သၞောတ်စဳရေၚ်ဂဗုတ်ဍုၚ်ဗမာဗဗွဲဓဝ်ဟွံမွဲ ပ္ဍဲလက်ထက်ကံၚ်ဇြဳပၞာန်ဏံ

လ္ဂုၚ်၊ အဝ်ဂါတ် (၁၂)

ကြဴနူဒပ်ပၞာန်သီအဝဵုတုဲ သၞောတ်စဳရေၚ်ဂဗုတ်ဍုၚ်ဗၟာဝွံ ကလေၚ်ဆုတ်အာ သၞောတ်စဳရေၚ်ဂဗုတ် ဟွံမွဲကဵုဗဗွဲဓဝ်တံဂှ်ယျဂှ် ဂကောံမၚ်မွဲရီုဗၚ် ကောန်ထံၚ်ပရေၚ်ဍုၚ်ကွာန် (AAPP) ကေုာံ ညးရေၚ်တၠုၚ်ဂဗုတ်ကၠတ်ထဝ်ဝှ်ကြံၚ်တံ ပါ်ပါဲလဝ်ရ။

ပ္ဍဲကဵုလိက်ဒုၚ်စဳရေၚ် “ဍုၚ်ဟွံမွဲကဵုသၟိၚ်” AAPP မလလောၚ်ပ္တိတ်လဝ် ပ္ဍဲဂိတုအဝ်ဂါတ် (၇) ဂှ် ဒပ်ပၞာန်ရပ်ထိၚ်လဝ် သၞောတ်စဳရေၚ်ဂဗုတ် ပေၚ်ၚ်တုဲ နကဵုပရေၚ်စဳရေၚ်ဂဗုတ် ဟွံမွဲကဵုဗဗွဲဓဝ်ဂှ် ဖျေံစၟတ်ဒၟံၚ်ဒုဟ်ဒဏ် လ္တူကောန်ထံၚ်ပရေၚ်ဍုၚ်ကွာန်တံ အဆက်က်ဂှ် က္တဵုဒှ်ဒၟံၚ်ရောၚ် သ္ဂးရ။

ညးရေၚ်တၠုၚ်ဂဗုတ်ကၠတ်ထဝ်သၞောဝ်ဓဝ်ဝှ်ကြံၚ် ဥူကျဳမျေတ်ဂှ် ကြဴနူဒပ်ပၞာန်သီအဝဵုတုဲ ပရေၚ်စဳရေၚ်ဂဗုတ်ဂှ်ဝွံ ဓဝ်ဍာံဟွံမွဲရတုဲ ဟွံဂွံအခေါၚ်ခၠေဝ်ပလန်ဒစဵုဒစး ရုမ်မ်ဂပ်ပ်မွဲသာ် ဒးဒုၚ်ဖျေံဒၟံၚ်ဒုဟ်ဒဏ် သၠုၚ်အိုတ်တံရောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“ကြဴနူဒပ်ပၞာန်သီအဝဵုတုဲ ပရေၚ်စဳရေၚ်ဂဗုတ်ဟီုဂှ် ဓဝ်ဍာံဂှ်ဟွံမွဲရပုဟ်။ ဗီုဍေံတံဒးစိုတ် ဒုဟ်ဒဏ်တံဂှ် ဟွံကဵုအခေါၚ်ခၠေဝ်သှ် ရုမ်မ်ဂပ်ပ်မွဲသာ် ဒုဟ်ဒဏ်ဂမၠိုၚ်ဂှ် ဖျေံဒၟံၚ်ဒုဟ်သၠုၚ်အိုတ်တံဏောၚ်။ ညာတ်သာ်ဏံမ္ဂး တၚ်လလောၚ်တြး AAPP ဂှ် ဒးမံၚ်ရ။ ဟိုတ်ဂှ်ရ စပ်ကဵုညအ်တုဲ ပိုယ်တံ ဒစဵုဒစးဒၟံၚ်။ အခိၚ်ဥူထောန်န်ဥူနွံဂှ်လေဝ် ဒၟါနူဥူထောန်န်ဥူတုဲ ညးဂှ်လေဝ် ဗိုလ်ပၞာန်ရဏောၚ်။ ပ္ဍဲလက်ထက်ညးဂှ်လေဝ် မုမှဟွံတောတက်ကၠုၚ်ပုဟ်။ လၟုဟ်ဥူတာဌဂှ်ေလေဝ် သ္ကိုပ်ဗိုလ်ရဏောၚ်။ တောတက်ကၠုၚ်ကွေံကွေံဂှ် နွံဟွံသေၚ်ပုဟ်ဂှ် ပိုယ်တံ ညာတ်သာ်ဏံရ “ သာ်ဝွံ ညးဟီုရ။

