ဒုသ္ကိုပ်ဗိုလ်ဇၞော်မျိုဝ်မေန်ထောန် ယၟုပရေံဒယှ်ဒၟံၚ်ဂှ် ဒးဒုၚ်နုက်ပ္တိတ် နူဒဒှ်ညးလုပ်ဂကောံကံၚ်ဇြဳခရိုၚ်ဗိက်

ဗိက်၊ အဝ်ဂေတ်(၁၃)

ရးဒေသဇၞော်တၞၚ်သြဳ ပ္ဍဲခရိုၚ်ဗိက်ဂှ် ပ္ဍဲမွဲကာလဒပ်ပၞာန်သီအဝဵုဏံ ဒုသ္ကိုပ်ဗိုလ်ဇၞော်ဒပ်ပၞာန် မျိုဝ်မေန်ထောန် ဒယှ်တှ်ဒၟံၚ် နယၟုပရေံဂှ် ဒးဒုၚ်နုက်ပ္တိတ် နူဒဒှ်ညးလုပ်ဂကောံကံၚ်ဇြဳစဳမာန်ခရိုၚ်ဗိက် (၁) ရဂှ် ညးစုက်လုက်ကဵု ကံၚ်ဇြဳခရိုၚ်တအ် ဟီုကဵု ဌာန်ပရိုၚ်သြၚန်လောန်တိုၚ်(မ်)ရ။

ကြဴနူနုက်ပ္တိတ်လဝ် ဒုသ္ကိုပ်ဗိုလ်ဇၞော်မျိုဝ်မေန်ထောန်ဂှ် နူဒဒှ်ညးလုပ်ဂကောံကံၚ်ဇြဳခရိုၚ် နူဂိတုဂျောန် တုဲကၠုၚ်တေံတုဲ ဒးက္လေၚ်ယိုက်ဂၠေၚ်ဒၟံၚ်တာလျိုၚ် ဆေၚ်ကဵုသွာၚ်ပၞာန် နဒဒှ် ဒု-ဂအုပ်ဘာ ပ္ဍဲဘာတန်ဗ္တောန်စန္ဒက်လုပ်ပေါဲဗတိုက် စၟတ် ၁၂ မၞုံကွာန်ယှိုဲဒူ၊ ပွိုၚ်ဍုၚ်ဗိက် မဒှ်တာလျိုၚ်တြေံဂှ်ရ။

ညးစုက်လုက်ကဵု ညးလုပ်ဂကောံကံၚ်ဇြဳခရိုၚ်ဗိက်မွဲတၠဂှ်မ္ဂး ဒုသ္ကိုပ်ဗိုလ်ဇၞော်မျိုဝ်မေန်ထောန်ဂှ် ပါဲနူစလာဘ်ဗ္ဇဴတုဲ ဟိုတ်နူကၠောန်ကၠုၚ် ကမၠောန်ပရေၚ်ပိုန်ဒြပ် ဟွံလုပ်သၞောဝ်ဗွဲမဂၠိုၚ်တုဲ ဒးဒုၚ်နုက်ပ္တိတ်လဝ် နအသံပၟိၚ် သ္ကိုပ်ရးတၞၚ်သြဳရဂှ် ဟီုလဝ်ရ။

ဒုသ္ကိုပ်ဗိုလ်ဇၞော်မျိုဝ်မေန်ထောန်ဂှ် ပ္ဍဲအရာရပ်စပ်ပျဲပျာံ သၟာပရိုၚ် သီုသၟတ်ကွးဘာ ညးချဳဒရာၚ်ပရေၚ်ဍုၚ်ကွာန် ပ္ဍဲခရိုၚ်ဗိက်ဂှ် ဒှ်ညးကေတ်လဝ်တာလျိုၚ် နဒဒှ်ညးက္ဍိုက်က္ဍိုပ်မွဲတၠရဂှ် ဂွံတီကေတ်ရ။

သ္အာၚ်နူဂှ်ပၠန် ထ္ၜးဟိုတ်ပရေၚ်ဍုၚ်ကွာန် ရပ်ဒၟံၚ်ညးဍုၚ်ကွာန် ဒုဟ်ဒဏ်ဟၟဲ ပ္ညဳကဵုသြန်တုဲ ကလေၚ်ဗလးကဵုဒၟံၚ်ကီု၊ သွံစဒၟံၚ်တိကွာန်ကီု၊ KTV မၞုံဍုၚ်ဗိက် သီုကမၠောန်ဟွံလုပ်သၞောဝ်လ္ၚဵုဂှ် ဒုၚ်ယၟုသမ္ဘာညး သီုဒုၚ်ယၟုညးတၞဟ်သ္အာၚ်တုဲ ပံက်ကၠောန်ဒၟံၚ် နွံရ။

ဒုသ္ကိုပ်ဗိုလ်ဇၞော်မျိုဝ်မေန်ထောန်ဂှ် ဒှ်ညးရပ်ဒက်ပျဲပျာံလဝ် ကိုဝ်အောၚ်ကျဝ် နူဌာန်ပရိုၚ် DVB ကေုာံ သၟာပရိုၚ်ပလး နူဌာန်ပရိုၚ်မဇ္ဇျိမ ကိုဝ်ဇြဝ်ဇြဝ်တအ် အလဵုဇကုညးလေဝ် ဒှ်ရ။

ပ္ဍဲဂိတုဂျူလာၚ် တုဲကၠုၚ်တေံလေဝ် ပါလုပ်သီုဒုသ္ကိုပ်ရး ဌာန်ဂအုပ်ဒပ်ပၞာန်ရေၚ်ၜဳ ဂအုပ်သ္ကိုပ်ဗိုလ်တေတ်လွေၚ်ထူကီု သီုသၞာဲဒဴဒပ်ပၞာန်ကဆံၚ်လ္တူ ရးတၞၚ်သြဳ (၃) တၠ ကြဴနူဒးဒုၚ်ကော်စၟဳစၟတ် ဂဗုတ်အဂတိ ပ္ဍဲနေပျဳဒဝ်တုဲ ဒးဒုၚ်ပလှ်ပါဲဖျေံ နူကဆံၚ်ရဂှ် ဂွံတီကေတ်လဝ်ရ။

ပရိုၚ် – သြၚ်လောန်တိုၚ်(မ်)

ဗီုရုပ် – Social Media