ကောန်ၚာ်သၟတ် နူကဵုအာယှသၠုၚ်ကျာ ပန်ဂအုံပိဂအုံ ဒးဒုၚ်စသိုၚ်ဒၟံၚ် ဘဲဒဏ်ဂမ္တဴပရေံအိုတ်ဂှ် UNICEF ဟီု

နျူဒေလဳ၊ အဝ်ဂါတ် (၉)

ဒၟါနူဖဵုအဆက်ရာသဳဥတုပြံၚ်လှာဲတုဲ ကောန်ၚာ်သၟတ် အာယှသၠုၚ်ကျာ ပန်ဂအုံပိဂအုံ ဒးဆေၚ်ဒၟံၚ်မုက် ကုဗ္ၜတ်ဂမ္တဴအန္တရာယ်ဇၞော်တုဲ ဂမ္တဴသၠုၚ်အိုတ်လ္တူဂၠးတိဏံဂှ်ရ။

ပ္ဍဲကဵုတၚ်လလောၚ်တြး UNICEF တ္ၚဲအၚာဂှ် ကောန်ၚာ်သၟတ်ဗၞတ် (၄၆၀) ပြကောဋိကိုဋ် ပ္ဍဲကဵုအာယှသၠုၚ်ကျာဂှ် ဒးဆေၚ်ဒၟံၚ်မုက် ကုဗ္ၜတ်ဂမ္တဴသၠုၚ်အိုတ်တုဲ ယဝ်ရၜတ်ကၞာတ်ကဵု ကောန်ၚာ်သၟတ်အလုံဂၠးမွဲမ္ဂး နွံတဴ ၇၆ တၟံကၠံဂှ် ဂွံတီကေတ်ရ။

“ ဂၠးတိက္တဴကၠုၚ်ဗက် လမျီုကောန်ၚာ်သၟတ်မၞုံအာယှသၠုၚ်ကျာ ဂၠိုၚ်ကဵုပြကောဋိကိုဋ် ကေုာံ ပရေၚ်ဂျိုၚ်တဴတံဂှ် လပှ်ဂမ္တဴတံ၊ ဗ္ၜတ်ဂမ္တဴသၠုၚ်ၚ်တံဏံ ဘပဠဒၟံၚ်ဇၞော်ကဵုဇြဟတ်ရ” သာ်ဝွံ ဒါရိုက်တာ ဒေသန္တရ UNICEF အာယှသၠုၚ်ကျာ ဟီုဂးလဝ်ရ။

ဟိုတ်နူဖဵုအဆက် ရာသဳဥတုပြံၚ်လှာဲတံဂှ်တုဲ ကၟိန်ဍုၚ်အာဖကာန်နေဿတာန်၊ ဗေန်ဂလာဒေတ်ယှ်၊ အိန္ဒိယ၊ မဝ်ဒိုက် ကေုာံ ပါကေဿတာန်တံဝွံ ဒးဆေၚ်ဒၟံၚ်မုက် ကုဗ္ၜတ်ဂမ္တဴသၠုၚ်အိုတ် ပရေံအိုတ်တံဂှ်တုဲ အပ္ဍဲပွိုၚ်မွဲသၞာံ ပွိုၚ် ၈၃ တ္ၚဲ ဟွံသေၚ်မ္ဂး လ္တူနူ ၈၃ တ္ၚဲဂှ် ဒးဒုၚ်စသိုၚ်အာ ဗ္ၜတ်ဂမ္တဴ စဵုကဵု ၃၅ ဒဳဂရဳနွံဏောၚ်ဂှ် UNICEF ကဵုလဝ်သတိရ။

