ၜဳကလေၚ် – အဝ်ဂေတ်(၁၀)
ဂၠံၚ်ကွဳစက် လဂုၚ်-မတ်မလီု မၞုံပွိုၚ်ဍုၚ်ၜဳကလေၚ် တွဵုရးဍုၚ်မန် ဍာ်ထပ်ၜက်လဝ်တုဲ ဟိုတ်နူဇၟောဝ်ဍာ် ဇွောဝ်ထတ်ဒၟံၚ်ဂှ်ရ ကၟာတ်ဒၞာလဝ် အခေါၚ်ယာဉ်အာတရဴတအ် တတ်ကၠောံအာကၠုၚ် မွဲချိုန်ခနရဂှ် ဂွံတီကေတ် နူဂကောံရီုဗၚ်ဟံၚ်ပြာ်မၞိဟ်တအ်ရ။
နူကဵုဂိတုအဝ်ဂေတ် စၟတ်တ္ၚဲ (၈) အခိၚ်ဗ္တံတေံ ပ္ဍဲပွိုၚ်ဍုၚ်ၜဳကလေၚ် ဟိုတ်နူဗြဲဂူစှ်ေ အဆက်ဟွံပိုတ်သ္ကုတ်တုဲ ဍာ်ၜဳ ၜဳကလေၚ် လောန်ၜက်ကၠုၚ် လ္တူနူဗ္ၜတ်အပိုၚ်ခြာဍာ်ဒးဒှ်ဓဝိၚ်တုဲဂှ် ဍာ်လောန်ၜက်ဂၠံၚ်ကွဳစက် ထပ်က္တဵုဒှ်လဝ်ရ။
ဟိုတ်နူဍာ်လောန်ၜက်ဂၠံၚ်ကွဳစက်တုဲ နူတ္ၚဲတုဲတေံ ၜိုတ် (၇)နာဍဳဂှ် ကၟာတ်လဝ် အခေါၚ်အာကၠုၚ် မွဲချိုတ်ခနတုဲ တ္ၚဲဏံ ဂိတုအဝ်ဂေတ် စၟတ်တ္ၚဲ (၉) စဵုကဵုအခိၚ် ၜိုတ် (၁၀)နာဍဳ က္လေၚ်ပံက်ကဵု ဟွံမာန်ဏီရ။
“ဂၠံၚ်ဂှ် ယာဉ်ဂကူလဵုလေဝ် အာကၠုၚ်ဟွံဂွံပုဟ်၊ ကၟာတ်လဝ်ဖအိုတ်၊ ဍာ်ဇွောဝ်ထတ်ဒၟံၚ် ကွေံကွေံဏောၚ်၊ ဍာ်လေဝ်ထပ်တိုန်ဒၟံၚ်တုဲ အခိၚ်လဵု ထပ်ပံက်ကဵုရော ဟွံတီကေတ်ဏီရ”ဂှ် ညးတာလျိုၚ်ရီုဗၚ်ဟံၚ်ပြာ်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ဟိုတ်နူဂၠံၚ်ကွဳစက် လဂုၚ်-မတ်မလီု ဍာ်လောန်ၜက်တုဲ ပ္ဍဲဍုၚ်ၜဳကလေၚ်၊ ပ္ဍဲဒၞာဲတိုဝ်ဂုက်တြေံကဵု ဗ္ဒာဲကွာန်ဒုမ်ဝန်တအ်ဂှ် ကွဳစက်အာတရဴ ဂၠိုၚ်ကဵုကၠံ ဒှ်လဝ်ပရေၚ်ဆိုအ်ဗ ကၟာတ်လဒဵုဒၟံၚ်ရ။
ဍာ်လောန်ၜက်ဂၠံၚ်ကွဳစက်ဂှ် ပ္ဍဲဒဒန်မသဝ်(မစော) ပွိုၚ်ဍုၚ်ၜဳကလေၚ်၊ တၞုၚ်ဂၠံၚ်ရုၚ်စက်သဂြာ၊ ကွာန်ယှိုဲယောၚ်ပျ ကေုာံ ကွာန်တောၚ်ကလေတအ် ၜိုတ်ပန်ဒၞာဲ ဍာ်လောန်ၜက်ဂၠံၚ်ကွဳစက် က္တဵုဒှ်ဒၟံၚ်ရ။
အတိုၚ်တၚ်ၜတ်ဗၞတ် ဌာနက္ဍိုက်က္ဍိုပ်စမ်ၜတ်ဗြဲကျာ အခိၚ်နူဂယး (၆) နာဍဳကဝက် တ္ၚဲဏံမ္ဂး ဍာ်ၜဳ ၜဳကလေၚ်ဂှ် လ္တူနူအပိုၚ်ခြာဍာ် ဒးဒှ်ဓဝိၚ် ၁၀၂၂ ဇြေန်တဳမဳတာ စိုပ်ဒၟံၚ် ၁၀၉၅ ဇြေန်တဳမဳတာရဂှ် လလောၚ်တြးလဝ်ရ။
ပ္ဍဲပွိုၚ်ဍုၚ်ၜဳကလေၚ် ဟိုတ်နူဍာ်ဇၞော်တုဲ ဒးပံက်စွံလဝ် ဗဒိုပ်ရီုဗၚ်ဟံၚ်ပြာ် စဵုကဵု (၂၇) ဗဒိုပ်တုဲ ညးဍုၚ်ကွာန် ဒးဘဲဒဏ်ဍာ် ၁၀,၀၀၀ ပြၚ် နွံဒၟံၚ်ရဂှ် ဂွံတီကေတ် အတိုၚ်လဟီု ဂကောံရီုဗၚ်ဟံၚ်ပြာ်မၞိဟ်တအ်ရ။
ပရိုၚ် – သြၚ်လောန်တိုၚ်(မ်)
ဗီုရုပ် – Social Media
sanlontai