ယန္တယာအုပ်ဓုပ် အလဵုအသဳတွဵုရးကရေၚ်ဍာဲ စဂေတ်ဂြိပ်အာရဏောၚ်

လွိုၚ်ကဝ်၊ အဝ်ဂါတ် (၁၁)

သွက်ဂွံရေၚ်တၠုၚ် ကမၠောန်မရေၚ်တၠုၚ်ကဵုညးဍုၚ်ကွာန် ကေုာံ ပရေၚ်ဂီုကၠီု ဘဝပရေၚ်မၞိဟ်ညးဍုၚ်ကွာန် အပ္ဍဲတွဵုရးကရေၚ်ဍာဲတံ ဗွဲမစိုပ်တရဴမာန်ဂှ် ဒက်ပ္တန်ရေၚ်တၠုၚ်အာ ဌာန (၇) ရောၚ်ဂှ် ကံၚ်ဇြဳအုပ်ဓုပ်ရးကရေၚ်ဍာဲ အခိၚ်ကာလအကြာ (IEC) လလောၚ်ပ္တိတ်လဝ်ရ။

ပ္ဍဲကဵုဌာန မဒက်ပ္တန်ရေၚ်တၠုၚ်အာ သွက်ယန္တယာပရေၚ်အုပ်ဓုပ်တံဂှ် ဌာပရေၚ်ပညာ၊ ဌာနပရေၚ်ထတ်ယုက် ဌာနထံက်ပၚ်ပရေၚ်ဗ္စာရဏာမၞိဟ် ကေုာံ ပရေၚ်ကလေၚ်ပ္တန်ပ္တူ၊ ဌာနအပ္ဍဲဍုၚ်၊ ဌာနဂီုကၠီုစဵုဒၞါ၊ ဌာနကေၚ်ကာ ညးဗြဴ ကေုာံ ကောန်ၚာ်သၟတ်၊ ဌာနပရေၚ်ဘဏ္ဍာ ကေုာံ ဌာနအကံက်အခေါန်တံ ပါလုပ်ရ။

နကဵု IEC သွက်ဂွံဒက်ပ္တန် ဌာန (၇) ဏံ ကၠာဂိတုသေပ်တေမ်ဗာဂွိုအ်အိုတ်ဂှ် ပလေဝ်ပလေတ်ဒၟံၚ်တုဲ ပရေၚ်ဓမံက်ရုပ်ရဴတံဂှ် ပံၚ်တောဲကၠောန်ဒၟံၚ် ကုဂကောံဗော်သွး မဆေၚ်စပ်တံရောၚ်ဂှ် ပ္ဍဲဂိတုအဝ်ဂါတ် (၆) တေံ လလောၚ်ပ္တိတ်လဝ် ဗွဲမလုပ်သၞောဝ်ရ။

ဆ္ဂး စက်ယန္တယာအုပ်ဓုပ်ဂွံဂေတ်ဂြိပ်ဂှ် ဟိုတ်နူပေါဲဗ္တိုက်တံတုဲ အခက်အခုဲလ္ၚဵု နွံဒၟံၚ်ကီုလေဝ် နကဵုအလဵုအသဳမွဲမ္ဂး သွက်ဂွံကလိဂွံဓဝ်ပတှ်ေညးဍုၚ်ကွာန်တံဂှ် ဂ္စါန်ရေၚ်တၠုၚ်အာဏောၚ်ဂှ် ညးအုပ်ကာ ကံၚ်ဇြဳအုပ်ဓုပ်ရးကရေၚ်ဍာဲ အခိၚ်ကာလအကြာ IEC ဥူဗညာ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“ပေါဲဗ္တိုက်တံဂှ်တှ်ေ သွက်ဂွံကၠောန်ယန္တယာအုပ်ဓုပ်ဂှ် ပရေၚ်ဆက်စပ်တိုက်ရိုက်တံ နွံဒၟံၚ်ရ။ ဗွဲတၟေၚ် ကိစ္စသၞောဝ်ဥပဒေအုပ်လဒံတံ၊ ပရေၚ်ပညာ၊ ပရေၚ်ထတ်ယုက်တံ ကေုာံ လၟေၚ်ကမၠောန်ပရေၚ်ဗ္စာရဏာမၞိဟ်တံဂှ် သ္ကဵုက္တဵုဒှ်အခက်အခုဲ ကေုာံ လဇုဲလဇတံ ဍာံဍာံရ။ ဆ္ဂး မွဲလ္ပာ်တေံဂှ်လေဝ် ညအ်ဂှ် ဒှ်တၚ်ကော်ဆဴ သွက်ပိုယ်ရောၚ် ညာတ်ကေတ်တုဲ မွဲပၠန်ဂှ်လေဝ် ညအ်ဂှ် ကမၠောန် IEC ပိုယ်တံ ဂျိုၚ်တဴအာ အကြာအခက်အခုဲတံမာန်ဒၟံၚ်။ ဖ္ဍိုက်ဗပေၚ်တၚ်နွံပၟိက်ညးဍုၚ်ကွာန်တံ အကြာအခက်အခုဲမာန်ဂှ်လေဝ် အရာမသ္ကဵုဒှ်တဴဇြဟတ်ဂှ် နွံတၟာဂလိုၚ်ရ။ ပ္ဍဲအကာဲအရာပကတိ အုပ်ဓုပ်ညးဍုၚ်ကွာန်တံမာန်ဂှ် တော်ကဵုအုပ်ဓုပ်တွဵုရးမွဲမွဲ ပ္ဍဲအကြာအကာဲအရာမခက်ခုဲဒၟံၚ်တံၜိုတ်အစောန်စရာဲနွံဂှ်ဝွံ ပိုယ်တံ ကလိဂွံအာ တၚ်ဆဵုဂဗခိုဟ်ဟ်တံမာန်ဏောၚ်။ သွက်ညးဍုၚ်ကွာန်တံဂှ်လေဝ် ကလိဂွံအာ ဓဝ်ပတှ်ေတံမာန်ဏောၚ်ဂှ် ပိုယ်တံစၟဳကေတ်ရ” သာ်ဝွံ ညးသ္ဂးရ။

