ပ္ဍဲတွဵုရးဍုၚ်မန် ပၟတ်ဓာတ်လလဳ ပိုတ်ဂၠိုၚ်ကၠုၚ်

မတ်မလီု၊ အဝ်ဂါတ် (၁၀)

အပ္ဍဲတွဵုရးဍုၚ်မန် အခိၚ်ကသီုဏံဂှ် သာတုဲဒးဂဗဒၟံၚ်ကဵု ပၟတ်ဓာတ်လလဳပိုတ်ပၠိုတ် ဂၠိုၚ်နူကဵုကညၚ်တေံဏီဂှ် တၠကမၠောန် SME ကေုာံ ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

က္ညၚ်တုဲကၠုၚ်တေံ နူကဵုကမၠောန်တြးဇြဟတ်ဓာတ် သၟဝ်တဲကံၚ်ဇြဳပၞာန်ဂှ် အရာပ်၊ ကွာန်တံဂှ် ပါ်ကဵုဂကောံတုဲ မွဲဝါမ္ဂး ၁ နာဍဳ၊ မွဲတ္ၚဲဂှ် ပၟတ်ဓာတ်လလဳ ၜိုတ် ၈ နာဍဳ တြးကဵုလဝ်ရ။

ဆ္ဂး အခိၚ်ကာလလၟုဟ် ပၟတ်ဓာတ်လလဳတံ ထပ်ပိုတ်ပၠိုတ်ကၠုၚ် ပရေံပရေံပၠန်တုဲ မွဲတ္ၚဲမ္ဂး ၜိုတ် ၄ နာဍဳဓဝ် ဂွံဒၟံၚ်ပၟတ်ဂှ်ရ ထပ်ဒးဂဗကၠုၚ် အခက်အခုဲဘဝပရေၚ်မၞိဟ်တံမာန်ဒၟံၚ်ရ။

ညးဒေသမွဲတၠဂှ် ဟိုတ်နူပၟတ်ဓာတ်လလဳ ပိုတ်ဂၠိုၚ်ကၠုၚ်ဂှ်ရ သွက်ပရေၚ်ဍုန်တိုပ်ဂှ် ဒးသုၚ်စောဲဒၟံၚ် ချးကဵု သၟုဟ်ဓာတ်တံ အဓိကဂှ်ရ ဒးဆေၚ်ဒၟံၚ်မုက် ကုအခက်အခုဲ ခရိတ်အရပ်စပ်ဇၞော်သၠုၚ်တံရဂှ် ဟီုရ။

“လၟုဟ်မ္ဂး မွဲတ္ၚဲဂှ် ၜိုတ် ၄ နာဍဳ ၅ နာဍဳဓဝ်ရ ဂွံဒၟံၚ်ပၟတ်တုဲ ဒးရုန်ဂ္စါန်ဒၟံၚ်ရ။ ကၠာတေံမ္ဂး ဍုန်ကဵုပၟတ်ဓာတ်လလဳဂွံဒၟံၚ်၊ လောဲဒၟံၚ်ဏောၚ်။ လၟုဟ်ဂှ် ခရိတ်အိုတ် ဒးရာန်ချးတံဂှ် တိတ်ကၠုၚ်ရ။ တုဲတှ်ေ ဒးဍုန်ကဵုသၟုဟ်ဓာတ်ဂှ်နွံဒၟံၚ်ဏီ။ ကၠာတေံမ္ဂး နူကဵုလောဲလောဲသွာသွာဂှ် အကာဲအရာသာတုဲခက်ခုဲဂှ်လေဝ် ဒးဂဗဒၟံၚ်ရ။ ပၟတ်ကၠုၚ်မှ ပ္တိုန်ဍာ်ဂွံဏောၚ်။ ပၟတ်ဂှ်ဟွံကၠုၚ်တုဲ အကာဲအရာဍာ်ပိုတ်အာတံဂှ် ဒးဂဗဒၟံၚ်ရ။ ဒးခၞေံရပ်စပ်ဒၟံၚ် သီုကဵုဍာ်ဏောၚ်။ ကၠာတေံမ္ဂး ခပါဲသ္ၚုတုဲ ဍာ်သ္ၚုဂှ် ချာဲထောံဂွံကီုလေဝ် လၟုဟ်ဍာ်သ္ၚုဂှ် ဂြာတ်ပ္ၚာန်ခိုဟ်ဟာ စဵုကဵုဒးကူချပ်ကၠုၚ်သာ်ဏံတုဲ ဒးရပ်စပ်ဒၟံၚ်ရ” သာ်ဝွံ ညးသ္ဂးရ။