ဥူထောန်န်ဥူ မကေတ်လဝ်တာလျိုၚ် နဒဒှ်သ္ကိုပ်နာဲဗ္စာကၟိန်ဍုၚ် လက်ထက်အလဵုအသဳဒဳမဝ်ကရေဇြဳၜါအဆက်ဂှ်ကဵု စဵုကဵုသၞာံသီအဝဵု ၜါသၞာံဘာ်ပြၚ်ဏံဂှ် ကံၚ်ဇြဳပၞာန် ထပ်ပပဵုပ္တိုန်အာယုက်ကာလကာတၟေၚ်တုဲ ပ္ဍဲဂိတုအဝ်ဂါတ် စၟတ်တ္ၚဲ (၂) ဂှ် နကဵုဟိုတ်ပရေၚ်ထတ်ယုက်ဂးတုဲ ပ္တိတ်ထောံလဝ် နူကဵုတာလျိုၚ်ရ။

ပ္ဍဲအရာဒးဆေၚ်မုက်ကုသၞောဝ်ဓဝ် လက်ထက်ကံၚ်ဇြဳပၞာန်ဏံဂှ် မၞိဟ်ဒးဒုၚ်ရပ်ဒက် နကဵုဒုဟ်ဒဏ်ပရေၚ်ဍုၚ်ကွာန်မွဲမွဲသာ်တံဂှ် ပလံၚ်ပ္ဍဲဒၞါဲစၟဳတ်တံတုဲဗက် ပလံၚ်ဏာ ဗ္ဒိုပ်ဗၠာဲသၟိၚ်ပွိုၚ်ဍုၚ် မဒးဒုၚ်ရပ်ထိၚ်လဝ်ကၠာအိုတ်ဂှ်နွံတုဲ ပ္ဍဲကဵုအမှုလ္ၚဵုတံဂှ် ပလံၚ်လဝ်ပ္ဍဲထံၚ်စာတ်တံ တိုက်ရိုက်ရ။

ကြဴနူဂှ်တုဲ ဂကောံဒပ်ဗၠာဲသၟိၚ်တံ စရေၚ်တၠုၚ်လဝ် ပရေၚ်စောဲစပ်တံဂှ်တုဲ လၟေၚ်ကမၠောန်ရုၚ်သၞောဝ်ဓဝ်ဍာံဍာံတံဂှ် ကလၚ်ပၚ်မှိၚ်လဝ် ပ္ဍဲကဵုရုၚ်သၞောဝ်ဓဝ်ခရိုၚ်ဟွံသေၚ်တုဲ စၟဳတ်ကလၚ်လဝ် ပ္ဍဲကဵုရုၚ်သၞောဝ်ဓဝ်ဗွဲတၟေၚ် မကၠောန်လဝ်ယာယဳ အပ္ဍဲထံၚ်စာတ်တံဏောၚ်ဂှ် ကောန်ထံၚ်ပရေၚ်ဍုၚ်ကွာန် မဗၠးကၠုၚ်တံ သ္ဂးအိုတ်ရ။

ညးရေၚ်တၠုၚ်ဂဗုတ်ကၠတ်ထဝ်ဝှ်ကြံၚ်မွဲတၠ မဗက်ကဵုဒၟံၚ်ဂဗုတ် ဒုဟ်ဒဏ်ပရေၚ်ဍုၚ်ကွာန် လ္ဂောံကဵုသၞောဝ်ဂှ်လေဝ် ပ္ဍဲလက်ထက်ကံၚ်ဇြဳပၞာန်ဏံ သၞောတ်စဳရေၚ်ဂဗုတ် လီုလာ်ကၠုၚ်တုဲ ပရေၚ်သၞောဝ်ဥပဒေအုပ်လဒံတံလေဝ် ဍိုန်လျအာယျဂှ် ထံက်ထ္ၜးလဝ်ရ။

