ဇြပ်ဗု၊ အဝ်ဂေတ် (၁၃)
တွဵုရးဍုၚ်မန်၊ ပွိုၚ်ဍုၚ်ဇြပ်ဗု၊ ကွာန်ဝါဂမိတ်၊ ဗ္ဒာဲကွာန်ယွာတာယျာဂှ် ရပ်ဂွံလဝ် ရိုဝ်ဟေန်ဂျာ ဍိုက်ပါဗက်ကၠုၚ် ယာဉ်ကွဳစက်ပ္ဍိုက်တိ (၁၄၅) တၠ ပ္ဍဲဂိတုအဝ်ဂေတ် စၟတ်တ္ၚဲ (၁၁) အခိၚ်နူဂယးရဂှ် ညးစုက်လုက်ကဵု ဂကောံဒပ်ဗၠာဲသၟိၚ်ကံၚ်ဇြဳပၞာန်တအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ပ္ဍဲကွဳစက်ပ္ဍိုက်တိ (၄) ဖ္ဍိုက် ဒဳကၠုၚ်လ္ပာ်ပွိုၚ်ဍုၚ်ဇြပ်ဗု နူပွိုၚ်ဍုၚ်ရေဝ်ဂှ် ရိုဝ်ဟေန်ဂျာတအ် ပါဗက်ကၠုၚ်ဒၟံၚ် ဂွံလဝ်ပရိုၚ်တုဲ ဒပ်ကံၚ်ဇြဳပၞာန်၊ ဗၠာဲသၟိၚ် ကေုာံ ညးလုပ်ဂကောံအုပ်ဓုပ်တအ် မၚ်စၟဳစၟတ်ဒၟံၚ်တုဲ ရပ်ဂွံလဝ်ရ။
ပ္ဍဲကဵုညးဒးဒုၚ်ရပ်လဝ်ဂှ် ရိုဝ်ဟေန်ဂျာ တြုံ (၁၂၇) တၠ၊ ဗြဴ (၁၈) တၠ၊ အပံၚ်လၟိဟ် (၁၄၅) တၠ ပါလုပ်ဒၟံၚ်တုဲ ကၠောန်သ္ပဒၟံၚ် ပရေၚ်သၟာန်သၟုက်စၟဳစၟတ် ညးတအ် ပ္ဍဲသၠာတ်ဝေၚ်ဇြဟတ် မၞုံအရာပ်သေတ်တေတ်(စက်သစ်)၊ ဍုၚ်ဇြပ်ဗုရ။
အတိုၚ်ညးစုက်လုက်ကဵု ဂကောံဒပ်ဗၠာဲသၟိၚ်ကံၚ်ဇြဳပၞာန်မွဲတၠ ဟီုလဝ်ဂှ်မ္ဂး ရိုဝ်ဟေန်ဂျာ ဒးဒုၚ်ရပ်လဝ်တအ်ဂှ် ဒှ်ညးတိတ်ကၠုၚ် နူဗဒိုပ်သၟာဒဒိုက် မၞုံဍုၚ်ဘၚ်္ဂလာဒေတ် ကဵုဂၠုၚ်စက်ရဂှ် ဟီုလဝ်ရ။
ပ္ဍဲဂိတုအဝ်ဂေတ် စၟတ်တ္ၚဲ (၇)ဂှ်လေဝ် ဂၠုက်စက် ရိုဝ်ဟေန်ဂျာ (၅၅)တၠ ဍိုက်ပါဗက်ကၠုၚ် သွက်ဂွံအာမလေဝ်ယှာမွဲဖ္ဍိုက်ဂှ် ဟိုတ်နူဗၠိုက်စှ်ေ ပ္ဍဲၜဳသေတ်တွေ တွဵုရးရခေၚ်တုဲ ပြဟ်ဟ်ဏံ ကလေၚ်ဆဵုလဝ် ဇွရိုဝ်ဟေန်ဂျာ (၁၇)တၠရ။
ပ္ဍဲပွိုၚ်ဍုၚ်ကျာ်ထဝ် တွဵုရးဍုၚ်မန်ဂှ် ပ္ဍဲဂိတုဂျူလာၚ် တုဲကၠုၚ်တေံလေဝ် ရပ်ဂွံလဝ် ရိုဝ်ဟေန်ဂျာ (၆)တၠ ပ္ဍဲသၞေဟ်ကၚ်စၟဳစၟတ်မယာန်ချောၚ်ဏီရ။
ပရိုၚ် – သြၚ်လောန်တိုၚ်(မ်)
ဗီုရုပ် – Social Media
sanlontai