သ္အာၚ်နူဂှ်ပၠန် နကဵု IEC သွက်ယန္တယာပရေၚ်အုပ်ဓုပ် ဂွံဂေတ်ဂြိပ်မာန် ဂကောံဇြဟတ်ပရေၚ်ပညာတံ၊ ဂကောံဇြဟတ်ပရေၚ်ထတ်ယုက်တံ၊ ဂကောံမှာဇန်တံ၊ တၠပညာ၊ တၠဒါန်၊ ဂကောံဇြဟတ်ပၠန်ဂတးတံသၟးဟွံက ကု KSCC, NUG တံဂှ်လေဝ် ဆက်စၠောံလၟေၚ်ၚ်တုဲ ရေၚ်တၠုၚ်ပ္ညဳပ္ညပ်ဒၟံၚ်ရောၚ် ညးဆက်ဟီုရ။

နူကဵုဆက်စၠောံဒၟံၚ်သာ်ဏံဂှ် အကြာကၟိန်ဍုၚ်ကဵု တွဵုရး ပရေၚ်ဆက်စၠောံဇြဟတ်ခိုဟ်၊ ပရေၚ်ထ္မံက်ရုပ်ရဴ ဇြဟတ်သာခိုဟ်တံသၟးဟွံက အရီုဗၚ်ပရေၚ်ထံက်ပၚ် စပ်ကဵုနဲကွတ်ပညာ၊ စပ်ကဵုသြန်လှုဲတံဂှ်လေဝ် ကၠောန်ၜိုတ်ဒၟံၚ်ယျရောၚ် သ္ဂးရ။

ညးလ္ၚတ်သ္ၚဳဂၠိပ်ပရေၚ်ဍုၚ်ကွာန် ဥူတာန်သဵုနာၚ်ဂှ်လေဝ် အပ္ဍဲကာလပၠန်ဂတးဏံ ပွမဒက်ပ္တန်အလဵုအသဳတွဵုရးကရေၚ်ဍာဲဂှ်ဝွံ ပ္ဍဲအရာဒက်ပ္တန်ကၟိန်ဍုၚ်ပံၚ်ကောံဖေဝ်ဒရာဂှ် ဒှ်ရိုဟ်ကၞက်သ္ဇိုၚ်ဍေံရောၚ်ဂှ် သ္ၚဳဂၠိပ်လဝ်ရ။

“အလဵုအသဳကရေၚ်ဍာဲ အခိၚ်အကြာဏံဂှ်ဝွံ ဒုၚ်သ္ဇိုၚ်ကဵု လ္တူတၚ်တုပ်စိုတ် ပရေၚ်ပ္ညဳပ္ညပ်၊ ပရေၚ်စၞောန်ထ္ၜး အလဵုအသဳယာယဳ မဆေၚ်စပ်ကဵုအလုံဍုၚ်တံဂှ်တုဲ ဒက်ပ္တန်လဝ်ဂှ်ရ သွက်ဂွံဒက်ပ္တန်ကၟိန်ဍုၚ်ဖေဝ်ဒရာဒဳမဝ်ကရေဇြဳ မဗဳဇမဒှ်တဴသၞောဝ်အစာံဂှ် ဖျေံလဝ် ပ္ဍဲကဵုကရေၚ်ဍာဲမာန်ယျဂှ် ဒုၚ်ဂိုၚ်ကေတ်ရ” သာ်ဝွံ ညးသ္ဂးရ။

