ရေဝ်၊ အဝ်ဂါတ် (၁၀)
အပ္ဍဲပရေၚ်ပန်ပှော် မက္တဵုဒှ်လဝ် ပ္ဍဲဆေၚ်ဍာ်လက်ဖက်ဥူချေတ်ဇြိုဲ ကွာန်အစေန်၊ ပွိုၚ်ဍုၚ်ရေဝ်၊ တွဵုရးဍုၚ်မန် ပ္ဍဲကဵုဂိတုအဝ်ဂါတ် (၉) အခိၚ်နူဂယး (၈) နာဍဳဂှ် ပါလုပ်သီုကဵုက္ဍိုပ်သ္ၚိကၠံဂှ် (၂) တၠ ချိုတ်တုဲ (၃) တၠ ဂွံလဝ်ဝပ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲကဵုဆေၚ်ဍာ်လက်ဖက်ဥူချေတ်ဇြိုဲဂှ် အခိၚ်ကောန်ဂကောံအုပ်ဓုပ်ကွာန်အစေန် ကေုာံ ဂကောံပၞာန်ညးဍုၚ်ကွာန်တံ နွံဒၟံၚ်ဂှ် သၟာသေနာတ် (၂) တၠ ကၠုၚ်ကဵုသေနာတ်တုဲ ပန်ပှော်ဏာလဝ် ဗ္ဒါဲ ၂၀ လစုတ်ရ။
ဟိုတ်နူပရေၚ်ပန်ပှော်ကဵုသေနာတ်ဂှ်တုဲ က္ဍိုပ်သ္ၚိကၠံ ဥူယေန်ဝေ အာယုက် ၆၇ သၞာံကဵု ဥူအံၚ်တုၚ် အာယုက် ၆၂ သၞာံတံ ညး ၂ တၠ ဒးမကမ်ချိုတ်အာလဝ် ပ္ဍဲကဵုဒၞါဲဒှ်ပရူဂှ်ရ။
အပ္ဍဲပရေၚ်ပန်ပှော်ဏံဂှ် ကောန်ဂကောံပၞာန်ညးဍုၚ်ကွာန် ကိုဝ်ဝေန်ထိုက် မက္တဵုဂြိပ်အာ နူကဵုဆေၚ်ဍာ်လက်ဖက်ဂှ်ကဵု ညးဒေသ ကိုဝ်မျဵုထောန်၊ ကိုဝ်လာတ်တံ (၃) တၠ ဒးမကမ် ကလိဂွံလဝ်ဝပ်နာနာတုဲ ဒှ်ဒၟံၚ်အကာဲအရာ ဒးဂွိၚ်ဒၟံၚ် ကုအန္တရာယ်လမျီုရောၚ်ဂှ် ညးဒေသမွဲတၠ ဟီုရ။
မၞိဟ်ဒးမကမ်ကလိဂွံလဝ်ဝပ်တံဂှ် ပလံၚ်ဗစိုပ်လဝ်ကဵု ရုၚ်ဂဥုဲညးဍုၚ်ကွာန်ပွိုၚ်ဍုၚ်ရေဝ်တုဲ ပ္ဍဲကဵုဏံ မွဲတၠ ထပ်ချိုတ်အာ ပ္ဍဲရုၚ်ဂဥုဲဂှ် ဂွံမိၚ်ကေတ်ကီုလေဝ် နကဵုသြၚ်လောန်တိုၚ်(မ်) သ္ပဒတန်တၞဟ်ခြာဟွံမာန်ဏီရ။
ဂကောံလဵု ကၠောန်လဝ် ပရေၚ်ပန်ပှော်ဏံရောဟီုဂှ် ဒဵုကဵုအခိၚ်လၟုဟ် လလောၚ်ပ္တိတ်လဝ်မွဲမွဲသာ်ဂှ် ဟွံဂွံဆဵုကေတ်ဏီတုဲ ကြဴနူပရေၚ်ပန်ပှော်တုဲဂှ် ဒပ်ကံၚ်ဇြဳပၞာန် ကၠုၚ်စိုပ်စၟဳတ်ဒၟံၚ် ကွာန်အစေန်တံနွံဂှ် ဂွံတီကေတ်ရ။
တုဲကၠုၚ် ပ္ဍဲဂိတုဨပရဴ (၁၁) တေံဂှ်လေဝ် ရုၚ်သ္ကိုပ်အုပ်ဓုပ် ကွာန်ပါၚ်ၜဳ ပွိုၚ်ဍုၚ်ရေဝ် ဒးဒုၚ်ဗ္တိုက်တုဲ ပၞာန်ညးဍုၚ်ကွာန် ၂ တၠ ကေုာံ ညးသၟတ်ကောန်အရာပ် ၁ တၠ ချိုတ်အာလဝ်ရ။
ပွိုၚ်ဍုၚ်ရေဝ် မလလောၚ်တြးလဝ် ပရေၚ်အုပ်ဓုပ်ပၞာန်ဂှ်ဝွံ ဒှ်ဒေသ ဂကောံဇြဟတ်ပၠန်ဂတးတံ ဇြဟတ်ခိုဟ်မွဲတုဲ ဒပ်ကံၚ်ဇြဳပၞာန်ကဵု ရုၚ်ဌာနမဆေၚ်စပ်တံ ဒးဒုၚ်ဗ္တိုက်ဒၟံၚ် မွဲဏှမွဲဏှဂှ်ရ လ္ပာ်ကံၚ်ဇြဳပၞာန် ဒးပတေၚ်ဂြတ်လဝ် ပရေၚ်ဂီုကၠီုရ။
ပရိုၚ်−သြၚ်လောန်တိုၚ်(မ်)
ဗီု−Social Media
sanlontai