဝ်အံၚ်သာန်သုကျဳမ္ဂးလေဝ် ဟိုတ်သ္ဇက်ဂွံဒုၚ်တဲမာန်ဟွံမွဲပုဟ်ဂှ် ဟီုလဝ်ရ။

“ဒပ်ပၠန်ဂတးဍုၚ်မန်ပိုယ်တံကီု ဂကောံဇြဟတ်ပၠန်ဂတး မလုပ်ဒၟံၚ်ပေါဲဗ္တိုက်ရပ်ဒၟံၚ်လွဟ် ပ္ဍဲပၠန်ဂတးက္ညၚ်တံဏံကီုဂှ် တၚ်ဒတူလိုၚ် ပရေၚ်ဍုၚ်ကွာန်၊ ပရေၚ်ပၞာန်ဂှ် ဒှ်ဒၟံၚ်မွဲထပ်ဓဝ်ရဏောၚ်ဂှ် ဟီုဂွံရ။ နူကဵုကံၚ်ဇြဳပၞာန်တံ ရပ်စပ်ဒဝ်အံၚ်သာန်သုကျဳတုဲ ဆက်ဒတူလိုၚ်အာ ပ္ဍဲကဵုပရေၚ်ဍုၚ်ကွာန် နဒဒှ် Main Stateholder တုဲ ကိစ္စပြံၚ်လှာဲအာလွေဟ်ဒဳမဝ်ကရေဇြဳ မွဲကဆံၚ်တုဲမွဲကဆံၚ် ဗီုကၠာတေံဂှ် နကဵုပိုယ်တံ ဒဒှ်ရဟွံဒုၚ်တဲဂှ် ဒှ်သဘဴဟီုပ္တိတ် ကၠးကၠးမှးမှးရောၚ် မဒှ်ရ” သာ်ဝွံ ညးသ္ဂးရ။

ပ္ဍဲကဵုတၚ်လလောၚ်တြးပံၚ်တောဲ NUCC ကေုာံ NUG တံဂှ် သွက်ဂွံဒက်ပ္တန်ကၟိန်ဍုၚ်ဖေဝ်ဒရာဒဳမဝ်ကရေဇြဳ မဒ္ဂေတ်ရပ်စပ်အာ သၞောတ်ဖေဝ်ဒရာဒဳမဝ်ကရေဇြဳနတဲ ကေုာံ အခိုက်အလေံဒပ်ပၞာန်သီအဝဵု ကေုာံ ဒပ်ပၞာန်ပါလုပ်ဒၟံၚ်ပ္ဍဲပရေၚ်ဍုၚ်ကွာန်တံဂှ် သ္ဒးအိုတ်ပၠိုတ်အာထာဝရဏောၚ်ဂှ် သ္ဂးရ။

သၟာပရေၚ်ဍုၚ်ကွာန်ဝှ်ကြံၚ် ဥူဖေတာန်ဂှ် နကဵုဒပ်ပၞာန် နူကဵုပရေၚ်ဍုၚ်ကွာန်ဂှ် တိတ်ကဵုအာလောဲလောဲသွာသွာဟွံသေၚ်တုဲ ကြေပ်ဂြတ်ကၠုၚ်က္ဍၚ် သာတုဲရုန်ဂ္စါန်ကၠုၚ်က္ဍၚ်ဂှ်ရ နကဵု NUG သွက်ဒပ်ပၞာန်ဖေဝ်ဒရာဂှ် ၜိုတ်လဵုသဳကၠဳလဝ်ကတိကဝတ် ကု EAO တံတုဲယျဟီုဂှ် ပၟိက်ဇၞော်ရောၚ် သ္ၚဳဂၠိပ်လဝ်ရ။

“ ဒပ်ပၞာန်ဂှ်တှ်ေ နူကဵုပရေၚ်ဍုၚ်ကွာန်ဂှ် တိတ်ကဵုအာလောဲလောဲဟွံသေၚ်ပုဟ်။ ဆ္ဂး နကဵုပေါဲဗ္တိုက်ညးဍုၚ်ကွာန်တံဂှ် ဒပ်ပၞာန်တိတ်အာဟာဟီုဂှ်လေဝ် ဟွံချိုတ်ပၠိုတ်က္ဍၚ်ပုဟ်။ ဍေံတံလေဝ် ကြေပ်ဂြတ်ကၠုၚ်က္ဍၚ် သာတုဲရုန်ဂ္စါန်ကၠုၚ်က္ဍၚ်တုဲ ဆက်တုဲဗ္တိုက်အာဒၟံၚ်ဏောၚ်။ အကာဲအရာသာ်ဏံဂှ် ၜိုတ်လဵုထ္မံက်ရုပ်ရဴမာန်ရော။ နကဵု NUG ကုကောန်ဍုၚ်အရၚ်တံဂှ် ပရေၚ်သဳကၠဳကတိကဝတ် သွက်ဒပ်ပၞာန်ဖေဝ်ဒရာဂှ် နွံကၠုၚ်ၜိုတ်လဵုယျရော။ ညအ်ဂှ် ပၟိက်ဇၞော်ကွေံကွေံဏောၚ်။ NUG ဂွံဓဝ်ညဳသာ ကုကောန်ဍုၚ်အရၚ်တံ သာ်ဏံတုဲမ္ဂး PDF တံလေဝ် နွံသၟဝ် NUG ကောံကောံကလောံကလောံမ္ဂး ပေါဲဗ္တိုက်ဏံဂှ် ဟွံဒးအာဍာ်ဇမၠိၚ်ပုဟ်။ နကဵုအခိၚ်ဂၠေံဂၠေံဂှ် ပိုတ်အာမာန်ဒၟံၚ်ရောၚ်” သာ်ဝွံ ညးသ္ဂးရ။