ပၟတ်ဓာတ်လလဳ ဟိုတ်နူပိုတ်ပၠိုတ်ကၠုၚ် ပရေံပရေံဂှ်ရ ပ္ဍဲကဵုဘဝမၞိဟ်လၟေၚ်တ္ၚဲတံဂှ် သွက်ဂွံဍုန်တိုပ်စသုၚ်ရဂှ် အခက်အခုဲနွံကၠုၚ်တုဲ ဇီုကပိုက်ကၠုၚ် စဵုကဵုကမၠောန် ဒးရပ်စပ်ပၟတ်ဓာတ်လလဳတုဲ မ္ဒးဂေတ်ဂြိပ်ဒၟံၚ်တံဂှ်ရောၚ်ဂှ် ဂွံတီကေတ်ရ။

တၠကမၠောန် SME မွဲတၠဂှ်လေဝ် ပ္ဍဲကဵုဒၞါဲအပိုၚ်အခြာဒေသဗွဲတၟေၚ်ကွတ်စက်တံဂှ် မွဲတ္ၚဲမ္ဂး ဟိုတ်နူဂွံဒၟံၚ်ပၟတ် ၜိုတ် ၂ နာဍဳပြၚ်ဓဝ်ဂှ်ရ သွက်ကမၠောန်ဂွံဂေတ်ဂြိပ်ဂှ် သာတုဲခက်ခုဲကၠုၚ်ဒၟံၚ်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“ပ္ဍဲကဵုဒၞါဲအပိုၚ်အခြာဒေသကွတ်စက်ပိုယ်တံဏံဂှ် ၂၄ နာဍဳဂှ် ဂွံမံၚ်ၜိုတ် ၂ နာဍဳရဏောၚ်။ တ္ၚဲလ္ၚဵုတံမ္ဂး ဟွံဂွံလးလးရ။ က္ညၚ်တုဲကၠုၚ်တေံရဂှ် နူဂယး ၜိုတ် (၉) ကဝိုက် (၁၀) နာဍဳကၠုၚ်မ္ဂး ကၠုၚ်ဒဵုကဵုသဝ်တ္ၚဲ (၅) နာဍဳဏီရ။ ဂိတုတုဲကၠုၚ်ဏံဂှ် နူကဵု (၁၀) နာဍဳ စဵုကဵု (၂) နာဍဳဂှ် ကဵုလဝ်လၟေၚ်ၚ်ဏီရ။ ဆ္ဂး ပ္ဍဲကဵုဂိတု (၈) လုပ်ဏံဂှ် သာပရေံကၠုၚ်ရ။ ၜိုတ်မိက်ဂွံကဵုဂှ်ရ ကဵုတုဲ လဆောဝ်လဆောဝ် အတိုၚ်မွဲတ္ၚဲဂှ် ဟွံကဵုပုဟ်။ ပၟတ်ကၠုၚ်မှ က္တဵုစက်ဂွံတံဂှ် နွံဒၟံၚ်တုဲ အရာတံဏံဂှ် ကဵုပၟတ်စက်ဂှ် ဟွံပြေပြံၚ်ပုဟ်။ ကမၠောန်လဇုဲလဇကွေံကွေံရ။ ဒဳဇြေဝ်ဂှ်လေဝ် လၟုဟ်မ္ဂး ၜက်ကၠုၚ် (၂၅၀၀) ဒ္ကေဝ်ပြၚ်ယျဟီုတှ်ေ ဟွံပြေပြံၚ်လးလးဟဂှ်ရ။ ညံၚ်ကမၠောန်ကွတ်စက်တံ ဂွံတောတက် ကၠောန်ကဵုဏောၚ်သၟးရ ဟီုဒၟံၚ်။ ဍာံဍာံဂှ် ညံၚ်ပၟတ်ဂွံမှာန် ကဵုဟွံမာန်မွဲသာ် ကမၠောန်ကွတ်စက် ဂွံတောတက်ဟီုဂှ် နွံမံၚ်တၟာသ္ၚောဲဏီ” သာ်ဝွံ သ္ဂးရ။

ညးဍုၚ်ကွာန် မဒးဒုၚ်စသိုၚ်ဒၟံၚ် ပရေၚ်ပၟတ်ဓာတ်လလဳ ပိုတ်ပၠိုတ် ပရေံပရေံဂှ်ဝွံ ဒၟါနူပရေၚ်ကောပ်ကာဲဖန်ဇန်ဗၠေတ်တ် ကံၚ်ဇြဳပၞာန်တံတုဲ ဒးဒုၚ်စသိုၚ်ဒၟံၚ်ဘဲဒဏ်ၚုဟ်ဗၞိက်စၞစသ္ဇိုၚ်တံက္ဍၚ် ပါလုပ်သီုကဵုသ္ၚုတံရ။

က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ်ဂှ် တၚ်နွံပၟိက်ဇြဟတ်ဓာတ်လလဳနွံဒၟံၚ်ဂှ်ဝွံ ဟိုတ်နူကိုန်စဳမာန် ကၠောန်ပ္တိတ်ဇြဟတ်ဓာတ်လလဳ မထ္မံက်လဝ်ရုပ်ရဴ လောန်ကၠုၚ် ၁၀ သၞာံပြၚ်တေံ ဒၟါနူဟိုတ်နာနာသာ်တုဲ ဒးဒေါအ်ဒေၚ်လဝ်ရောၚ်ဂှ် ထ္ၜးလဝ်ဟိုတ်ရ။

တၚ်နွံပၟိက်ဇြဟတ်ဓာတ်လလဳဂှ် ရပ်စပ်စကာဇြဟတ်လျးတ္ၚဲ၊ ဇြဟတ်ကျာ ကေုာံ စၞပၟတ်သၟုဟ်ဓာတ် မရပ်စပ်ကာမ်(ခၞော်သြောံ)တုဲ သွက်ဂွံကၠောန်ပ္တိတ်ဓာတ်လလဳဂှ် ထ္မံက်ဒၟံၚ်ရုပ်ရဴရောၚ် တုဲကၠုၚ် ပ္ဍဲဂိတုအဝ်ဂါတ် (၈) တေံ အခိၚ်ဆဵုဂဗကဵု ပူဂဵုကဆံၚ်ကၟိန်ဍုၚ် ကံၚ်ဇြဳပၞာန် မခါန်ကၞက်လဝ်တံဂှ် ဟီုဂးလဝ်ရ။

တိုက်သြန်ဂၠးတိဂှ် ဟိုတ်နူပဋိပက္ခ မက္တဵုဒှ်ဒၟံၚ် အပ္ဍဲလက်ထက်ကံၚ်ဇြဳပၞာန်ဏံ၊ ပၟတ်ဓာတ်လလဳ ပိုတ်ပၠိုတ်ဂၠိုၚ်ကီု ကေုာံ ဟိုတ်နူအပြံၚ်အလှာဲမူဝါဒတံဂှ်တုဲလေဝ် အရာမဇီုကပိုက် လ္တူပရေၚ်ပိုန်ဒြပ်ဍုၚ်ဗၟာဂှ် ဆက်တုဲနွံဒၟံၚ်တုဲ ဂျဳပဳဒဳ မၞိဟ်မွဲမွဲဂှ်ဝွံ စိုပ်ဒၟံၚ် သၟဝ် ၁၃ တၟံကၠံ အခိၚ်ကာလကဝ်ဝေဒ်ဂွိုအ်ဒှ်တေံဏောၚ်ဂှ် ပ္ဍဲသၞာံဏံမံက်ဂှ် လလောၚ်ပ္တိတ်လဝ် လိက်ဒုၚ်စဳရေၚ်ရ။

ပရိုၚ်−သြၚ်လောန်တိုၚ်(မ်)

ဗီု−CJ