ဗြဝတဳ၊ အဝ်ဂါတ် (၉)
ဟိုတ်နူဂၠံၚ်ဇၞော်ကူသာန်သွံရာန်ဗၞိက် သေံ−ဗၟာၜါဍုၚ် ဂၠံၚ်အာယှ ဗြဝတဳ−ကအ်ကြိက်ပိုတ်အာဂှ်တုဲ ညးဍုၚ်ကွာန်တံ ထပ်ဒးဒုၚ်စသိုၚ် ဘဲဒဏ်ၚုဟ်ဖျာက္ဍၚ်တံကဵု ကပေါတ်ဗၞိက်ပိုတ်အိုတ်တံမာန်ရောၚ်ဂှ် သၟာဗၞိက်ပယျဵုတံကဵု ညးစိုန်သ္ကီုတံ သ္ၚဳဂၠိပ်လဝ်ရ။
ပ္ဍဲကဵုတွဵုရးကရေၚ်ဂှ် တုဲကၠုၚ်ပ္ဍဲဂိတုအဝ်ဂါတ် (၇) တေံ ဟိုတ်နူဗြဲဂူလဝ် ဟွံပိုတ်သ္ကုတ်ဂှ်ရ ဂၠံၚ်ဇၞော်အာယှ ဗြဝတဳ−ကအ်ကြိက် မဒှ်ဒတန်ဂြိုဟ်ပရေၚ်ကူသာန်သွံရာန်၊ ဗ္ဒါဲဍာ်လဂေါဝ်တဝ်နဝ်ဂှ် ဟိုတ်နူတိသၟဝ်ဂၠံၚ်ကာ သရိုဟ်လာ်အာတုဲ ပရေၚ်အာကၠုၚ်တံ ပိုတ်သ္ကုတ်အာလဝ်ရ။
သ္အာၚ်နူဂှ်ပၠန် ပ္ဍဲကဵုဂၠံၚ်ကအ်ကြိက်−ဗြဝတဳ ဂၠံၚ်ဒဵုဒဝ်ဏ မၞိဟ်တီဂၠိုၚ်ဂၠံၚ်တြေံဂှ်လေဝ် တိလာ်တံ နွံဒၟံၚ်တုဲ ကွဳစက်ဖ္ဍိုက်ဗၞိက်တံ အာကၠုၚ်ဟွံဂွံဒှ်ဒၟံၚ်တုဲ ဂၠံၚ်(ထို့ကိုကိုး) ဂှ်လေဝ် ဟိုတ်နူဗြဲဂူတုဲ ဂၠံၚ်လီုတံ နွံဒၟံၚ်ဂှ်ရ သွက်ဂွံအာကၠုၚ်ဂှ် အခက်အခုဲတံ နွံဒၟံၚ်ရ။
သၟာဗၞိက်ပယျဵုမွဲတၠဂှ် ပ္ဍဲကဵုသ္ကုတ်ဂၠံၚ်ကူသာန်သွံရာန် သေံ−ဗၟာဂှ် သွက်ဂွံအာကၠုၚ်ဂှ် ဟိုတ်နူခက်ခုဲကၠုၚ်ဂှ်ရ ပရေၚ်ဗၞိက်ဂေတ်ဂြိပ်တံ ဒေါအ်ဒေၚ်အာပေၚ်ၚ်တုဲ ၚုဟ်ဗၞိက်ဖျာတံ သၠာ်တိုန်ကၠုၚ်လွာဲဂှ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ ဂၠံၚ်ဂှ် နွံဒၟံၚ် (၃)။ လၟုဟ်ဂှ် လီုဒၟံၚ်ဂှ် (၂)။ ဂၠံၚ်ဂြိုပ် ဂၠံၚ်တြေံတေံဂှ်လေဝ် အာဟွံဂွံပုဟ်။ ကွဳလိုန်ဓာတ်ရဂှ် အာဟွံဂွံပုဟ်။ ဂၠံၚ်လဵုမှ အာဟွံဂွံပုဟ်၊ ဂၠံၚ်(ထို့ကိုကိုး) မွဲဂၠံၚ်ရနွံ။ ဂၠံၚ် (ထို့ကိုကိုး) ဂှ်လေဝ် ဗြဲဂူမ္ဂး အာဟွံဂွံပုဟ်။ ဒှ်ဂၟက်ကၠေတ်ဒၟံၚ်တုဲ ဂၠံၚ်ဂှ်အာဂှ်အာဂွံဒၟံၚ်ရ။ ဆ္ဂး ဒှ်ဒဒိုက်ကွေံကွေံဟဂှ်ရ။ လၟုဟ်ဂှ် ပ္ဍဲကဵုသၟာဗၞိက်တံဂှ် ကပေါတ်ဂှ် သှ်ေဒၟံၚ်ဏီ။ ဆ္ဂး မဏံဂှ်ရ ပ္တိုန်ၚုဟ်ညိညတုဲ သွံအာညးသ္ကအ်ဏောၚ်။ ဗၞိက်ဂေတ်ဂြိပ်ဂှ်လဝ် အကာဲအရာဟွံခိုဟ်တုဲ အခိၚ်ဏံတှ်ေ ၚုဟ်ဂှ်တိုန်ယျ။ ညအ်ဂှ်ဓမ္မတာရဏောၚ်၊ မၞိဟ်ကပေါတ်ဗၞိက်နွံတံဂှ် ပ္တိုန်ၚုဟ်ဏောၚ်။ ဂၠံၚ်ဂှ်တှ်ေ ပၠောပ်ကပေါတ် ဟွံဂွံပုဟ်” သာ်ဝွံ သ္ဂးရ။
ဟိုတ်နူဂၠံၚ်ကူသာန်သွံရာန်ဗၞိက် ပိုတ်အာတုဲ ပရေၚ်ဗၞိက်ဂေတ်ဂြိပ်ၜါဍုၚ်ဂှ် ဒေါအ်ဒေၚ်အာဂှ်ရ ဗၞိက်လ္ၚဵုတံ ၚုဟ်သၠုၚ်တိုန်ကၠုၚ် ဂၠိုၚ်ကဵုဆတုဲ ကပေါတ်ဗၞိက်လ္ၚဵုတံဟီုမ္ဂး က္တဵုဒှ်ဒၟံၚ် စဵုကဵုအကာဲအရာပံက်ဖျာဟွံမာန်တံရ။
ပ္ဍဲကဵုဏံ ကၠေၚ်စတိတ်နူဍုၚ်သေံ မွဲစေဝ် ၁၀ ပသာဂှ် နူကဵု (၇၀၀၀၀) ဒ္ကေဝ်ပြၚ်ဂှ် ၚုဟ်သၠုၚ်တိုန်ကၠုၚ် စဵုကဵု (၈၀၀၀၀) ပြၚ်တုဲ ခၞံကြုက်(ခြောက်ဆွဲခြောက်) မွဲဖာဂှ် (၂၀၀၀၀) ဒ္ကေဝ်ပြၚ်၊ ကပေါတ်ဗၞိက်သှ်ေတံဂှ်လေဝ် တန်တဴကဵုဂကူအဇာတုဲ နူကဵု (၃၀၀၀) ဂှ် ၚုဟ်သၠာ်တိုန်ကၠုၚ် စဵုကဵု (၁၀၀၀၀) ဒ္ကေဝ်ပြၚ်ရ။
ညးသွံကပေါတ်ဗၞိက်သေံ ပရးမွဲဂှ် ဟိုတ်နူဂၠံၚ်အာယှပိုတ်တုဲ အပ္ဍဲဗွဝ်ဖျာ ၚုဟ်ကပေါတ်ဗၞိက်တံ သၠုၚ်တိုန်ကၠုၚ်ဂၠိုၚ်ကဵုဆဂှ်ရ သၟာဗၞိက်ဗွဲမဂၠိုၚ် ပ္တိုန်ၚုဟ်တုဲ သွံဒၟံၚ်တံ နွံဒၟံၚ်ဂှ် ဟီုရ။
“ ဂၠံၚ်ကာလီုအာတုဲ ပြဟ်ဟ်ဏံ ၚုဟ်ဖျာဂှ် သၠာ်တိုန်အာအိုတ်ရ။ ၚုဟ်စၟတ်လဝ်ချိုတ်တ်ပၠိုတ်တ်ဂှ် ဟွံမွဲပုဟ်။ ၚုဟ်ကာချိုတ်တ်ပၠိုတ်တ်ဂှ် ဟွံဂွံတီကေတ်တုဲ ၚုဟ်ကပေါတ်ဗၞိက်တံဂှ် ဗီုညးညးကော်ဒၟံၚ်အိုတ်ရ။ တန်တဴကဵုလ္တူၚုဟ်ကာတုဲ ၚုဟ်ဂှ်တိုန်တွဵုရဏောၚ်။ ကပေါတ်လ္ၚဵုတံဂှ် မွဲရဲဂှ်တိုန်အာ ၜိုတ် (၆၀၀၀) ။ ရဲသွံကောံကောံတံဂှ် ချိၚ်တုဲပ္တိုန်ဒၟံၚ်ၚုဟ်ဖျာတံဂှ်ရ ပိုယ်တံဂှ် ဗက်ကေတ်ညအ်တုဲ ဒးသွံဒၟံၚ်ရ။ ဆ္ဂး ၚုဟ်တ္ၚဲဏံ ဍာံဍာံဂှ် ဟွံဂွံတီကေတ်ဏီပုဟ်။ ကပေါတ်ဟွံကၠုၚ်တုဲ မၞိဟ်တံဂှ် ဗီုညးညးချိၚ်တုဲ သွံဒၟံၚ်အိုတ်ရ။ သွက်တ္ၚဲဏံဂှ် မုၚုဟ်ဟီုဂှ် ဟွံတီဏီပုဟ်။ စှ်ေကၠုၚ်နူတေံလေဝ် ဟွံဂွံပုဟ်ဟီုတှ်ေ မၞိဟ်နွံဒၟံၚ်အဏံဂှ် ချိၚ်တော်ကေတ်တုဲ ဗီုဇကုထေၚ်ဂှ် သွံဒၟံၚ်ညးသ္ကအ်အိုတ်ရ။ ကပေါတ်လ္ၚဵုတံတှ်ေ ဟိုတ်နူဟွံတီၚုဟ်တုဲ ဟွံဂွံသွံဟဂှ်ရ” သာ်ဝွံ သ္ဂးရ။
ကပေါတ်ဗၞိက်သေံဂမၠိုၚ်ဝွံ တန်တဴကဵုလ္တူအကာဲအရာ ပလေဝ်ပလေတ်ဂၠံၚ်ဍာန်တုဲဒှ်ဂှ်တုဲ ကပေါတ်ဗၞိက်လုပ်စိုပ် လအ်လမာန်တုဲ ယဝ်ရကပေါတ်ဗၞိက်လုပ်စိုပ်လအ်မ္ဂး အပ္ဍဲဒေသ ကပေါတ်ဗၞိက်သေံပိုတ်အိုတ်တံ နွံကၠုၚ်မာန်ရောၚ် ညးစိုန်သ္ကီုပရေၚ်ကူသာန်သွံရာန်ဗၞိက်ပယျဵုမွဲတၠ သ္ၚဳဂၠိပ်လဝ်ရ။
ပ္ဍဲဂိတုအဝ်ဂါတ် (၇) တုဲကၠုၚ်တေံ နူကဵုဌာနက္ဍိုက်ပ်ပရေၚ်သိုၚ်ခၞံတံ ကၠုၚ်စိုပ်ကျောဝ်ဏာ ဂၠံၚ်အာယှမပိုတ်ဒၟံၚ်ဂှ်ကီုလေဝ် ဒဵုကဵုအခိၚ်လၟုဟ် ကၠုၚ်စိုပ်ပလေဝ်ပလေတ်လဝ် ဟွံမွဲဏီတုဲ သွက်ဂွံထ္ပက်ဒဒန်ယာယဳရဂှ် ဒှ်ဒၟံၚ်အကာဲအရာခက်ခုဲဒၟံၚ်ရောၚ် ဂွံတီကေတ် အတိုၚ်ဂလာန်ညးအာတရဴတံရ။
ဍုၚ်သေံဝွံ နူကဵုဂၠံၚ်ဇၞော်အာယှ ဗြဝတဳ−ကအ်ကြိက်ဂှ် ပၠောပ်ပ္တိုန်ဒၟံၚ် အပ္ဍဲကဵုဍုၚ်ဗၟာ မပ္တံကဵုဗၞိက်ပယျေဝ်၊ ဂၠိက်ယာတ်၊ ဗၞိက်စၞစသုၚ်၊ ကပေါတ်အရပ်စပ်ပရေၚ်သိုၚ်ခၞံ ပါလုပ်သီုကဵုကပေါတ်စက်တံဂှ် အဓိကတုဲ နူကဵုဍုၚ်ဗၟာဏံဂှ်လေဝ် ပလံၚ်ပတိုန်သွံတြးဒၟံၚ် ပ္ဍဲကဵုဍုၚ်သေံတေံ မပ္တံကဵုသြောံဂန်၊ တၞောန်သ္ၚု ကေုာံ ကပေါတ်ဗၞိက်တိတ်နူဍာ်တံ အဓိကရ။
သေံ−ဗၟာ ၜါဍုၚ်ဝွံ အပ္ဍဲသၞာံဘဏ္ဍာ ၂၀၂၂−၂၀၂၃ ဂှ် နူကဵုပရေၚ်ကူသာန်သွံရာန်ၜါဍုၚ်ဂှ် ဂွံသၠာဲဂတးလဝ်ဗၞိက် ဒဝ်ဠာအမေရိကာန် ဗ္ဒါဲ ၆၀၀၀ ပြကောဋိကိုဋ်ဂှ် ဂွံတီကေတ် အတိုၚ်တၚ်လလောၚ်တြး ဌာနက္ဍိုက်ပ်သၠာဲဂတးဗၞိက် ကံၚ်ဇြဳပၞာန်ရ။
ပရိုၚ်−သြၚ်လောန်တိုၚ်(မ်)
ဗီု−CJ
sanlontai