ညးဒေသပညေတ် မဒးဒုၚ်ရပ်လဝ် (၁၀) တၠ ဟွံဂွံအဆက်တုဲ ကၠေံဒၟံၚ်

လံၚ်လုၚ်၊ အဝ်ဂါတ် (၁၀)

ပ္ဍဲရးဒေသဇၞော်တၞၚ်သဳ ညးဒေသနူကဵုကွာန်ပညေတ်၊ ပွိုၚ်ဍုၚ်လံၚ်လုၚ် (၁၀) တၠ မအာလွဳယဲ ပ္ဍဲကဵုထဝါဲဂှ် ဒးဒုၚ်ရပ်တုဲ လအ်ဂွံစဵုကဵု (၆) တ္ၚဲဂှ် ဟွံဂွံအဆက်တုဲ ကၠေံဒၟံၚ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ကောန်ကွာန်ပညေတ် ဥူမျေတ် ကေုာံ ပါလုပ်သီုကဵုကောန်ဇာတ်ညး ညးဒေသ (၁၀) တၠဂှ်ဝွံ တုဲကၠုၚ်ပ္ဍဲဂိတုအဝ်ဂါတ် (၄) တေံ နူကဵုကွာန်ပညေတ် အခိၚ်အာလွဳယဲ လ္တူဍုၚ်ထဝါဲဂှ် ဒးဒုၚ်ရပ်လဝ်ကဵု ဒပ်ကံၚ်ဇြဳပၞာန်တံရ။

ပ္ဍဲကဵုညးဒးဒုၚ်ရပ်တံဂှ် ဥူမျေတ်၊ သမ္ဘာညး ဒဝ်ပိုဝ်တာန်၊ ကောန်ခမာန်ညး ကိုဝ်ကျဝ်သာန်၊ ကောန်ခအှ်ညး မတာန်န်ဨ၊ ကောန်ကၟိန် မဌေဌေ၊ ရဲကွာန်ဂှ် ဥူအံၚ်ဖေတာန် ကေုာံ သမ္ဘာညး ဒဝ်မူဨ၊ ကောန်ဝုတ်ညး မရာ ကေုာံ သၟာဒဳကွဳစက် ဥူယျေန်ကျဳ၊ သ္ကအ်ညး မဨဨသေအ်တံ ၁၀ တၠ ပါလုပ်လဝ်ဂှ် ဂွံတီကေတ်ရ။

ညးတံ (၁၀) တၠဝွံ စဵုကဵုဂိတုအဝ်ဂါတ် (၉) ဂှ် ကလေၚ်စိုပ်ကၠုၚ်ကွာန် ဟွံမွဲဏီတုဲ ကောန်ဂြောဝ်ဂတာညးတံ ဆက်စၠောံဂှ်လေဝ် ဟွံဂွံအဆက်တုဲ ကၠေံဒၟံၚ်ရောၚ်ဂှ် ညးဒေသမွဲတၠ ဟီုရ။

ညးဒေသ (၁၀) တၠ ပါလုပ်သီုကဵုဥူမျေတ်ဂှ် ဒပ်ကံၚ်ဇြဳပၞာန်တံ ရပ်ဒက်လဝ် နကဵုတၚ်စောတ်စောဲ ဒဒှ်ရထံက်ဂလာန်ကဵုဇြဟတ် ကုကောန်ဒပ်စဵုဒၞါညးဍုၚ်ကွာန် PDF တံ ဒှ်မာန်တုဲ ဟိုတ်နူဟွံဂွံအဆက်ဂှ်ရ ဒးဂွိၚ်ဒၟံၚ် ကုအန္တရာယ်လမျီုညးတံရောၚ်ဂှ် သ္ဂးအိုတ်ရ။

ပ္ဍဲဂိတုတုဲကၠုၚ်တေံဂှ်လေဝ် ဒပ်ကံၚ်ဇြဳပၞာန် လုပ်စိုပ်ကွာန်ပညေတ်တုဲ အဃောထ္ပက်ဒၟံၚ်ကရောၚ်ပၞာန်ဂှ် စံၚ်ပလီုပလာ်ဏာသ္ၚိဒၟံၚ် မၞုံအပ္ဍဲကွာန်တံဂှ် သ္ၚိဒၟံၚ်ဥူမျေတ်တံလေဝ် ပါအာ ပ္ဍဲကဵုပၟတ်ဂှ်ကီုဂှ် ဂွံတီကေတ် အတိုၚ်ဂလာန်ညးဒေသတံရ။

ပ္ဍဲကဵုရးတၞၚ်သဳဂှ် အပ္ဍဲဂိတုဂျူလာၚ်ပွိုၚ်မွဲဂိတုတုဲကၠုၚ်တေံ ကံၚ်ဇြဳပၞာန်ဝွံ ထ္ၜးဟိုတ်နာနာသာ်တုဲ ရပ်ဒက်လဝ် ညးဍုၚ်ကွာန်ကောန်အရာပ် ၁၀၀ ပြၚ်ဂှ် ဂကောံသုတေသန အပ္ဍဲဒေသတံ လလောၚ်ပ္တိတ်လဝ်ရ။

ပရိုၚ်−သြၚ်လောန်တိုၚ်(မ်)

ဗီု−Social Media