ဍုၚ်ဗၟာ ကြဴနူဂွံသၠးပွး နူကဵုသၟဝ်တဲရဲသၠဲတိကိုဝ်လိုဝ်နဳတံတုဲဂှ် ဒပ်ပၞာန်ဝွံ သ္ဒးနွံ သၟဝ်ပၠတရဴ အလဵုအသဳညးဍုၚ်ကွာန်ကောန်အရာပ် မရုဲစှ်ပ္တိုန်လဝ်ဂှ်ရောၚ်ကီုလေဝ် ပ္ဍဲကဵုခေတ် နဝတ၊ နအဖဂှ် စုတ်လဝ် တၚ်ပ္တဝ်က္ဍိုပ် ပရေၚ်ဒပ်ပၞာန်သ္ဂောံပါလုပ် ပ္ဍဲကဵုအခန်ကဏ္ဍပၠတရဴပရေၚ်ဍုၚ်ကွာန်ကောန်ဂကူ ပ္ဍဲကဵုသၞောဝ်သ္ဇိုၚ် ၂၀၀၈ ရ။

ဟိုတ်ဂှ်ရ တၚ်ဒပ်ပၞာန်မပါလုပ်ဒၟံၚ် ပ္ဍဲကဵုပရေၚ်ဍုၚ်ကွာန်ဍုၚ်ဗၟာဂှ် ဒးကလေၚ်ရုပ်သီဏောၚ်မဒှ်တုဲ နူကဵုအခိုက်အလေံဒပ်ပၞာန်လေပ်သီအဝဵုအခိၚ်ဟွံရုဲဂှ် သွက်ဂွံစဵုဒၞါမွဲအလန်ဓဝ်ဂှ် တာလျိုၚ်နွံဒၟံၚ်သီုညးဖအိုတ်ရောၚ် ဥက္ကဌ ကံၚ်ဇြဳဖေဝ်ဒရာကောန်ဂကူပအိုဝ် (PNFC) ဃောန်မျေတ်ထောန် သ္ဂးရ။

“ကဵုအခိုက်ကၟိန်ဍုၚ်ဂှ်လေဝ် ဒစဵုဒစးတုဲ ကဵုအခိုက်ဂၠးတိဂှ်လေဝ် ဒစဵုဒစးတုဲ ကၠောန်လဝ်ရ။ ဟိုတ်ဂှ်ရ တၚ်ဏံဂှ် ပိုယ်တံ ဒးကလေၚ်ရုပ်သီဏောၚ်မဒှ်တုဲ အခိုက်အလေံဒပ်ပၞာန်က္တဵုသီအဝဵုလေပ် အခိၚ်ဟွံရုဲဂှ်လေဝ် ပိုယ်တံ ဒးစဵုဒၞါမာန်လဝ် မွဲအလန်ဓဝ်ဏောၚ် မဒှ်ရ။ အဓိကဂှ်တှ်ေ ကမၠောန်ဒပ်ပၞာန်ဂှ် ဒပ်ပၞာန်ဒးကၠောန်ဏောၚ်။ ဒပ်ပၞာန် ဒးမံၚ် ဒၞါဲဒပ်ပၞာန်ဏောၚ်။ ညံၚ်ဂွံဒှ်ဗီုဏံဂှ် ပ္ဍဲကဵုဒပ်ပၞာန်ကီု ကောန်ပၞာန်တံကီု သီုကဵုပိုယ်တံအိုဿီု တာလျိုၚ်နွံဒၟံၚ်ရောၚ်” သာ်ဝွံ ညးသ္ဂးရ။

အခိၚ်လၟုဟ်ဂှ် ပ္ဍဲကဵုဂကောံရပ်လွဟ်ကောန်ဍုၚ်အရၚ်ဂမၠိုၚ် ဗော်သွးကောန်ဂကူကရေၚ် (KNU) ၊ ဒပ်ပၠတရဴကောန်ဂကူချေၚ် (CNF) ၊ ဗော်တောတက်ကောန်ဂကူကရေၚ်ဍာဲ (KNPP) ကေုာံ ဂကောံဗၠးၜးကချေၚ် (KIO) တံဒှ်တမ် ကရောံညးတံဂှ် ဂကောံဒပ်စဵုဒၞါညးဍုၚ်ကွာန် မမံက်တိတ်ကၠုၚ် ဂၠိုၚ်ကဵုကၠံ ပါလုပ်ဒၟံၚ် ပ္ဍဲကဵုပၠန်ဂတးက္ညၚ်ဏံအိုတ်ရ။

NUG ကေုာံ NUCC တံဂှ် ဒက်ပ္တန်အာ “ ဒပ်ပၞာန်ကၟိန်ဍုၚ်ပံၚ်ကောံဖေဝ်ဒရာ” ကောန်ဍုၚ်အရၚ်ဂကူဇဳပါလုပ်တုဲ ယိုက်ဂၠေၚ်တာလျိုၚ် သွက်သ္ဂောံစဵုဒၞါသၞဍုၚ်သ္အာၚ်သၟးတုဲ ဒပ်ပၞာန် မဒ္ဂေတ်ဗက်အမိၚ် ပရေၚ်ကောပ်ကာဲအုပ်ဓုပ် အလဵုအသဳညးဍုၚ်ကွာန်ဂှ်ရောၚ်ဂှ် လလောၚ်ပ္တိတ်လဝ်ရ။

ပရိုၚ်−သြၚ်လောန်တိုၚ်(မ်)

ဗီု−CJ