သ္ဂံၚ် PDF ဍဵုဍိုက်သ္ပမာန်ဒၟံၚ် ညးဍုၚ်ကွာန်တအ်ဂှ် ဖာဲပ္တိတ်အာ ပိုတ်တ်သ္ကုတ်တ်ဏောၚ် ဥူယျဳမွန်ဟီု

မတ်မလီု – အဝ်ဂေတ် (၁၁)

PDF ဟေၚ် ဒးသၠးလမျီုတုဲ ဟိုတ်နူဒးလုပ်ဒၟံၚ်ပေါဲဗတိုက်ဂှ်ရ PDF ဂှ် က္ဍဟ်သၠုၚ်နူညးဍုၚ်ကွာန်တအ် မွဲမဏီဏောၚ်ဟီုဂှ် လညာတ်ဏံ ဒးပါဲကၠအ်ထောံလဝ်တုဲ သ္ဂံၚ်ရပ်လွဟ် ဍဵုဍိုက်သ္ပမာန် လ္တူညးဍုၚ်ကွာန်တအ်ဂှ် ဖာဲပ္တိတ်အာ ပိုတ်တ်သ္ကုတ်တ်ရောၚ်ဂှ် ဝန်ဇၞော်ပရေၚ်စဵုဒၞာ NUG ဟီုသ္ဂးလဝ်ရ။ 

ပ္ဍဲဂလာန်ဗ္ကန် ဝန်ဇၞော် ဟီုဗ္ကန်လဝ် ကုသ္ဂံၚ် တန်ဗ္တောန်သ္ကိုပ်ဒပ်လ္ပာ် လၟေၚ်(၂) ဒပ်ပၞာန်စဵုဒၞာညးဍုၚ်ကွာန် ဌာနဝန်ဇၞော်ပရေၚ်စဵုဒၞာ အလဵုအသဳပရေၚ်ညဳသၟဟ်ကောန်ဂကူဂှ် ဟီုသ္ဂးလဝ်သာ်ဏံရ။ 

“လွဟ်ပိုဲရပ်လဝ်ဂှ် ဒှ်လွဟ်ညးဍုၚ်ကွာန်တအ် ပကောံပကေဝ်လဝ်ကဵု ဍာ်ဓတ်ကာယတုဲ ပ္ဂပ်ကဵုလဝ်ဏောၚ်။ ပုၚ်ပိုဲစဒၟံၚ်ဂှ်လေဝ် ဒှ်ပုၚ်ညးဍုၚ်ကွာန်တအ် ဗ္စကဵုလဝ်ဏောၚ်။ ရပ်လွဟ်တုဲ ကြာန်ဓမာန် လ္တူညးဍုၚ်ကွာန်ကီု၊ ဍဵုဍိုက်သ္ပမာန် လ္တူညးဍုၚ်ကွာန်ကီု လ္တူနူကမၠောန်ဏံ ကမၠောန်ဂွံဒးက္ဍုဟ်မၠေံ ဟၟဲရပုဟ်။ ဒ္ဂေတ်စရိုတ်ဗၟုဲ နွံဒၟံၚ်ဗီုဏံဂှ် ယဝ်ရနွံအောပ်နွံဒၟံၚ် ပ္ဍဲဒပ်ပၞာန် PDF လေဝ် ဒးဓမံက်ပ္တိတ်  ဒးဖာဲပ္တိတ်ထောံဏောၚ်”ဂှ် ဝန်ဇၞော်ကၟိန်ဍုၚ် ဥူယျဳမန်ဟီုသ္ဂးလဝ်ရ။ 

သ္အာၚ်နူဂှ်ပၠန် ဟိုတ်နူညးဍုၚ်ကွာန်တအ် ပါလုပ်ထံက်ဂလာန်ဟေၚ် ဂွံလးဗျူဟာပၞာန်ညးဍုၚ်ကွာန်မာန်တုဲ ဟိုတ်နူဗျူဟာဏံ ကၟာတ်ပၞော်တိတ်သၞတုဲ ပရေၚ်ဍုၚ်ကွာန်၊ ပရေၚ်ပိုန်ဒြပ်၊ ပရေၚ်ကၟိန်ဍုၚ်နာနာ သွာၚ်ဇဳဂှ် ဍန်ဂြက်စှ်ေကၠုၚ်တုဲ ယီုဂြတ်ကၠုၚ်ဒၟံၚ်ရဂှ် ဟီုသ္ဂးလဝ်ရ။ 