နကဵု IEC အခိၚ်ယန္တယာပရေၚ်အုပ်ဓုပ် ဂေတ်ဂြိပ်ဒၟံၚ်ဂှ် ကောန်ၚာ်အယဲမံၚ်ဘာသီုဖအိုတ် သ္ဂောံဂွံအခေါၚ်ဗ္တောန်ပညာဂှ်ကီု၊ ပရေၚ်မၚ်မွဲရံၚ်စံၚ်ပရေၚ်ထတ်ယုက်သ္ဇိုၚ် ညးဍုၚ်ကွာန်တံ သွက်ဂွံက္ဍစိုပ်ဂှ်ကီု၊ သွက်ညးဍုၚ်ကွာန်ဒေသတံကဵု ညးဍုၚ်ကွာန်ဒးဘဲပၞာန်တံ သွက်ဂွံကလိဂွံ ဇွောံမစၞစကာတၟေၚ်ကဵု ကပေါတ်မၞိဟ်အရပ်စပ်တံဂှ်လေဝ် ပ္တိတ်ဇြဟတ်ထ္မံက်အာရုပ်ရဴရောၚ်ဂှ် လလောၚ်တြးလဝ်ရ။

သ္အာၚ်နူဂှ်ပၠန် သွက်ဂီုကၠီုဘဝညးဍုၚ်ကွာန် ကေုာံ ပရေၚ်သၞောဝ်ဥပဒေအုပ်လဒံတံဂှ်တုဲ ဂကောံဒပ်ဗၠာဲသၟိၚ်တွဵုရးကရေၚ်ဍာဲ (KSP) မၞုံသၟဝ်ဌာနကာအပ္ဍဲဍုၚ်တံဂှ် ရေၚ်တၠုၚ်လဝ် ချိုတ်တ်ပၠိုတ်တ်ဂှ်ကီု၊ ဒက်ပ္တန်သၞောတ်စဳရေၚ်သၞောဝ်ဓဝ် ကေုာံ ရုၚ်သၞောဝ်ဓဝ်တံဂှ်ကီု၊ ဌာနအုပ်ဓုပ်ကာနာနာတွဵုရး အဆံၚ်ၚ်တံဂှ် ဆက်ထ္မံက်အာရုပ်ရဴ နူကဵုသၟဝ်တၚ်စၞောန်ကောပ်ကာဲ ကံၚ်ဇြဳအုပ်ဓုပ်အခိၚ်ကာလအကြာတံရောၚ်ဂှ် သ္ဂးလဝ်ရ။

ကံၚ်ဇြဳအုပ်ဓုပ်တွဵုရးကရေၚ်ဍာဲအခိၚ်ကာလအကြာ မစဒက်ပ္တန်လဝ်ကၠာအိုတ် ပ္ဍဲကဵုပၠန်ဂတးက္ညၚ်ဏံဂှ် စဒက်ပ္တန်လဝ် ပ္ဍဲကဵုဂိတုဂျောန် စၟတ်တ္ၚဲ ၆ ပ္ဍဲသၞာံဏံဂှ်တုဲ ပ္ဍဲကဵုကံၚ်ဇြဳဂှ် သီုကဵုဥက္ကဌမ္ဂး ကောန်ဂကောံ ၆ တၠပါလုပ်ရ။

တွဵုရးကရေၚ်ဍာဲဝွံ အပ္ဍဲအခိၚ်ဒပ်ပၞာန်သီအဝဵုဂှ် ဟိုတ်နူပရေၚ်ပၠန်ဂတးဒစဵုဒစး ဂကောံဇြဟတ်ပၠန်ဂတးတံဂှ်တုဲ ဒှ်တွဵုရး လ္ပာ်ကံၚ်ဇြဳပၞာန်တံ ဒးဗလးလဝ်တိဍာ်ဗွဲမဂၠိုၚ်မွဲရောၚ် မဒှ်ရ။

အပ္ဍဲကာလသီအဝဵုၜါသၞာံပြၚ်ဏံ ဟိုတ်နူပေါဲဗ္တိုက် မၞုံအပ္ဍဲတွဵုရးတံဂှ်ရ လၟိဟ်မၞိဟ် ၃ ဂအုံ ၂ ဂအုံ ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲတံကဵု ဒးမံၚ်တန်တဴဒၟံၚ် ပ္ဍဲကဵုဗ္ဒိုပ်ပါဲဒဴဘဲပၞာန်တံရောၚ်ဂှ် ဂွံတီကေတ် အတိုၚ်တၚ်လလောၚ်တြး ဂကောံအပ္ဍဲဒေသတံရ။

ပရိုၚ်−သြၚ်လောန်တိုၚ်(မ်)

ဗီု−Social Media