“သၟာဗ္ၚ ၜိုတ်လဵုကေက်က် ဆုတံ၊ ဒုန်တံ ဟွံခိုဟ်မ္ဂး သ္ၚိခိုဟ်ဟ်ဂှ် ဂွံဟွံမာန်ပုဟ်။ လအာတုပ်သာ်ဏံကီုရ ညးရေၚ်တၠုၚ်ဂဗုတ်သာ်လဵုခိုဟ်ဟ် ၜိုတ်သၞောဝ်အုပ်လဒံနွံဂှ်ရ ပိုယ်တံဂၠါဲဓဝ်ဍာံဂွံဏောၚ်။ ဗၞတ်ဗ္ၜတ်သၞောဝ်အုပ်လဒံဂှ် မၞးတံလေဝ် တီဒၟံၚ်ရ။ ဟိုတ်ဂှ်ရ ၜိုတ်ဗ္ၜတ်သၞောဝ်အုပ်လဒံနွံရဂှ် ပိုယ်တံ ထ္မံက်ပ္တိတ် ဓဝ်ဍာံတံဂွံဏောၚ်။ ဂွံအောန် ဂွံဂၠိုၚ်ဂှ်တုဲ ဓဝ်ဍာံဂှ်တှ်ေ သ္ၚောဲဒၟံၚ်ဏီဏောၚ် “ သာ်ဝွံ ညးသ္ဂးရ။

ပ္ဍဲကဵုပွိုၚ်ဍုၚ် မဒးဒုၚ်လလောၚ်တြးလဝ် ပရေၚ်အုပ်ဓုပ်ပၞာန်တံဂှ် ကောန်ထံၚ်ပရေၚ်ဍုၚ်ကွာန်တံ ဒးဒုၚ်ပလံၚ် ပ္ဍဲရုၚ်သၞောဝ်ဓဝ်ပၞာန်တိုက်ရိုက်တံတုဲ သွက်ဂွံဂွံညးရေၚ်တၠုၚ်ဂဗုတ်တံဂှ်လေဝ် ဒးဒုၚ်ကယျာန်ပါဲလဝ် နွံဒၟံၚ်ရ။

ပ္ဍဲကဵုရုၚ်သၞောဝ်ဓဝ်လ္ပာ်အရာပ် အပ္ဍဲထံၚ်တံဂှ် ကုညးမဒးဒုၚ်ရပ်ထိၚ်လဝ်တံဂှ် သွက်ဂွံစဵုဒၞါ သွက်ဂဗုတ်ညးတံဂှ်တုဲ သွက်ဂွံဂွံညးရေၚ်တၠုၚ်ဂဗုတ်ဂှ် ကဵုလဝ်အခေါၚ်ကီုလေဝ် ဟိုတ်နူဒပ်ပၞာန်ထိၚ်ဒက်လဝ်ပေၚ်ၚ်ဖိုဟ်ဂှ်ရ ပရေၚ်စဳရေၚ်ဂဗုတ်ဗဗွဲဓဝ်ဂှ် ကလိဂွံဟွံသေၚ်ပုဟ်ဂှ် လိက်ဒုၚ်စဳရေၚ် AAPP ထံက်ထ္ၜးလဝ်ရ။

ဥူကျဳမျေတ်ဂှ် နာဲဗ္စာနူကဵုလ္ပာ်ပၞာန် လ္ပာ်အရာပ်တံဂှ် ၜိုန်ရသ္ပတဴဇြိုဟ်နက် ကုတၚ်စောဲစပ် နူကဵုမၞိဟ်စောဲဂဗုတ်တံဂှ်ကီုလေဝ် တၚ်ခၠေဝ်သှ် နူကဵုညးဒးဒုၚ်စောဲဂဗုတ်တံဂှ် ဟွံသ္ပတဴဇြိုဟ်ဟ်နက်က်မွဲသာ် ဗီုဒးစိုတ်ကၠောန်ဒၟံၚ်ရောၚ်ဂှ် ဟီုရ။