ကောန်ၚာ်သၟတ်တံဝွံ တော်ကဵုမၞိဟ်အယဲစိုပ်တုဲ ထတ်ယုက်ဒၟံၚ်တံဂှ်မ္ဂး ပြံၚ်လှာဲမံၚ်တန်တဴ ဗွဲမဗဗွဲကဵု ဗ္ၜတ်ဂမ္တဴ မပြံၚ်လှာဲဒၟံၚ်တံ ဟွံမာန်ပုဟ်ဂှ် ဂွံတီကေတ်ရ။ ၜိုန်ရဒးဒုၚ်စသိုၚ်ဒၟံၚ် ဗ္ၜတ်ဂမ္တဴသၠုၚ်အိုတ်သာ်ဏံကီုလေဝ် နကဵုဍေံတံ သ္ဂောံဆုဲပြံၚ်မံၚ်တန်တဴဂှ်လေဝ် ဒှ်ဟွံမာန်ရ။

ဒါရိုက်တာ အာယှသၠုၚ်ကျာ UNICEF ဂှ် “ပ္ဍဲကဵုကောန်ၚာ်သၟတ်တံ ဂွံရပ်စပ်ဗ္ၜတ်ဂမ္တဴတံမာန်ဂှ် ဟွံလောဲပုဟ်။ ရေၚ်တၠုၚ်လဝ်အခိၚ်လၟုဟ်ရဂှ် ကောန်ၚာ်သၟတ်တံဝွံ ပ္ဍဲကဵုသၞာံကၠုၚ်စိုပ်တံဏံ သွက်ဂွံဆေၚ်မုက် ကုဗ္ၜတ်ဂမ္တဴ သ္ကာတ်မြဟ်တံမာန်ဂှ် ဒးလွဳအာဇြဟတ်ဒုၚ်အဍေဝ်အဍာမာန်တံဂှ်ဏောၚ်” ဂှ် ကဵုလဝ်သတိရ။

ကြဴနူသၞာံ ၁၈၀၀ တုဲ ဂၠးတိဂမ္တဴ မက္တဵုဒှ်ကၠုၚ် ဟိုတ်နူဇြတၟံတူဂှ် လ္တူနူကဵုဓမ္မတာဂှ် ဗ္ၜတ်ဂမ္တဴသၠုၚ်တိုန်ကၠုၚ် ၁ ဒဿမ ၂ ဒဳဂရဳဇြေန်ဒဳဂြုက်မာန်တုဲ လၟေၚ်ဒဒှ်ရာသဳဥတု မက္တဵုဒှ်ညံၚ်ရဴလဗိုတ်ကျာတံ၊ ဍာ်ဇၞော်ဍာ်ကလိုပ်တံဂှ်လေဝ် သ္ကဵုသ္ကာတ်မြဟ်ကၠုၚ်ရ။

ဂိတုဂျူလာၚ် သၞာံ ၂၀၂၃ ဝွံ ပ္ဍဲကဵုဒေသဥရဝ်ပ၊ အာယှ ကေုာံ ဒေသအမေရိကသၟဝ်ကျာတံဂှ် ဗ္ၜတ်ဂမ္တဴတံ သာတုဲသ္ကာတ်မြဟ်ကၠုၚ်တုဲ စၟတ်သမ္တီလဝ် နဒဒှ်ဂိတုဂမ္တဴသ္ကာတ်အိုတ် မသကဵုဇီုကပိုက်တဴ မၞိဟ်ဂၠိုၚ်ကဵုပြကောဋိကိုဋ်ရ။

ပရေၚ်ဒဒှ်သာ်ဏံ အနာဂတ်ဂတဏံ ညံၚ်ဂွိုအ်ဒှ်ထပ်က္တဵုဒှ်ဂှ် အပ္ဍဲပွိုၚ်စှ်သၞာံဏံ ဒးထပိုတ်အာ ပရေၚ်ကျာကာဗောန်ကၠိခ္ဍက်တံ တီတီဏောၚ်ဂှ် တၠပညာသိပ္ပံတံ ကဵုလဝ်ကသပ် ဟီုဂးလဝ်ရ။

Ref: AFP