ပ္ဍဲပရေၚ်ဗ္တိုက်လံၚ်လုၚ်ဂှ် လ္ပာ်ဒပ်ကံၚ်ဇြဳပၞာန် ချိုတ်အာ (၂) တၠ ပါလုပ်သီုကဵုသ္ကိုပ်ဒပ်မွဲတၠ

လံၚ်လုၚ်၊ အဝ်ဂါတ် (၁၂)

ပ္ဍဲကဵုပွိုၚ်ဍုၚ်လံၚ်လုၚ်၊ ရးဒေသဇၞော်တၞၚ်သဳဂှ် ဒပ်ကံၚ်ဇြဳပၞာန် ဟိုတ်နူဒးဒုၚ်ကြတ်ဗ္တိုက်လဝ်အကြာဂၠံၚ်တုဲ ပါလုပ်သီုကဵုသ္ကိုပ်ဒပ်လ္ပာ်ကံၚ်ဇြဳပၞာန်မွဲတၠဂှ် (၂) တၠ ချိုတ်အာလဝ်ရောၚ် ဂကောံဒပ်စဵုဒၞါညးဍုၚ်ကွာန် ပွိုၚ်ဍုၚ်လံၚ်လုၚ် LLPDF လလောၚ်ပ္တိတ်လဝ် ပ္ဍဲဂိတုအဝ်ဂါတ် (၁၁) တေံရ။

တုဲကၠုၚ် ပ္ဍဲဂိတုအဝ်ဂါတ် (၈) ပ္ဍဲကဵုတ္ၚဲစၟတ်သမ္တီဒ္စါံပန်မဂှ် နူကဵုကွာန်ကျံက်နဳမဝ်ဂှ် ဂကောံဒပ်ပံၚ်ကောံ ပၞာန်ညးဍုၚ်ကွာန် ကေုာံ ကံၚ်ဇြဳပၞာန်တံ နကဵုဇြဟတ်ဒပ် ဗ္ဒါဲ ၁၀ တၠ ကၠုၚ်ကဵုကွဳစက်မွဲဖ္ဍိုက်၊ ကွဳလိုန်ဓာတ်မွဲဖ္ဍိုက် လ္ပာ်ကွာန်ကျံက်ဝတ်ပျေန်ဂှ် LLPDF တံ ကြတ်ဗ္တိုက်လဝ်အကြာဂၠံၚ်ရ။

ဟိုတ်နူပရေၚ်ဗ္တိုက်အကြာဂၠံၚ်ဂှ်တုဲ ပရေၚ်ပန်ပှော်ၜါလ္ပာ် က္တဵုဒှ်လဝ် ဗ္ဒါဲ ၂၀ မိနေတ်တုဲ လ္ပာ်ကံၚ်ဇြဳပၞာန်ဂှ် သ္ကိုပ်ဒပ်မွဲတၠ၊ ကောန်ပၞာန်ညးဍုၚ်ကွာန်မွဲတၠ ချိုတ်တုဲ ၃ တၠ ကလိဂွံလဝ်ဝပ်ရောၚ် ညးတာလျိုၚ် LLPDF မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

သ္ကိုပ်ဒပ်မချိုတ်အာဂှ်ဝွံ ဒှ်သ္ကိုပ်ဒပ် မၞုံယၟုဝေမေန်တူ နူကဵုတမ်ဒပ်(ခမရ) စၟတ် (၄၁၀) ကံၚ်ဇြဳပၞာန် မဖျေံလဝ်သ္ဇိုၚ်ပွိုၚ်ဍုၚ်လံၚ်လုၚ်ဂှ်ရောၚ်ဂှ် ပါလုပ် ပ္ဍဲကဵုတၚ်လလောၚ်တြး ဂကောံဒပ်စဵုဒၞါညးဍုၚ်ကွာန် ပွိုၚ်ဍုၚ်လံၚ်လုၚ် LLPDF တံရ။

သ္ကိုပ်ဒပ်ဝေမေန်တူ ကေုာံ ကိုဝ်သုကာန် ကောန်ပၞာန်ညးဍုၚ်ကွာန်တံ (၂) တၠ မချိုတ်အာဂှ် စံၚ်လဝ် ပ္ဍဲကဵုသုသာန်ကျံက်နဳမဝ်တုဲ ညးမကလိဂွံဝပ် (၃) တၠ သီုကဵုက္ဍိုပ်သ္ကိုပ်ပၞာန်ညးဍုၚ်ကွာန်တံ ဒးဒုၚ်လွဳလွတ်ဒၟံၚ်ရောၚ် သ္ဂးရ။

ကြဴနူလၟေၚ်ဒဒှ်ဏံတုဲဂှ် ဒပ်ကံၚ်ဇြဳပၞာန် ဇြဟတ်ဒပ် ၜိုတ် ၅၀ ပြၚ်ဂှ်ဝွံ ဟိုတ်နူလုပ်စိုပ်ဖျေံလဝ်ဒပ် ပ္ဍဲကဵုကွာန်ကျံက်နဳမဝ်တံဂှ်တုဲ နကဵုညးဍုၚ်ကွာန်တံ ဟွံမွဲပၟိက်မွဲသာ် လ္ပကၠောန်သ္ပအာကၠုၚ်တရဴတံအိုတ်ဂှ် LLPDF ဒုၚ်လဝ်ဂုဏ်နမေတ္တာရ။

ပရိုၚ်−သြၚ်လောန်တိုၚ်(မ်)

ဗီု−LLPDF