ဟိုတ်သ္ဒးဒ္ဂေတ်ဗက် လိက်ကသုက် NCA ဟွံမွဲပုဟ်ဂှ် KNU ဟီု

ကအ်ကြိက်၊ အဝ်ဂါတ် (၁၁)

ၜိုန်ရလုပ်ထ္ပက်လဝ်စၟတ်တဲ ပ္ဍဲလိက်ကသုက် ဒေါအ်ပန်ပှော်အလုံဍုၚ် (NCA) ဂှ်ကီုလေဝ် ဟိုတ်နူကံၚ်ဇြဳပၞာန် ဖံက်ပ္ကဝ်စေဝ်ပၞောန်လိက်ကသုက်ဂှ်တုဲ သ္ဇက်ဂွံဒ္ဂေတ်ဗက်ဟွံမွဲပုဟ်ဂှ် KNU ခၠေဝ်ပၠန်လဝ်ရ။

တ္ၚဲဏံ ပ္ဍဲဂိတုအဝ်ဂါတ် ၁၀ ဏံ ပ္ဍဲကဵုပေါဲသောၚ်ကလးလိက်ပရိုၚ် ဗော်သွးကောန်ဂကူကရေၚ် KNU မကၠောန်သ္ပလဝ် နူကဵုအောန်လာၚ်ဂှ် ပ္ဍဲအရာသၟာန်သၟုက်လစွံစိုတ် လ္တူလိက်ကသုက် NCA ဂှ် ဂအုပ်ညးအုပ်ကာနာနာ KNU ပဒိုဝ်သဝ်တာဒိုဝ်မှူ ဟီုဂးလဝ် သာ်ဏံရ။

ပဒိုဝ်သဝ်တာဒိုဝ်မှူဂှ် ဟိုတ်နူဒပ်ကံၚ်ဇြဳပၞာန်တံ လိုန်ပစာ်ပလီုပလာ်ထောံ သ္ဇိုၚ်မူ အခန် (၁) မဒှ်လမျီုလိက်ကသုက် NCA ဂှ်ရ လိက်ကသုက် NCA ဟွံမွဲရတုဲ နကဵု KNU သ္ဇက်ဂွံဒးဒ္ဂေတ်ဗက်ဟွံမွဲရပုဟ်ဂှ် သ္ဂးရ။

ဟိုတ်ဂှ်ရ ရပ်စပ် NCA တုဲ ဗ္ဂေတ်လှန်ဍုၚ်သ္အာၚ်တံကဵုဒှ်၊ ဗ္ဂေတ်လှန်ညးဍုၚ်ကွာန်တံကဵုဒှ် ပ္ဍဲကဵုကိစ္စကၠောန်လဝ်သာ်ဏံဂှ် နကဵုဗော်သွးကောန်ဂကူကရေၚ် KNU တံ မုမှဟွံဆေၚ်စပ်ပုဟ်ဂှ် ပဒိုဝ်သဝ်တာဒိုဝ်မှူ ဟီုရ။

“စပ်ကဵု NCA တုဲ ပိုယ်တံသ္ဇက်ဂွံဒ္ဂေတ်ဗက် ဟွံမွဲရပုဟ်။ မူဟိုတ်ရောဟီုတှ်ေ လိုန်ပစာ်ပလီုပလာ်ထောံ သ္ဇိုၚ်မူ အခန် (၁) မဒှ်လမျီု NCA ဂှ် ဒပ်ပၞာန်ရဏောၚ်။ ဟိုတ်ဂှ်ရ အခန် (၁) NCA ဂှ် ဒှ်လမျီု NCA တုဲ ဒၟါနူပလီုပလာ်ထောံယျဂှ်ရ NCA ဏံ ဟွံမွဲရပုဟ်။ ဟိုတ်ဂှ်ရ ရပ်စပ် NCA တုဲ ဗ္ဂေတ်လှန်ဍုၚ်သ္အာၚ်တံကဵုဒှ်၊ ဗ္ဂေတ်လှန်ညးဍုၚ်ကွာန်တံကဵုဒှ် ယဝ်ရကၠောန်ကၠုၚ်မ္ဂး ဟွံဆက်စပ်ကဵုပိုယ်တံပုဟ်ဂှ် မိက်ဂွံဟီုရ” သာ်ဝွံ ညးသ္ဂးရ။

