သၞေဟ်ကၚ်ကံၚ်ဇြဳပၞာန် ပ္ဍဲမျာၚ် ၜါသၞေဟ် ဒးဒုၚ်ဗတိုက်လဝ်

မျာၚ်-အဝ်ဂေတ်(၁၂)

ပန်ဗတိုက်လဝ် သၞေဟ်ကၚ်ကံၚ်ဇြဳပၞာန် ပွိုၚ်ဍုၚ်မျာၚ်၊ ရးဒေသမဂွေ ၜါသၞေဟ် နကမ်လှောဝ်တက်ယှတ် သီုကဵုလွဟ်ဇၞော်ရဂှ် (ပကဖ)မျာၚ် လလောၚ်တြးလဝ်ပရိုၚ်ရ။

ဂိတုအဝ်ဂေတ်တုဲကၠုၚ် စၟတ်တ္ၚဲ (၈)တေံဂှ် သၞေဟ်ကၚ်အၚ်ဝ ကဵုသၞေဟ်ကၚ် ပခုက္ကူ မၞုံဍုၚ်မျာၚ်ဂှ် သုၚ်စောဲ တက်ယှတ် ၈၀-မမ၊ ၁၂၀ မမ ပါသီုအထောဋ် (၅၀) မပြၚ်တုဲ ဟိုတ်နူဗတိုက်ပန်လဝ်ဂှ်ရ လ္ပာ်ကံၚ်ဇြဳပၞာန် ဇီုကပိုက်ဒးလဝ်ဘဲဝပ်နွံလဝ်ရ။

“ဂကောံဗိုလ် Cross၊ ဗိုလ်လေန်ယုမ်တအ် က္ဍိုက်က္ဍိုပ်တုဲ နကဵုတၚ်ပ္ညုၚ်ဂၠံၚ်တရဴ ဂကောံကောပ်ကာဲဗျူဟာဒေသအညာ (Anyar Region Strategic & Military Command ) ရ။ ဒတုံစှ်ေပါ်ခတိုဟ်လဝ် ဗ္ဒာဲသၞေဟ်အၚ်ဝ၊ သၞေဟ်ပခုက္ကူရ”ဂှ် ညးတာလျိုၚ်(ပကဖ)မျာၚ်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။

ဟိုတ်နူပန်ဖျေံလဝ် သၞေဟ်ကၚ်စၟဳစၟတ်ကံၚ်ဇြဳပၞာန်ဗီုဏံတုဲ ဇီုကပိုက်ဒးလဝ်ဘဲဝပ် (၃)တၠရဂှ် ဟီုလဝ်တုဲ နကဵုသြၚ်လောန်တိုၚ်(မ်) သ္ပဒ္တန်တၞဟ်ခြာ ဟွံမာန်ဏီရ။

လ္ပာ်ကံၚ်ဇြဳပၞာန်ဂှ်မ္ဂး ဟိုတ်နူသၞေဟ်ကၚ်စၟဳစၟတ်ဍေံတအ် ဒးဒုၚ်ဗတိုက်လဝ်တုဲ သုၚ်စောဲ လွဟ်လက်နက်စက်၊ ၈၁ – မမ ကေုာံ ၆၀ မမတုဲ ၜိုန်ကလေၚ်ပန်ပှ်ောလဝ်ကီုလေဝ် ကောန်ဒပ်စဵုဒၞာညးဍုၚ်ကွာန်တအ် ဇီုကပိုက်ဒးလဝ်ဘဲဝပ်ဟၟဲ ဆုတ်က္လေၚ်မာန်လဝ်ရဂှ် ဂွံတီကေတ်ရ။

ပ္ဍဲပရေၚ်ဗတိုက်ပန်ဏံ ဒပ်စဵုဒၞာညးဍုၚ်ကွာန် ပွိုၚ်ဍုၚ်မျာၚ်၊ ဗိုလ်လေန်မွေ/တံဒပ်ခရိုၚ်(၁၃)၊ MVP၊ မဟူရာအလေန်တာန်၊ ဇာမဏဳ၊ M ဒေါၚ်နဳ၊ တုက်ဂျဳ ကေုာံ DMG တအ်ပံၚ်တောဲတုဲ ဗတိုက်လဝ်ရဂှ် ဂွံတီကေတ်ရ။

သၠုၚ်ပ္တိုန်အသိၚ်ဗတိုက်အာ ကောန်ဒပ်ကံၚ်ဇြဳပၞာန် သ္ပမာန်ဍဵုဍိုက်ပျဲပျာံဒၟံၚ်ညးဍုၚ်ကွာန်တအ် အတိုၚ်တၚ်စၞောန်ပ္ညုၚ်ဂၠံၚ်တရဴ ဂကောံကောပ်ကာဲမဟာဗျူဟာ ဒေသအညာ (Anyar Region Strategic & Military Command ) ရောၚ်ဂှ် ဓမံက်ထ္ၜးလဝ် ပ္ဍဲတၚ်လလောၚ်တြး (ပ.က.ဖ) မျာၚ်ရ။

ပရိုၚ် – သြၚ်လောန်တိုၚ်(မ်)

ဗီုရုပ် – (ပ.က.ဖ) မျာၚ်