ဟိုတ်နူဍန်ဂြက်ကၠုၚ်တုဲ က္ဍိုပ်သ္ကိုပ်ပၞာန်ဂှ် နဒဒှ်ဂၠာဲတၠဒုဟ် ဖျေံကဆံၚ်နုက်ပ္တိတ်ပြိုက်ဂစိုတ်ကၠောန်ဒၟံၚ် လ္တူဇာတ်တုပ်ရၚ်သ္ကအ်တုဲ ကံၚ်ဇြဳပၞာန်ယီုဂြက်ဒၟံၚ်ဂှ် ညံၚ်ယဝီုဂွံအိုတ်အာ သွက်ဂွံကဵုအာဇြဟတ်ဓရိုဟ် ဗတိုက်အာဂှ်လေဝ် ဗတိုက်ဖ္အောဝ်လဝ် သ္ဂံၚ် PDF တအ်ရ။ 

တုဲကၠုၚ်မွဲၜါတ္ၚဲတေံ ဂကောံစဵုဒၞာညးဍုၚ်ကွာန် က္ဍိုပ်သ္ကိုပ်(ပ.က.ဖ) ပွိုၚ်ဍုၚ်သဝ် ဒုတိယဂှ် ၜုၚ်တက်လဝ် ညးဍုၚ်ကွာန်တအ်နွံရဂှ် ပရိုၚ်ပြးတိတ်ဒၟံၚ်တုဲ ကေတ်လဝ်အရေဝ် ကုညးမဆေၚ်စပ်တအ်ရဂှ် ဝန်ဇၞော်ပရေၚ်စဵုဒၞာ ကဵုလဝ်သမ္တီရ။ 

နကဵုသ္ဂံၚ် PDF တအ်ဂှ် အခိၚ်ဇကုဒးလုပ်ပေါဲဗတိုက် ဂွံအခိၚ်မ္ဂး သွက်ဂွံကၠောန်ၜိုတ်ကမၠောန်ညးဍုၚ်ကွာန်ကီု ပါလုပ်ရီုဗၚ် ကမၠောန်ဂယိုၚ်လမျီုညးဍုၚ်ကွာန်တအ်တုဲ ညံၚ်ဂွံကၠောန်ပရေၚ်စန္ဒက်ဆဝ်ပ္ၚုဟ်ညးဍုၚ်ကွာန်ဂှ်လေဝ် ဟီုသ္ဂးလဝ်ရ။ 

ဒပ်ပၞာန်စဵုဒၞာညးဍုၚ်ကွာန် (PDF) ဂှ် ပ္ဍဲအခိၚ်ပွိုၚ် (၂)သၞာံပြၚ်ဏံ တန်ဗ္တောန်ကွတ်ပၞာန်သ္ဇိုၚ်၊ တန်ဗ္တောန်ကွတ်ပၞာန် ကဆံၚ်အကြာပ်ဒပ်၊ မာၚ်၊ လွဟ်ဇၞော်၊ ဒရုမ်၊ သနိုက်ဗာ၊ ပရေၚ်ကၠောန်ပ္တိတ်၊ အထံက်က္ဍိုပ်၊ မဟာဗျူဟာ ကေုာံ နဲဗျူဟာ တန်ဗ္တောန်ကဆံၚ်ကဆံၚ် ဖျေံကဵုကၠုၚ်လဝ်မာန်တုဲ အခိၚ်လၟုဟ်ဏံ စဵုကဵုတန်ဗ္တောန်သ္ကိုပ်ဒပ်လ္ပာ် ညံၚ်ဂွံစိုပ်ဒတုဲ စဳဇန်ကၠုၚ်မာန်လဝ်ဂှ်ရ ဒးတၚ်ဂုဏ် ကုဂကောံမဟာမိတ် ရီုဗၚ်ကဵုလဝ်တအ်ရောၚ်ဂှ် ဝန်ဇၞော်ပရေၚ်စဵုဒၞာ ဟီုသ္ဂးလဝ်ရ။ 

ပရိုၚ်- သြၚ်လောန်တိုၚ်(မ်)

ဗီုရုပ် – NUG