ဒၟါနူ EAO ကဵု PDF တံတုဲ ကၟိန်ဍုၚ်ဝွံ ဒးဂိဇီုကပိုက်ဒၟံၚ်ရောၚ် က္ဍိုပ်သ္ကိုပ်ပၞာန် စောဲစပ်

နေဗျဳဒဝ်၊ အဝ်ဂါတ် (၉)

ဒၟါနူပြဝ ဂကောံရပ်လွဟ်ကောန်ဍုၚ်အရၚ် EAO လ္ၚဵုတံကဵု ဂကောံဒပ်စဵုဒၞါညးဍုၚ်ကွာန် PDF တံတုဲ က္တဵုဒှ်ဒၟံၚ်ပရေၚ်ဒးဂိဇီုကပိုက် သွက်အနာဂတ်ကၟိန်ဍုၚ်တံရောၚ်ဂှ် က္ဍိုပ်သ္ကိုပ်ပၞာန်သီအဝဵု စောဲစပ်လဝ်ရ။

က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် သ္ပပဓာန်ကဵုလွဟ်လက်နက်တုဲ မသီကေတ်လဝ်အဝဵုကၟိန်ဍုၚ်ဂှ် ကြဴနူထပ်ကေတ်လဝ်အာယုက်ကာလကာတၟေၚ်တုဲ ပ္ဍဲကဵုကောံဓရီု မကၠောန်ဗဒှ်လဝ် ပ္ဍဲဂိတုအဝ်ဂါတ် (၇) နကဵုကောန်ဂကောံကံၚ်ဇြဳပၞာန် မကလေၚ်ဒက်ပ္တန်လဝ်တၟိတံဂှ် ဟီုဂးလဝ်ရ။

က္ဍိုပ်သ္ကိုပ်ပၞာန်ဂှ် နကဵု EAO လ္ၚဵုတံ ဒ္ဂေတ်ဗက်တၚ်တုပ်စိုတ် NCA ဟွံမွဲမွဲသာ် ဟိုတ်နူပါလုပ်ဒၟံၚ် ပ္ဍဲကဵုပြဝပကီုပရာပ်တံဂှ်တုဲ ပြဝပကီုပရာပ် ဂကောံ PDF တံလေဝ် သာတုဲပရေံကၠုၚ်ဂှ်ရ ပ္ဍဲအရာရေၚ်တၠုၚ် ပရေၚ်ဖောအ်ဗြေဝ်တောတက် ကေုာံ ပရေၚ်သၞောဝ်ဥပဒေအုပ်လဒံ၊ ပရေၚ်ညိၚ်ဝတ် ပ္ဍဲကဵုဒေသလ္ၚဵုတံဂှ် သ္ကဵုလဇုဲလဇတဴတံ နွံလဝ်ရောၚ် သ္ဂးရ။

ကောန်သ္ဂံၚ် သလိုၚ်ယဝ်အံၚ် မဒှ်ကမ္မတဳကေၚ်ကာဗဟဵု ဒပ်ပၠတရဴဒဳမဝ်ကရေတ်တေတ်ကွးဘာ အလုံဍုၚ်ဗၟာ (ABSDF) ဂှ် ရံၚ်ကဵုအကာဲအရာဲပကတိမ္ဂး ဂလာန်က္ဍိုပ်သ္ကိုပ်ပၞာန်ဂှ်ဝွံ ဒှ်လဟီုဟွံမွဲကဵုဓဝ်စၚ်ခြၚ်ဗ္စာရဏာတံရောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“ ပွမဟီုဂးတဴသာ်ဏံဂှ်ဝွံ သွက်ညးမွဲမှ ဖဵုဟွံမွဲတုဲ ကဵုပြသၞာဇၞော်သၠဲတိုန်ရောၚ်ဂှ် ညာတ်ရ။ အလဵုညးဍုၚ်ကွာန်တံဂှ် ဒစဵုဒစးပၠန်ဂတးဒၟံၚ် ဒပ်ပၞာန်ရ။ ညအ်ဂှ် မုထ္ၜးဒၟံၚ်ရောဟီုမ္ဂး ဒဒှ်ရဟွံဒုၚ်တဲ ပြဝဒပ်ပၞာန်တံပုဟ်ဂှ် ထ္ၜးဒၟံၚ်ရ။ ညအ်ဂှ် ဟွံဒုၚ်တဲမွဲသာ် ဒှ်ဒၟံၚ်ဒၟါနူဂကောံပၠန်ဂတးရပ်လွဟ် နူကဵုဂကောံဇြဟတ်ကောန်ဍုၚ်အရၚ်ပိုယ်တံရောၚ် ဟီုဒၟံၚ်ဂှ်ဝွံ ဒှ်ဂလာန်ဟွံမွဲကဵုဓဝ်ဗ္စာရဏာရောၚ်ဂှ် မိက်ဂွံဟီုရ” သာ်ဝွံ ညးသ္ဂးရ။