“နူကဵုလ္ပာ်မၞိဟ်စောဲဒုဟ်တံ စောတ်စောဲလဝ်ဂှ်ရ နာဲဗ္စာလ္ပာ်ပၞာန်တံ နာဲဗ္စာလ္ပာ်အရာပ်တံ သ္ပတဴဇြိုဟ်ဟ်နက်က်တုဲ ကလၚ်အိုတ်ရ။ တၚ်ခၠေဝ်သှ် နူကဵုလ္ပာ်ညးဒးဒုၚ်စောဲဒုဟ်တံ သက်သဳတံဂှ် ဟွံစွံလဝ်ဇြိုဟ်ဟ်နက်က်ပုဟ်။ ပ္ဍဲကဵုဂဗုတ်ဒဝ်အံၚ်သာန်သုကျဳတံ၊ ဥူဝေန်မျေတ်တံဂှ်လေဝ် ဒၟါနူဒှ်ပူဂဵုတံဏံတုဲ ကလၚ်ကဵုဒၟံၚ် တၚ်ခၠေဝ်သှ်တံဏီရ။ တုဲလေဝ်တုဲဂှ် ဗီုမိက်ဂွံကၠောန်ဂှ်ရ ကၠောန်ဒၟံၚ်။ ပရေံဂှ်တှ်ေ အရာမခၠေဝ်သှ် နူကဵုရုၚ်သၟဝ်ဏံ ရုၚ်လဒေါဝ်တံဏံဂှ်တှ်ေ ဟွံကလၚ်ဟဂှ်ရ။ သက်သဳနူကဵုလ္ပာ်ဗၠာဲသၟိၚ်တံ ရဲစောဲလဝ်ဂဗုတ်တံဂှ် ဍေံတံစၟဳတ်တုဲယျဂှ်ဗက် ဒုဟ်နွံဟာ ဟွံမွဲဟာသၟာန်လွာဲဂှ်တုဲ ယဝ်ရဒုဟ်နွံမ္ဂး ဖအောန်ဖျေံကဵုညိညဏောၚ်။ ဒုဟ်ဟွံမွဲပုဟ်ဟီုမ္ဂး ဖျေံဒုဟ်ဒဏ်သၠုၚ်အိုတ်ဏောၚ်ဂးတုဲ ဘပဠဒၟံၚ်ဏီ။ ဗီုတံဏံလေဝ် နွံ “ သာ်ဝွံ ညးသ္ဂးရ။

မွဲလ္ပာ်ပၠန်ဂှ်လေဝ် ကြဴနူပရေၚ်ပၞာန်သီအဝဵုကလေၚ်မွဲဝါပၠန်တုဲဂှ် ညးရေၚ်တၠုၚ်ဂဗုတ်အခေါၚ်အရာမၞိဟ်တံဂှ် ဟိုတ်နူထံက်ပၚ်ရီုဗၚ်ကဵု ကောန်ထံၚ်ပရေၚ်ဍုၚ်ကွာန်တံကဵု ဂြောဝ်ဂတာညးတံ နကဵုအရီုဗၚ်သၞောဝ်ဓဝ်တံဂှ်တုဲ ဒှ်ကၠုၚ်လဝ် ပွန်ဒပ်ပၞာန်ရ။

နကဵုဒပ်ပၞာန် ကုညးရေၚ်တၠုၚ်ဂဗုတ်အခေါၚ်အရာမၞိဟ် မကဵုဒၟံၚ်ပရေၚ်ရေၚ်တၠုၚ်ကေၚ်ကာသၞောဝ် ဒုဟ်ဒဏ်ပရေၚ်ဍုၚ်ကွာန်သာ်လဵုဟွံဟီု ဒးဒုၚ်ရပ်စပ်ဏောၚ် သာ်ဝွံ ဘပဠပတေၚ်ဂြတ်လဝ်တံလေဝ် နွံဒၟံၚ်ရ။

ဂကောံရီုဗၚ်မၚ်မွဲ ကောန်ထံၚ်ပရေၚ်ဍုၚ်ကွာန် AAPP ဂှ် ပ္ဍဲလက်ထက်ကံၚ်ဇြဳပၞာန်ဏံ ညးရေၚ်တၠုၚ်ဂဗုတ် (၅၄) တၠ မဗက်ရေၚ်တၠုၚ်ကဵုဒၟံၚ် ကုဒုဟ်ဒဏ်ပရေၚ်ဍုၚ်ကွာန်တံ ဒးဒုၚ်ရပ်ထိၚ်လဝ်တုဲ ပ္ဍဲကဵုဏံ ညးရေၚ်တၠုၚ်ဂဗုတ် (၉) တၠ ဒးဒုၚ်ဖျေံလဝ်ဒဏ်ထံၚ်ရောၚ်ဂှ် လလောၚ်ပ္တိတ်လဝ်ရ။

ပရိုၚ်−သြၚ်လောန်တိုၚ်(မ်)

ဗီု−MOI