နုက်ပါဲပ္တိတ် ဥူဟေန်နရဳဗာန်ထဳယူ ပံၚ်တောဲလဝ်ကဵုကံၚ်ဇြဳပၞာန် နူဗော် NLD

လဂုၚ် – အဝ်ဂေတ် (၁၀)

ဥူဟေန်နရဳဗာန်ထဳယူဂှ် ၜိုန်ဒှ်ဒုသမ္မတ ဗော်ပတှ်ေအပ်ပြာပ်ကဵုလဝ်တာလျိုၚ်မွဲတၠကီုလေဝ် ဟိုတ်နူပံၚ်တောဲကဵုကံၚ်ဇြဳပၞာန်ဂှ်ရ နုက်ပါဲပ္တိတ်လဝ် နူဗော်ဒဳမဝ်ကရေဇြဳကောန်ဂကူ NLD ရဂှ် လလောၚ်တြးလဝ် နစၟတ်တ္ၚဲ တ္ၚဲဏံရ။

ပ္ဍဲကောံဓရီုကာတၟေၚ်ကာလအကြာ ဒုတိယဗဟဵုကဝ်မတဳ မကၠောန်ဗဒှ်လဝ် ပ္ဍဲဂိတုအဝ်ဂေတ် စၟတ်တ္ၚဲ (၈)တုဲကၠုၚ်တေံဂှ် ဒှ်တၚ်သ္ဂုတ်သွာတ် နကဵုတၚ်တုပ်စိုပ် ညးလုပ်ဂကောံကဝ်မတဳဗဟဵုတအ်ရဂှ် ကဝ်မတဳရေၚ်တၠုၚ်ကေၚ်ကာဗဟဵု ဟီုသ္ဂးလဝ်ရ။

အတိုၚ်သွဟ်ပေါဲရုဲမာဲ ၂၀၂၀ ညးစၞးကၠတ်ထဝ်ကောန်ဂကူ သ္ပစၞးကဵုဗော် ဥူဟေန်နရဳဗာန်ထဳယူဂှ် ဖံက်ပ္ကဝ်လဝ်ကတိသစ္စာ မကဵုလဝ်တၠဆန္ဒမာဲ ညးဍုၚ်ကွာန်တအ်တုဲ ဟိုတ်နူပံၚ်တောဲကဵု ကံၚ်ဇြဳပၞာန်ဂှ်ရ ဒးဒုၚ်နုက်ပါဲပ္တိတ်လဝ်ရဂှ် ဂွံတီကေတ်ရ။

သ္အာၚ်နူဂှ်ပၠန် ဒှ်ဖံက်ပ္ကဝ်လဝ် တၚ်ရန်တၟံ ကေုာံ မူဝါဒဖျေံစွံပ္တန်လဝ် ဗော် ရေၚ်တၠုၚ်ဓမံက်ဒၟံၚ်ရုပ်ရဴ ပၟိက်ဆန္ဒညးဍုၚ်ကွာန် အဓိကဟေၚ်ရဂှ် ဓမံက်ထ္ၜးလဝ်ရ။

စပ်ကဵုပရေၚ်ဒးဒုၚ်နုက်ပါဲပ္တိတ် နူဗော်ဗီုဏံတုဲ နကဵုသြၚ်လောန်တိုၚ်(မ်) ၜိုန်ရဆက်စၠောံသၟာန်လဝ်ကဵု ဥူဟေန်နရဳဗာန်ထဳယူကီုလေဝ် ဆက်စၠောံလဝ် ဟွံဂွံရ။

ကံၚ်ဇြဳပၞာန် ရပ်ဒက်လဝ် ဥက္ကဋ္ဌ၊ ဒုဥက္ကဋ္ဌ ကေုာံ ညးရေၚ်တၠုၚ်ကေၚ်ကာဗဟဵု ဗော် NLD (၉)တၠကီု သီုကောန်ဗော်ဗွဲမဂၠိုၚ် ဟွံဗဗွဲဓဝ်ရဂှ် ကဵုလဝ်သမ္တီရ။

နကဵုဗော်ဒဳမဝ်ကရေဇြဳကောန်ဂကူ ဆေၚ်မုက်လုပ်ဒၟံၚ်ပေါဲဗတိုက် တၠအဝဵုပၞာန် မွဲကရောံကဵု ကောန်ဍုၚ်အရၚ် ညးဍုၚ်ကွာန် နွံဒၟံၚ်ပၟိက်ကဵု ဒဳမဝ်ကရေဇြဳအလုံမွဲကၟိန်ဍုၚ်ရဂှ် ဟီုသ္ဂးလဝ်ရ။

ကြဴနူဒပ်ပၞာန်သီအဝဵုကၟိန်ဍုၚ်ဗၟာတုဲ ကောန်ဗော် NLD (၉၈၇) တၠ ဒးဒုၚ်ရပ်လဝ်တုဲ ပ္ဍဲကဵုဂှ် (၅၀)တၠပြၚ် ဒးဒုၚ်ရပ်ဒက်ပြိုက်ဂစိုတ်လဝ်ကဵု ပရေၚ်စၟဳစၟတ် ကေုာံ ပျူသဝ်ထဳ သၟဝ်တဲကံၚ်ဇြဳပၞာန်တုဲ ဂဗုတ်ဒးဒုၚ်ကၟာတ်ဒၞာသ္ၚိဒၟံၚ် ဟွံဗဗွဲဓဝ်လေဝ် အပံၚ်လၟိဟ် (၃၀၀)ဂဗုတ်ပြၚ် နွံရဂှ် ညးစုက်လုက်ကဵု ဗော်တအ်ဟီုသ္ဂးလဝ်ရ။

ပရိုၚ် – သြၚ်လောန်တိုၚ်(မ်)

ဗီုရုပ် – မဳဒဳယာတြးဝါဒကံၚ်ဇြဳပၞာန်