သ္အာၚ်နူဂှ်ပၠန် လ္ဂောံကဵုသဘဴဓဝ်မ္ဂးလေဝ် သွက်ဂွံထ္ၜး ဒဒှ်ရဇကုဒုဟ်ဟွံမွဲဂှ်တုဲ ဒှ်ဒၟံၚ်အကာဲအရာ ပ္တိုန်ဒၟံၚ်ဒုဟ် ကုမွဲလ္ပာ်တေံဂှ်တုဲ ပြသၞာပရေၚ်ဍုၚ်ကွာန် မက္တဵုဒှ်ဒၟံၚ် ပ္ဍဲကဵုဍုၚ်ဗၟာလၟုဟ်ဏံဂှ် စကၠုၚ်နူလဵုရောဟီုဂှ် ဂကောံဇြဟတ်ဍုၚ်သ္အာၚ်တံ တီဒၟံၚ်ရောၚ် ကောန်သ္ဂံၚ်သလိုၚ်ယဝ်အံၚ် ကလေၚ်ခၠေဝ်လဝ်ရ။

က္ဍိုပ်သ္ကိုပ်ပၞာန်ဂှ် ဟိုတ်နူပြဝဂကောံ PDF တံကဵု ဂကောံ EAO လ္ၚဵုတံတုဲ ပ္ဍဲကဵုဒေသကောန်ဍုၚ်အရၚ်တံဂှ် သ္ကဵုဇီုကပိုက်တဴ ပရေၚ်ဖောအ်ဗြေဝ်ဒေသ ကေုာံ ပရေၚ်ညိၚ်ဝတ်တံသၟးဟွံက အခေါၚ်ကတ်ဗ္တောန်ပညာ ကွးဘာ အယဲမံၚ်ဘာတံလေဝ် ဒးဆောံလေၚ်ဒၟံၚ်ရောၚ်ဂှ် သ္ဂးရ။

သ္အာၚ်နူဂှ်ပၠန် အခေါၚ်အရာကမၠောန်ကၟိတ် ညးဍုၚ်ကွာန်ဒေသတံ ဒၟါနူဆောံလေၚ်တုဲ အာဇီုကပိုက်ကဵု ဘဝပိုန်ဒြပ်ပရေၚ်မၞိဟ်တံတုဲ နကဵုဇကုတံလေဝ် ဒးရေၚ်တၠုၚ်အာ ပရေၚ်ညိၚ်ဝတ် ကေုာံ ပရေၚ်သၞောဝ်အုပ်လဒံတံ ဟွံဒေါအ်ဟွံဂွံရောၚ်ဂှ် ဖ္တိုက်ဖ္အောဝ်လဝ် ကောန်ဂကောံကံၚ်ဇြဳတံရ။

ညးဒုၚ်တာလျိုၚ် ဂကောံဒပ်စဵုဒၞါညးဍုၚ်ကွာန် ခရိုၚ်သဓီု ကိုဝ်ဨမေန်ထောန်ဂှ်လေဝ် ရံၚ်ကဵုအကာဲအရာဗလးတိမ္ဂး ညးဍုၚ်ကွာန်တံ တီအိုတ်ဂှ်ရ ယဝ်ရဟွံသီထောံအဝဵုမ္ဂး ဍုၚ်ကွာန်လေဝ် သ္ဇက်ဂွံလီုလာ်အာဇဳဒိုဟ် ဟွံမွဲပုဟ်ဂှ် ကလေၚ်ခၠေဝ်လဝ်ရ။

