ပ္ဍဲကိုဝ်ရဳယျာ ဟိုတ်နူအန္တရာယ်လဗိုတ်ကျာတုဲ ဒးပဆုဲပြံၚ်လဝ် အထံက်ကၚ်ဂၠးကဝ် ပ္ဍဲဒၞာဲဗၠးဘဲ ဂၠိုၚ်ကဵုလ္ၚီ

သိုဝ် – အဝ်ဂေတ်(၉)

ညးပါလုပ်ဒၟံၚ် ပ္ဍဲပေါဲဆဵုဂဗ အထံက်ကၚ်ဂၠးကဝ် (World Scout Jamboree) ကၠောန်ဗဒှ်ဒၟံၚ် ပ္ဍဲဒိုဟ်နေရတိကၟိန်ဍုၚ် ကၠာဟွံစိုပ်အခိၚ်လဗိုတ်ကျာတိုၚ်ဖွောန် ပ္ဍဲဍုၚ်ကိုဝ်ရဳယျာသၠုၚ်ကျာဂှ် သ္ပတံနူဂိတုအဝ်ဂေတ် စၟတ်တ္ၚဲ (၇)တုဲ ပဆုဲပြံၚ်ကဵုလဝ် ပ္ဍဲဒၞာဲဗၠးဘဲရဂှ် ညးပိုၚ်ပြဳအဝဵုတအ် ဟီုသ္ဂးလဝ်ရ။

စပ်ကဵုဂကောံ ပရေၚ်ထတ်ယိုတ်ဟွံခိုဟ် က္တဵုဒှ်လဝ် ဟိုတ်နူလပှ်ကမ္တဴ ဂၠိုၚ်ကဵုကၠံ ဟိုတ်နူပရေၚ်တေၚ်ဗစိုပ်ဇရေၚ် မိမဂမၠိုၚ် ဂၠိုၚ်တိုန်ကၠုၚ်ဒၟံၚ်ဂှ်ရ ဂကောံထံက်ကၚ်အမေရိကာန် ကေုာံ ဗျိတိၚ်တအ် နုက်တိတ်အာတုဲဂှ် ခြာ (၁၀)တ္ၚဲ ပြံၚ်ပဆုဲဒၟံၚ် ပ္ဍဲဒၞာဲဗၠးဘဲရ။

“ပ္ဍဲပွိုၚ် (၁၀၀) သၞာံ တၚ်ကော်ချဴ ဂကောံထံက်ကၚ်ဂၠးကဝ် ဒးဆေၚ်လဝ်မုက် ဗီုဏံ အလန်ကိုပ်ကၠာအိုတ်ရ”ဂှ် ဓမံက်ထ္ၜးလဝ် ပ္ဍဲတၚ်လလောၚ်တြးညးအုပ်ကာနာနာ ဂကောံချဳဒရာၚ်အထံက်ကၚ်ဂၠးကဝ်ရ။

နူကဵုဒၞာဲဖျေံလဝ်ဗဒိုပ်ဂှ် သွက်ဂွံပဆုဲပြံၚ်အထံက်ကၚ် (၃၆၀၀၀)တၠ နူ (၁၅၀) ကၟိန်ဍုၚ်ပြၚ်ဂှ် ဒးသုၚ်စောဲလဝ် လၟိဟ်ကွဳစက်ဗေတ်သကာ (၁၀၀၀)ဖ္ဍိုက်ပြၚ် ရဂှ် ဂွံတီကေတ်ရ။

တိုၚ်ဖွောန်ခါနာန် သ္ပလဝ်ကဵုဍုၚ်ဂျပါန်သ္ကုတ်သၠုၚ်ကျာ လီုလာ်လဝ်ဂှ် ပ္ဍဲတ္ၚဲဗြဴဗတိတုဲကၠုၚ်တေံ ထပ်လုပ်ကၠုၚ် ပ္ဍဲကိုဝ်ရဳယျာသၠုၚ်ကျာမာန်ဒၟံၚ်ရဂှ် တၠပညာစမ်ၜတ်ဗြဲကျာတအ် ချိၚ်ခယျလဝ်ရ။

ဍုၚ်ဇၞော် (၈)ဍုၚ် ပါလုပ်သီုခရိုၚ်သိုဝ် ကေုာံ ခရိုၚ်ဂျောၚ်ဂျဳဂှ် ဟိုတ်နူဆက်နွံဒၟံၚ် ပ္ဍဲတွဵုရးသၟဝ်ကျာ ဂျအ်လာ မဒှ်ဒၞာဲအထံက်ကၚ်တအ် ဖျေံဒၞာဲ သှ်ေဒၟံၚ်ပ္ဍဲကိုဝ်ရဳယျာသၠုၚ်ကျာဂှ်ရ ညးပါလုပ် (၄၀၀၀)ကီု သီုအထံက်ကၚ်တအ်ဂှ် သွက်ဂွံဒုၚ်တဲကၠောန်ဗဒှ်အာ နွံဒၟံၚ်ရဂှ် ဓမံက်ထ္ၜးလဝ် ပ္ဍဲဌာန်ပရိုၚ် ယွောန်ဟာပ်ရ။

နညးပါလုပ်တအ် ဒးဂ္ဇအ်ဒၟံၚ် ပ္ဍဲဒၞာဲဇကုအပိုၚ် ဟွံသေၚ်မ္ဂး ပ္ဍဲဒၞာဲ ညးမွဲသ္အာၚ် ပါ်ပရအ်ကဵုလဝ်ရောၚ်ဂှ် ညးစဳဇန်ပေါဲတအ် ဟီုသ္ဂးလဝ်ရ။

သမ္မတကိုဝ်ရဳယာသၠုၚ်ကျာ ယွောန်ဆုခ်ယိုဝ်ဂှ်မ္ဂး ပရေၚ်ယောၚ်ယာဟၟဲမွဲသာ် သွက်ဂွံဓမံက်ရုပ်ရဴ အစဳဇန်လကြဴအိုတ်ဂှ် ကဵုလဝ်အမိၚ် ကုဂကောံပလန်တဲကာတၟေၚ် ပ္ဍဲဂိတုအဝ်ဂေတ် စၟတ်တ္ၚဲ (၇) ရဂှ် ရုၚ်သမ္မတ ဟီုသ္ဂးလဝ်ရ။

ပေါဲဆဵုဂဗအထံက်ကၚ်ဂှ် စဵုကဵုဂိတုအဝ်ဂေတ် စၟတ်တ္ၚဲ (၁၂) ကၠောန်ဗဒှ်အာ ဗွဲမလုပ်သၞောဝ်တုဲ ဝန်ဇၞော် ကဆံၚ်တြုံဗြဴတုပ်သၟဟ် ကေန်မ်ဟွောန်ဆုခ်ဂှ်မ္ဂး ပေါဲဏံ မွဲကရောံကဵုအစဳဇန်တၞဟ် ဆက်ကၠောန်ဗဒှ်အာ ပေါဲယှိုဝ် Kpop ရောၚ်ဂှ် ဟီုသ္ဂးလဝ်ခိုၚ်ၚ်ကၠိုက်က်ရ။

Ref,Reuters