မတ်မလီု၊ အဝ်ဂေတ် (၉)
ပ္ဍဲပွိုၚ်ဍုၚ် မၞုံတွဵုရးဍုၚ်မန် (၄)ပွိုၚ်ဍုၚ်ဂှ် ဟိုတ်နူဗြဲဂူစှ်ေလဝ် အဆက်ဟွံပိုတ်သ္ကုတ်တုဲ ဍာ်ဆက်ဇၞော် က္တဵုဒှ်ဒၟံၚ်ဂှ်ရ သွက်ဂွံဒးဆဵုဂဗကဵု ပရေၚ်သြောံကသီုလီု ဨကဂၠိုၚ်ကဵုလက် နွံဒၟံၚ်ရဂှ် သၟာဗ္ၚတအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
သ္ပတံနူ ဂိတုဂျူလာၚ် သတ္တာဟလကြဴအိုတ် တုဲကၠုၚ်တေံတုဲ ပ္ဍဲပွိုၚ်ဍုၚ်ၜဳကလေၚ်၊ ကျာ်ထဝ် ကေုာံ ပွိုၚ်ဍုၚ်သဓီု မၞုံတွဵုရးဍုၚ်မန်တအ်ဂှ် ဗြဲဂူစှ်ေ အဆက်ဟွံပိုတ်သ္ကုတ်တုဲ ဟိုတ်နူဍာ်ၜဳ ၜဳကလေၚ် ဇၞော်လောန်နူဗ္ၜတ်အပိုၚ်ခြာဒးဒှ်ဓဝိၚ် က္တဵုဒှ်ဒၟံၚ်ရ။
ပရေၚ်ဍာ်ဇၞော်ဏံ ဟိုတ်နူဆက်က္တဵုဒှ်ဒၟံၚ် စဵုကဵုဂိတုအဝ်ဂေတ် စၟတ်တ္ၚဲ (၈) ဂှ်ရ ပ္ဍဲသြောံကသီု တဵုလွဳလဝ်ဂှ် ဗၠိုက်ဍာ်တုဲ တၞံသြောံကအ်ကဝ်ဒၟံၚ် စဵုကဵုအခိၚ်လၟုဟ် ဟွံက္လေၚ်မံက်တိုန်ဏီဂှ်ရ သွက်ဂွံဆဵုဂဗကဵု ပရေၚ်လီုဆောံလေၚ် နွံဒၟံၚ်ရ။
ဟိုတ်နူဍာ်ဇၞော်တုဲ ပွိုၚ်ဍုၚ်ၜဳကလေၚ်ဂှ် သြောံကသီု ဨက ၃၀,၀၀၀ ပြၚ် သွက်ဂွံဒးလီုဆောံလေၚ် ဂၠိုၚ်အိုတ်နွံဒၟံၚ်တုဲ ပ္ဍဲပွိုၚ်ဍုၚ်ကျာ်ထဝ် ကဵုပွိုၚ်ဍုၚ်သဓီု သှ်ေဒၟံၚ်ဂှ်လေဝ် တိဗ္ၚကသီု လီုလာ်မာန်ဒၟံၚ်ရဂှ် ဂွံတီကေတ် နူသၟာဗ္ၚတအ်ရ။
ဟိုတ်နူဗြဲဂူစှ်ေဒၟံၚ် အဆက်ဟွံပိုတ်သ္ကုတ်တုဲ ပ္ဍဲပွိုၚ်ဍုၚ်ကျာ်မြဟ်လေဝ် သ္ပတံနူ ဂိတုအဝ်ဂေတ် စၟတ်တ္ၚဲ (၇)တုဲ ဍာ်ဇၞော်ဒၟံၚ်ဂှ်ရ သြောံကသီု ၁၀,၀၀၀ ဨကပြၚ် ဗၠိုက်ဒၟံၚ်ဍာ်ရ။
တွဵုရးဍုၚ်မန်ဂှ် ဇၟာပ်ပ်သၞာံ ဒှ်တွဵုရးတဵုလွဳဒၟံၚ်သြောံကသီု ဨက (၆) ကိုတ်ပြၚ် မွဲတွဵုရးတုဲ ဍာ်ဇၞော်လဝ် ပ္ဍဲသၞာံ ၂၀၁၉ တုဲကၠုၚ်တေံဂှ် သြောံကသီု ဨက (၁) ကိုတ်ပြၚ် ဒးလီုဆောံလေၚ်လဝ်ရ။
ပြဟ်ဟ်ဏံ ဟိုတ်နူဗြဲဂူစှ်ေ အဆက်ဟွံပိုတ်သ္ကုတ် ဍာ်ဇၞော်ဒၟံၚ်တုဲ ဂၠံၚ်ကွဳစက် ဆက်စၠောံအကြာမွဲကဵုမွဲကွာန်လ္ၚဵုဂှ် ခရိုဟ်လီုစှ်ေလဝ်နွံတုဲ ဘာဗ္တောန်လိက် ဟွံအောန်နူ (၅၀) ဘာ ဒးကၟာတ်ဇူလဝ် မွဲချိုန်ခနရ။
ဟိုတ်နူဍာ်ဇၞော်တုဲ ညးဍုၚ်ကွာန်ဒးဘဲဒဏ်ဍာ် ၂၀,၀၀၀ ပြၚ်လေဝ် ဒးပြံၚ်ပဆုဲလဝ် ပ္ဍဲဘာဗ္တောန်လိက်၊ ဘာလကျာ် ကေုာံ ဗဒိုပ်ရီုဗၚ်ယာယဳတအ် နဒဒှ်ကာတၟေၚ်ရဂှ် ဂွံတီကေတ် နူဂကောံရီုဗၚ်ဟံၚ်ပြာ်မၞိဟ်တအ်ရ။
ပရိုၚ် -သြၚ်လောန်တိုၚ်(မ်)
ဗီုရုပ် -CJ
sanlontai