“အကာဲအရာဗလးတိဏံဂှ်လေဝ် ညးဍုၚ်ကွာန်တံ တီအိုတ်ရဏောၚ်။ ရဲစံၚ်ဒၟံၚ်ကွာန်တံဂှ် ညးဂှ်ရော ကံၚ်ဇြဳပၞာန်တံရဏောၚ်။ တုဲပၠန် စံၚ်ဒၟံၚ်ဍုၚ်တံဂှ် ညးဂှ်ရော။ ကံၚ်ဇြဳပၞာန်ရဏောၚ် စံၚ်ဒၟံၚ်။ ကၠတ်ဂၠံက်ဒၟံၚ် သီုကဵုပိုန်ဒြပ်အရပ်ရာညးဍုၚ်ကွာန်တံဏောၚ်။ ဟိုတ်ဟွံမွဲမွဲသာ် ပန်ပှော်ဒၟံၚ်လွဟ်ဇၞော် ပ္ဍဲကဵုကွာန်တံတုဲ ညးဍုၚ်ကွာန်တံဂွံဘဲ ကလိဂွံဝပ် ချိုတ်တုဲ သ္ၚိတံလေဝ် လီုလာ်အိုတ်။ အရာတံဏံသီုဖအိုတ်ဂှ်လေဝ် ဍေံတံရကၠောန်ဒၟံၚ်ဏောၚ်။ ဂကောံပၠန်ဂတးလဵုမှ ဂကောံရပ်လွဟ်ကောန်ဍုၚ်အရၚ်လဵုမှ ကၠောန်ဒၟံၚ်ဟွံသေၚ်ပုဟ်။ သရောပ်ထောံမ္ဂး ယဝ်ရမေန်အံၚ်လှာၚ် ကေုာံ ကောန်ရဲတဝ်ခွာဍေံတံ ဟွံသီထောံအဝဵု သွက်ဒတုဲဖဵုဍေံမ္ဂး အကာဲအရာကၟိန်ဍုၚ်လေဝ် သ္ဇက်ဂွံဒးလီုလာ်အာဇဳဒိုဟ်ဂှ် ဟွံမွဲပုဟ်။ တုဲပၠန် PDF ပိုယ်တံ ဂကောံပၠန်ဂတးတၞဟ်သ္အာၚ်တံလေဝ် သ္ဇက်ဂွံမံက်ဂတဝ်ကၠုၚ် ဟွံမွဲပုဟ်” ဂှ် သ္ဂးရ။

ကြဴနူဒပ်ပၞာန်သီအဝဵုတုဲ ပ္ဍဲကဵုသွာၚ်ပရေၚ်ဍုၚ်ကွာန်၊ ပရေၚ်ပိုန်ဒြပ်၊ ပရေၚ်ပညာ၊ ပရေၚ်ထတ်ယုက်တံဒှ်တမ် နူကဵုကဏ္ဍနာနာ လီုလာ်ဆောတ်ယောၚ်စှ်ေကၠုၚ်ဒၟံၚ်တုဲ ၚုဟ်ဗၞိက်ဖျာသ္ဇိုၚ် သၠုၚ်တိုန်ဒၟံၚ်သိုက်က်ဂှ်လေဝ် အာဇီုကပိုက်ဒၟံၚ် ကုကဆံၚ်မၞိဟ်သ္ဇိုၚ်တံ နကဵုအသိၚ်သ္ကာတ်တ်ရ။

သ္အာၚ်နူဂှ်ပၠန် ပြသၞာကမၠောန်ကၟိတ်ဟွံမွဲ မဒှ်ဖဵုအဆက်လက္ကရဴယဲကပ်ကဝ်ဝေဒ်ဂှ်ကဵု ပရေၚ်ပၞာန်သီအဝဵုဂှ်လေဝ် ထပ်သၠုၚ်တိုန်ကၠုၚ်လဝ်တုဲ ညးမအာကၠောန်စကမၠောန် ဟွံဗဗွဲကဵုသၞောဝ် ပ္ဍဲကဵုဍုၚ်သ္အာၚ်တံဂှ်လေဝ် သၠုၚ်တိုန်ကၠုၚ်ဒၟံၚ်ရ။

မွဲလ္ပာ်ပၠန်ဂှ်လေဝ် အလုံဍုၚ်မွဲပြးဇး ဟိုတ်နူဟွံဒုၚ်တဲကဵု ပရေၚ်ပၞာန်သီအဝဵုဂှ်တုဲ ဂကောံပၠန်ဂတးရပ်လွဟ် မပၠန်ဂတးဒၟံၚ်တံဂှ်လေဝ် မံက်ဂတဝ်ကၠုၚ် ဟွံအောန်နူကဵု ၅၀၀ ဂကောံတုဲ လုပ်ဒၟံၚ်ပေါဲဗ္တိုက် သွက်တၠအဝဵုပၞာန် ဂွံပြဟ်ဒတုံစှ်ေအာရ။

အတိုၚ်တၚ်နၚ် ဂကောံသုတေသန မဗၠးၜးတံဂှ်မ္ဂး အပ္ဍဲကာလသီအဝဵုပွိုၚ်ၜါသၞာံပြၚ်ဏံ ဟိုတ်နူကောန်ရဲတဝ်ခွာဒပ်ပၞာန်တံတုဲ ညးချဳဒရာၚ်ပရေၚ်ဒဳမဝ်ကရေဇြဳတံကဵု ညးဍုၚ်ကွာန် (၃၈၀၀) ပြၚ် ဒးဒုၚ်ဂစိုတ်ဂယိုၚ်လဝ်တုဲ စမြိုၚ်သ္ၚိဒၟံၚ်အပံၚ် (၈၁၀၀၀) ပြၚ် ဒးဒုၚ်စံၚ်ပလီုပလာ်လဝ်ရ။

ပရိုၚ်−သြၚ်လောန်တိုၚ်(မ်)

ဗီု−MOI