ပ္ဍဲပေါဲဗ္တိုက်ကျံက်တခါဂှ် လ္ပာ်ကံၚ်ဇြဳပၞာန် ဇီုကပိုက်ချိုတ်ဂၠိုၚ်ဒၟံၚ်

ကျံက်တခါ၊ အဝ်ဂါတ် (၁၁)

အပ္ဍဲပေါဲဗ္တိုက် မက္တဵုဒှ်လဝ် ဗ္ဒါဲကွာန်တမေန်အေန်ကုန်၊ ပွိုၚ်ဍုၚ်ကျံက်တခါ၊ ရးဗဂေါဂှ် လ္ပာ်ကံၚ်ဇြဳပၞာန် ဇီုကပိုက်ချိုတ်ဂၠိုၚ်လဝ်တုဲ သီဂိုၚ်ဂွံလဝ် သီုကဵုလွဟ်လက်နက်မကမ်တံရောၚ်ဂှ် ဂွံတီကေတ် နူကဵုဒေသပၞာန်သၠုၚ်ကျာ ဒေသပၞာန်ပါ် (၂) ရ။

အကြာဒပ်ကံၚ်ဇြဳပၞာန် မလုပ်စိုပ်ၜက်ၜေတ်ကၠုၚ် ကွာန်တမေန်အေန်ကုန်၊ ပွိုၚ်ဍုၚ်ကျံက်တခါဂှ်ကဵု တမ်ဒပ်ကောန်မာန်ဒိုဝ်တၟေၚ် KNLA/PDF တံဂှ် နူကဵုဂိတုအဝ်ဂါတ် စၟတ်တ္ၚဲ (၉) အခိၚ်နူဂယးပြဟ်ဟ်ဂှ်တုဲ ပေါဲဗ္တိုက်တံ စက္တဵုဒှ်လဝ်တုဲ အပ္ဍဲပေါဲဗ္တိုက်ဂှ် လ္ပာ်ဒပ်ကံၚ်ဇြဳပၞာန် ၃၀ ပြၚ်ချိုတ်အာတုဲ ဗွဲမဂၠိုၚ်ဂၠေၚ် ကလိဂွံလဝ်ဝပ်ရ။

ပေါဲဗ္တိုက်ဂှ်ဝွံ နူကဵုဒပ်ကံၚ်ဇြဳပၞာန်တံ ဟိုတ်နူလုပ်စိုပ်ၜက်ၜေတ်လဝ် ကွာန်တမေန်အေန်ကုန် ဂကောံဒပ်ပံၚ် ဂကောံဇြဟတ်ပၠန်ဂတးတံ မအုပ်ဓလီုလဝ်ဂှ်တုဲ ပေါဲဗ္တိုက်ၜါလ္ပာ် သ္ကာတ်မြဟ်လဝ်ရောၚ် ညးဒုၚ်တာလျိုၚ်လလောၚ်ပရိုၚ် ဒေသပၞာန်သၠုၚ်ကျာ ဒေသပၞာန်ပါ် (၂) ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

အပ္ဍဲပေါဲဗ္တိုက်ကွာန်တမေန်အေန်ကုန်ဂှ် လ္ပာ်ဒပ်ပံၚ်ကောံ KNLA/PDF တံဂှ် KNLA ၂ တၠ၊ PDF ကောန်မာန်ဒိုဝ်မွဲတၠ ပြဟ်လလုဲလဝ်တုဲ နူကဵုကံၚ်ဇြဳပၞာန်ဂှ် သီဂိုၚ်ဂွံလဝ် လွဟ်လက်နက် ၂၄ ဇကိုအ်၊ စက်ဂၠါဲမိုၚ် ၁ မ၊ ဖျေဲလွဟ် ၁၁ မ ကေုာံ မကမ်ဗွဲမဂၠိုၚ်ဂၠေၚ်ရ။

ပ္ဍဲကဵုပွိုၚ်ဍုၚ်ကျံက်တခါ၊ ရးဗဂေါဂှ် အကြာဂကောံဒပ်ပံၚ်ကောံ KNLA/ PDF တံကဵု ဒပ်ကံၚ်ဇြဳပၞာန် မလုပ်စိုပ်ချဳဒရာၚ်ဒၟံၚ်ပရေၚ်ပၞာန်တံဂှ် ပေါဲဗ္တိုက်ဆေၚ်မုက်တံ က္တဵုဒှ်ဒၟံၚ် မွဲဏှမွဲဏှတုဲ အပ္ဍဲလၟေၚ်ဒဒှ်ဏံဂှ် စွံလဝ်ပွန် ကုညးဍုၚ်ကွာန်ကောန်အရာပ်တံတုဲ လ္ပာ်ဒပ်ကံၚ်ဇြဳပၞာန် ပန်ပှော်လွဟ်ဇၞော်တံ၊ ရပ်ဒက်ဂစိုတ်ဂယိုၚ်တံဂှ် ကၠောန်ၜိုတ်ဒၟံၚ်ရောၚ် ဂွံတီကေတ် အတိုၚ်ဂလာန်ညးဒေသတံရ။

ပရိုၚ်−သြၚ်လောန်တိုၚ်(မ်)

ဗီု−Social Media