KNLA ကဵုသတိ ညးယိုက်ဝန်ကံၚ်ဇြဳပၞာန် ပ္ဍဲခရိုၚ်ဘာပန် အလန်လကြဴအိုတ်

ဘာပန်၊ အဝ်ဂေတ်(၁၀)

ညးယိုက်ဝန်ဌာနမဆေၚ်စပ်ကီု သီုသ္ကိုပ်ပရေၚ်အုပ်ဓုပ်ကံၚ်ဇြဳပၞာန် သှ်ေၜက်နွံဒၟံၚ် ပ္ဍဲခရိုၚ် ဘာပန် KNU တအ်ဂှ် သွက်ဂွံနုက်တိတ် နူတာလျိုၚ်ဌာနန္တရဂှ် ရုပ်ဂအုပ်ပၞာန် ဌာန်ဂအုပ်ပၞာန် ဒပ်မဟာ (၅) ဒပ်ပၞာန်ဗၠးၜကောန်ဂကူကရေၚ် KNLA လလောၚ်တြးလဝ် နကဵုစၟတ်တ္ၚဲ (၈) ဂိတုအဝ်ဂေတ်ရ။

ပရေၚ်ပၞာန် ကေုာံ ပရေၚ်အုပ်ဓုပ် ကံၚ်ဇြဳပၞာန်သီလဝ်အဝဵုကၟိန်ဍုၚ် လောန်ၜက်ကၠုၚ်ဒၟံၚ် ပ္ဍဲတိဍာ်အုပ်ဓုပ် ဒပ်မဟာ (၅)၊ ခရိုၚ်ဘာပန် ဗော်သွးကောန်ဂကူကရေၚ် KNU ဂှ် စဵုကဵုအခိၚ်လၟုဟ် ဆက်လောန်ၜက်ဒၟံၚ် ဖိုဟ်ဏီ ဂွံညာတ်ကေတ်တုဲ ညးဍုၚ်ကွာန်ကရေၚ်ကီု သီုညးဍုၚ်ကွာန်အလုံမွဲကၟိန်ဍုၚ် ပါဲနူဟွံဒုၚ်တဲသ္ပစၟတ်သမ္တီဂှ် ပရေၚ်တိတ်ထ္ၜးဆန္ဒလ္တူဂၠံၚ်၊ ပရေၚ်ရပ်လွဟ်ပၠန်ဂတးတအ်လေဝ် ဆက်က္တဵုဒှ်ဒၟံၚ် စဵုအခိၚ်လၟုဟ်ဖိုဟ်ရဂှ် ဓမံက်လဝ် ပ္ဍဲတၚ်လလောၚ်တြးရ။

ညံၚ်ယန္တရာပရေၚ်အုပ်ဓုပ်ကံၚ်ဇြဳပၞာန် မၞုံပ္ဍဲဒပ်မဟာ (၅) ခရိုၚ်ဘာပန် KNU ဂွံဂေတ်ကၠောံမာန်ဂှ် ညးယိုက်ဝန် ဌာနမဆေၚ်စပ်တအ်၊ သ္ကိုပ်ပရေၚ်အုပ်ဓုပ်ကွာန် ဖန်ဗဒှ်ကဵုဒၟံၚ် အထံက်အရီုတအ် သွက်ဂွံနုက်တိတ် နူကဆံၚ်ဌာနန္တရဂှ် ဒပ်မဟာ(၅) လလောၚ်တြးလဝ် နကဵုစၟတ်တ္ၚဲ (၁) ဂိတုဂျာန္နဝါရဳသၞာံဏံ တုဲဒၟံၚ်ရဂှ် ဟီုသ္ဂးလဝ်ရ။

လ္တူတၚ်လလောၚ်တြးဏံ ညးယိုက်ဝန်ဌာနဆေၚ်စပ်လ္ၚဵု ကေုာံ သ္ကိုပ်ပရေၚ်အုပ်ဓုပ်ကံၚ်ဇြဳပၞာန်လ္ၚဵုဂှ် ၜိုန်ရဒ္ဂေတ်ဗက် ကၠောန်ရေၚ်တၠုၚ်လဝ် နွံကီုလေဝ် ညးယိုက်ဝန်လ္ၚဵု၊ သ္ကိုပ်ပရေၚ်အုပ်ဓုပ်လ္ၚဵုတအ်ဂှ် စဵုကဵုတ္ၚဲဏံ ပါဲနူဟွံဒ္ဂေတ်ဗက်တုဲ သီုဒစဵုဒစးဒၟံၚ်ကဵု တၚ်လလောၚ်တြးတုဲ ဆက်ကၠောန်ဒၟံၚ်ကမၠောန်ပရေၚ်ချဳဒရာၚ် ဒှ်ဒတုဲဖိုလ်ကံၚ်ဇြဳပၞာန် နွံဒၟံၚ်ဏီ ဂွံညာတ်ကေတ်ဒၟံၚ်ရဂှ် KNLA ဒပ်မဟာ (၅) ဟီုသ္ဂးလဝ်ရ။

ဟိုတ်ဂှ် ညးယိုက်ဝန်ဌာနမဆေၚ် သ္ကိုပ်ပရေၚ်အုပ်ဓုပ်ကံၚ်ဇြဳပၞာန် သှ်ေၜက်ဒၟံၚ်ဂှ် ညံၚ်ဂွံဒ္ဂေတ်ဗက် အတိုၚ်တၚ်လလောၚ်တြးအသံပၟိၚ် ဒပ်မဟာ (၅) KNLA ကီု ညးဟွံဒ္ဂေတ်ဗက်တအ်ဂှ် စၟတ်သမ္တီကေတ် နဒဒှ်ညးဒစဵုဒစးအသံပၟိၚ်တုဲ ဆက်ကၠောန်ရေၚ်တၠုၚ် ကေတ်အာအရေဝ် ညံၚ်ဂွံစိုပ်တရဴ လ္တူနူအခိၚ်ကၠာတေံရောၚ်ဂှ် ရုၚ်ဂအုပ်ပရေၚ်ပၞာန် ဌာန်ဂအုပ်ဒပ်မဟာ (၅) KNLA ထပ်ကဵုလဝ်သတိရ။

ပ္ဍဲတိဍာ် KNU ခရိုၚ်ဘာပန် ဒပ်မဟာ (၅)ဂှ် အကြာဒပ်ပၞာန်ဗၠးၜးကောန်ဂကူကရေၚ် KNLA ကဵု ဒပ်ကံၚ်ဇြဳပၞာန် BGF တအ် ပေါဲဗတိုက်ဒှ်ဒၟံၚ် ခြာဟွံလအ်ဟွံလအ်တုဲ ပ္ဍဲပေါဲဗတိုက်ဆေၚ်မုက်တအ်ဂှ် လ္ပာ်ဒပ်ကံၚ်ဇြဳပၞာန် BGF ဂှ် ပ​ရေၚ်ဇီုကပိုက် ဒးချိုတ်ဂွံလဝ်ဘဲဝပ် နွံဗွဲမဂၠိုၚ်ရဂှ် ဂွံတီကေတ် အတိုၚ်တၚ်လလောၚ်တြးရ။

ပရိုၚ် – သြၚ်လောန်တိုၚ်(မ်)

ဗီုရုပ် – KNU