သေတ်တွေ – အဝ်ဂေတ်(၁၀)
တွဵုရးရခေၚ် ပ္ဍဲပွိုၚ်ဍုၚ်ကျောက်တဝ်၊ မျောက်ဥူ၊ မေန်ပျာ၊ ယျတေံတံၚ်၊ ဘူတဳတံၚ် ကေုာံ ပွိုၚ်ဍုၚ်တံၚ်ကုပ်တအ်ဂှ် ဟိုတ်နူဍာ်ဇၞော်တုဲ မၞိဟ်ဂၠိုၚ်ကဵုလ္ၚီ ဒးဆဵုဂဗဒၟံၚ်ကဵု ဘဲဒဏ်ဍာ်ရဂှ် ဂကောံရီုဗၚ်ဟံၚ်ပြာ်မၞိဟ်တအ် ဟီုသ္ဂးလဝ်ရ။
သ္ပတံနူ မွဲၜါတ္ၚဲတုဲကၠုၚ်တေံတုဲ သၟာဒဒိုက်ပါဲဘဲပၞာန်ကီု သီုကဵုညးဍုၚ်ကွာန်တအ် ဒးဆုဲပြံၚ်လဝ် ပ္ဍဲဒၞာဲဗၠးဘဲရ။
ပ္ဍဲဒေသရခေၚ် ဒးဒုၚ်လဝ်ဘဲဒဏ်လဗိုတ်ကျာတုဲ ဟွံက္လိဂွံ ပရေၚ်ရီုဗၚ်ထံက်ပၚ် နူကံၚ်ဇြဳပၞာန်ဂှ် ဟိုတ်နူဒးထပ်ဒုၚ် ဘဲဒဏ်ဍာ်ဇၞော်ပၠန်ဂှ်ရ ညးဍုၚ်ကွာန်တအ် ဒးဆေၚ်ဒၟံၚ်မုက်ကဵု အခက်ခုဲရဂှ် ဂကောံရေၚ်တၠုၚ်သၠုၚ်ပ္တိုန်အစောန်စရာဲဍာ်ဒ္ကေဝ်ဒုၚ်ဒဝ်ဘဲဒဏ်ညးဍုၚ်ကွာန် ဟီုသ္ဂးလဝ်ရ။
“ပ္ဍဲပွိုၚ်ဍုၚ်ဗွဲမဂၠိုၚ် စိုပ်ဒၟံၚ်ဒဒိုက်ညးကအ်ရ။ ပ္ဍဲရခေၚ်ပိုဲ ဟိုတ်နူလဗိုတ်ကျာတုဲ ဒးဂိလဝ်ဗွဲမဂၠိုၚ်။ လၟုဟ်ဏံ ထပ်ဒှ်ကၠုၚ် ဗီုဏံပၠန်ဟီုတှ်ေ ဣဏံဂှ် ဒှ်အကာအရာပရေံလောန်ကွေံကွေံရ” ဂှ် ဒါရိုက်တာရေၚ်တၠုၚ်ဖိုလ် ဂကောံရေၚ်တၠုၚ်သၠုၚ်ပ္တိုန် အစောန်စရာဲဍာ်ဒ္ကေဝ်ဒုၚ်ဒဝ်ဘဲဒဏ် ညးဍုၚ်ကွာန် ကိုဝ်ဇြဝ်ဇြဝ်ထောန် ဟီုကဵု ဌာန်ပရိုၚ်သြန်လောန်တိုၚ်(မ်)ရ။
ဟိုတ်နူဍာ်ၜဳကစ္ဆပနဒဳကဵု ဍာ်ၜဳလေမျိုအ်(လေးမြို့) သၠုၚ်တိုန်ကၠုၚ်တုဲ ဒးဒုၚ်ဆဵုဂဗဒၟံၚ် ဘဲဒဏ်ဍာ်ဇၞော်တုဲ ပ္ဍဲဂၠံၚ်ကွဳစက် လဂုၚ်-သေတ်တွေ ဗ္ဒာဲဂကောံကွာန်ကိုၚ်တဝ် ဍာ်ၜက်ဒၟံၚ် ၜိုတ်(၅)ၝောံတဲတုဲ ဗ္ဒာဲကွာန်ဇြဳတေဝ် ဂကောံကွာန်နာန်ကျာဂှ်လေဝ် ဍာ်ၜက်ဒၟံၚ် ၜိုတ် (၆)ၝောံတဲရဂှ် ကံၚ်ဇြဳပၞာန်တွဵုရးရခေၚ် ဟီုသ္ဂးလဝ်ရ။
