ကောန်အရာပ် ပ္ဍဲခရိုၚ်ညံၚ်လေဝ်ပေန် (၅) တၠဒးဒုၚ်ရပ်ဒက် ပြိုက်ဂစိုတ်လဝ်

ညံၚ်လေဝ်ပေန်၊ အဝ်ဂေတ်(၁၂)

ပ္ဍဲတိဍာ်ထိၚ်ဒဝ်ကဝ်ဒူလေဝ် ခရိုၚ်ညံၚ်လေဝ်ပေန် တိဍာ်ဒပ်မဟာ (၃)ဂှ် ဂိတုဂျူလာၚ်တုဲကၠုၚ် ပွိုၚ်မွဲဂိတုဂှ် ဒပ်ကံၚ်ဇြဳပၞာန် ထ္ပက်လုပ်ကၠုၚ်ကရေၚ်ပၞာန် ရပ်ဒက်ပြိုက်ဂစိုတ်ဏာ ကောန်အရာပ်ညးဍုၚ်ကွာန် (၅)တၠရဂှ် ဗဟဵု KNU လလောၚ်တြးလဝ် ပရိုၚ် ပ္ဍဲဂိတုအဝ်ဂေတ် စၟတ်တ္ၚဲ (၁၁)ရ။

ပ္ဍဲတိဍာ်ဒပ်မဟာ (၃) ခရိုၚ်ညံၚ်လေဝ်ပေန် KNU ဂှ် ဟိုတ်နူတံဒပ်သၟဝ်တဲကံၚ်ဇြဳပၞာန် ဟွံအောန်နူ (၁၃)တံဒပ် ထ္ပက်လုပ်ကၠုၚ်ကရောၚ်ပၞာန်တုဲ ဒှ်လဝ်ပေါဲဗတိုက်ကဵု ဒပ်ပၞာန်ဗၠးၜးကောန်ဂကူကရေၚ် KNLA၊ ဒပ်ပၞာန်စဵုဒၞာကောန်ဂကူကရေၚ် KNDO အပံၚ်လၟိဟ်ပေါဲဗတိုက် ဗ္ဒာဲ (၁၀၀) ဝါက္တဵုဒှ်လဝ်ရ။

ပ္ဍဲပေါဲဗတိုက်ၜါလ္ပာ်ဂှ် ဒပ်ကံၚ်ဇြဳပၞာန် ရပ်ဒက်ပျဲပျာံကောန်အရာပ်ညးဍုၚ်ကွာန် (၂၄) တၠတုဲ ပြိုက်ဂစိုတ်လဝ် သီုဟိုတ်ဟၟဲမွဲသာ် (၂)တၠတုဲ စံၚ်ဂစိုတ်လဝ် (၃)တၠရဂှ် ဓမံက်လဝ် ပ္ဍဲတၚ်လလောၚ်တြးရ။

ပ္ဍဲပေါဲဗတိုက်ဂှ် ဒပ်ကံၚ်ဇြဳပၞာန် ပ္တဝ်လဝ်ကဵုကောန်ဍုၚ်ကွာန်တုဲ ပန်ဖျေံလဝ်လွဟ်ဇၞော် ပ္ဍဲကွာန်အပံၚ်လၟိဟ် ၃၀၀ မပြၚ်တုဲ ကွးဘာ ၂ တၠ သီုညးဍုၚ်ကွာန် ဟွံအောန်နူ ၂၀ တၠ ဇီုကပိုက်ဒးလဝ်ဘဲဝပ်ရဂှ် ဟီုသ္ဂးလဝ်ရ။

သ္အာၚ်နူဂှ်ပၠန် ဒပ်ကံၚ်ဇြဳပၞာန် လုပ်စိုပ်ကွာန်တုဲ သ္ၚိဒၟံၚ်ညးဍုၚ်ကွာန် ၄၄ မ၊ ကွဳလိုန်ဓာတ် ၇ မ၊ ဟၚ်သြောံ ၁၆ မ၊ ရုၚ်အှော် ၂၃ ရုၚ်၊ စက်ပၟတ် ၁ မ စံၚ်ပလီုလဝ်တုဲ သြန် (၂) ကိုတ်၊ ဖုၚ် (၁) မဂှ်လေဝ် သီကေတ်လဝ်ရဂှ် ဓမံက်လဝ်ပ္ဍဲတၚ်လလောၚ်တြးရ။

ပ္ဍဲပေါဲဗတိုက်ဂှ် လ္ပာ်ဒပ်ကံၚ်ဇြဳပၞာန် ပါလုပ်သီုသ္ကိုပ်ဒပ်လ္ပာ် ဒးချိုတ်လဝ် (၁၆၆)တၠနွံတုဲ ဒးလဝ်ဘဲဝပ် (၁၄၃) တၠ လ္ပာ်ဒပ်သၟဝ်တဲဒပ်မဟာ (၃) ဂှ်မ္ဂး ဒးချိုတ်လဝ် (၂) တၠတုဲ ဒးလဝ်ဘဲဝပ် (၂)တၠရဂှ် KNU လလောၚ်တြးလဝ်ရ။

ပ္ဍဲပေါဲဗတိုက် ဂိတုဂျူလာၚ်ဂှ် လွဟ် (၁၁) ဒကိုအ်၊ ဖျေဲမကမ်၊ မကမ်လွဟ်အမၠံက် ကပေါတ်အသုၚ်စောဲပၞာန်လေဝ် ဒပ်သၟဝ်တဲ KNLA ဒပ်မဟာ (၃) သီဂွံလဝ် နူဒပ်ကံၚ်ဇြဳပၞာန်တုဲ ဇြောလာ (၅)ဂတှ်ေ တာဲ (၃) မ ဂှ်လေဝ် ပလီုပလာ်မာန်လဝ်ရဂှ် ဓမံက်ထ္ၜးလဝ်ရ။

ပရိုၚ် – သြၚ်လောန်တိုၚ်(မ်)

ဗီုရုပ် – KNU