က္ဍိုပ်သ္ကိုပ်ပၞာန်သီအဝဵုဂှ် နကဵု EAO လ္ၚဵုတံ ဒ္ဂေတ်ဗက်တၚ်တုပ်စိုတ် NCA တံ ဟွံမွဲတုဲ ဟိုတ်နူပါလုပ်ဒၟံၚ် ပ္ဍဲကဵုကမၠောန်ပကီုပရာပ်တံဂှ်တုဲ ပြဝပကီုပရာပ် PDF တံ သာတုဲပရေံကၠုၚ်လဝ်ရောၚ်ဂှ် ပ္တိုန်ဒုဟ်စောဲစပ်လဝ်ရ။

ဟိုတ်ဂှ်ရ ပ္ဍဲအရာရေၚ်တၠုၚ် ပရေၚ်ဖောအ်ဗြေဝ်တောတက်၊ ပရေၚ်သၞောဝ်ဥပဒေအုပ်လဒံ၊ ပရေၚ်ညိၚ်ဝတ် ပ္ဍဲကဵုဒေသလ္ၚဵုတံဂှ် အရာမလဇုဲလဇတံ နွံလဝ်ရောၚ် က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် ဟီုဂးလဝ် အပ္ဍဲကောံဓရီုကံၚ်ဇြဳပၞာန် မကၠောန်ဗဒှ်လဝ် ပ္ဍဲကဵုဂိတုအဝ်ဂါတ် (၇) တေံရ။

ပ္ဍဲကဵုသ္ဇိုၚ်မူ အခန် (၁) လိက်ကသုက် NCA ဂှ် ပ္ဍဲပရေၚ်ဒက်ပ္တန်ကၟိန်ဍုၚ်ပံၚ်ကောံဖေဝ်ဒရာဒဳမဝ်ကရေဇြဳဂှ် ပြသၞာပရေၚ်ဍုၚ်ကွာန်တံဂှ် ညံၚ်ဟွံဂွံသောၚ်ကလးကဵု ပရေၚ်ပၞာန်ဂှ်ကီု၊ သွက်ဂွံဒက်ပ္တန် ဒပ်ပၞာန်ကၟိန်ဍုၚ်ဖေဝ်ဒရာ ကောန်ဍုၚ်အရၚ်ဂကူဇဳတံပါလုပ်တံဒှ်တမ် (၁၁) တၚ် ပါလုပ်ရ။

ဗော်သွးကောန်ဂကူကရေၚ် KNU ဂှ်ဝွံ ပ္ဍဲကဵုလက်ထက်အလဵုအသဳ သမ္မတဥူတုၚ်ဇြုၚ်ဂှ် ၜိုန်ရထ္ပက်လဝ်စၟတ်တဲ NCA ကီုလေဝ် ကြဴနူပရေၚ်ပၞာန်သီအဝဵုကလေၚ်မွဲဝါပၠန်တုဲဂှ် ဒှ်ဂကောံရပ်လွဟ်ကောန်ဍုၚ်အရၚ် မပါလုပ်ဒၟံၚ် ပ္ဍဲကဵုပေါဲဗ္တိုက်ထပိုတ်ရိုဟ်ကၞက် သၞောတ်တၠအဝဵုပၞာန်တံဂှ်ရ။

ပ္ဍဲကဵုသၞာံဏံ အပ္ဍဲပွိုၚ် ၆ ဂိတုကၠာဂှ် ပ္ဍဲကဵုတိဍာ်အုပ်ဓုပ်ကဝ်တူလေဝ်ဂှ် အကြာဒပ်ကံၚ်ဇြဳပၞာန်ကဵု ဂကောံဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် (KNLA) ၊ ဂကောံဒပ်စဵုဒၞါကောန်ဂကူကရေၚ် (KNDO) တံဂှ် ပေါဲဗ္တိုက်အပံၚ် စဵုကဵု ၂၀၀၀ ပြၚ် က္တဵုဒှ်လဝ်ရောၚ် KNU ဗဟဵု လလောၚ်ပ္တိတ်လဝ်ရ။

ပရိုၚ်−သြၚ်လောန်တိုၚ်(မ်)

ဗီု−KNU