စပ်ကဵုအကာဲအရာဒးဆဵုဗဒၟံၚ်ဘဲဍာ် ပြဟ်ဟ်လၟုဟ်ဏံတုဲ အခိၚ်သြၚ်လောန်တိုၚ်(မ်) ဆက်စၠောံသၟာန်လဝ်ကဵုကံၚ်ဇြဳပၞာန်တွဵုရးဂှ် ကၠောန်ဗဒှ်ဒၟံၚ်ကောံဓရီုကဵု ညးတာလျိုၚ်ပွိုၚ်ဍုၚ်တုဲ ဟိုတ်နူတၚ်သ္ဂုတ်သွာတ်ဟွံတိတ်ကၠုၚ်ဏီဂှ်ရ ဟီုထ္ၜးကဵုတၚ်သောဲသောဲဗြောဲဗြောဲ ဟွံဂွံဏီရဂှ် ကလေၚ်ဟီုလဝ်ရ။
ပ္ဍဲမျောက်ဥူ ဒၞာဲအာဲကၟာဲလုပ်ဝၚ်ဂၠးကဝ်နွံဒၟံၚ်ဂှ်လေဝ် ပ္ဍဲဒၞာဲအရာပ်သ္ကုတ်သၟဝ် သဝ်ဒၟံၚ်ဂှ် ဒးဆဵုဂဗဒၟံၚ်ကဵု အကာဲအရာဍာ်လုပ်ရဂှ် ဂွံတီကေတ်ရ။
“နူတ္ၚဲတုဲကၠုၚ်တေံရ ဒးပြံၚ်ပဆုဲလဝ်ဒၞာဲ ညးပါဲဘဲပၞာန်တအ်ရ လၟုဟ်တှ်ေ ဗဒိုပ်ညးပါဲဘဲပၞာန်ကီု ပ္ဍဲအရာသဝ်သဝ် မျောက်ဥူကီု ဍာ်လုပ်ဒၟံၚ်အိုတ်ယျ” ဂှ် ညးဒေသမွဲတၠ ဟီုကဵုဌာန်ပရိုၚ်သြၚ်လောန်တိုၚ်(မ်)ရ။
သ္အာၚ်နူဂှ်ပၠန် ပ္ဍဲအရာပ်သၟဝ် သ္ကုတ်တိသဝ် ပွိုၚ်ဍုၚ်မေန်ပျာဂှ်လေဝ် ဟိုတ်နူဍာ်လုပ်ကၠုၚ် စဵုကဵုဗ္ဒာဲပိပေတုဲ ညးဒေသတအ် ဒးဂဗဒၟံၚ်ကဵု တၚ်အခက်ခုဲရ။
“မွဲၜါတ္ၚဲဏံ ဗြဲဂူစှ်ေအဆက်ဟွံပိုတ်ဂှ်ရ ဍာ်ဇၞော်ဒၟံၚ်ဗီုဏံရ။ ပြဟ်ဟ်ဏံတှ်ေ ကပေါတ်နွံဒၟံၚ်ပ္ဍဲသ္ၚိဂှ် ဒးပြံၚ်ပဆုဲလဝ် လ္တူသ္ၚိရ”ဂှ် ကိုဝ်ယာန်နိုၚ် မဒှ်ကောန်ဒေသ ဍုၚ်မေန်ပျာမွဲတၠ ဟီုသ္ဂးလဝ်ရ။
ဟိုတ်နူဍာ်ၜဳကစ္ဆပနဒဳ မၞုံပွိုၚ်ဍုၚ်ကျောက်တဝ် ဂၠိုၚ်တိုန်ကၠုၚ်ဒၟံၚ်တုဲ ဂကောံအိန်ထံၚ် နူကွာန်မူချောၚ် (၅၅)အိန်ထံၚ်၊ လၟိဟ်သ္ၚိ နူကွာန်ကျောက်တလုံ (၁၅၀) ၊ လၟိဟ်မၞိဟ် (၁၁၄၀)တၠတအ် ဒးပလံၚ်ဗစိုပ်လဝ် ပ္ဍဲဒၞာဲဗၠးဘဲရ။
ပ္ဍဲကွာန်ဇြေန်ချဇြုက် ပွိုၚ်ဍုၚ်မျောက်ဥူဂှ်လေဝ် ဂကောံသ္ၚိကၟိန် (၅)ဂကောံ၊ ဂကောံသ္ၚိကၟိန် နူဗဒိုပ်ပါဲပၞာန် မျတာန်ဇြောၚ် (၂၂၃)အိန်ထံၚ်တအ် ပြံၚ်ပဆုဲကဵုလဝ် ပ္ဍဲဒၞာဲဌာန်ဗၠးဘဲရဂှ် ကံၚ်ဇြဳပၞာန် လလောၚ်တြးလဝ်ရ။
ပရိုၚ် -သြၚ်လောန်တိုၚ်(မ်)
ဗီုရုပ် -Social Media
sanlontai