ပ္ဍဲတၞၚ်သြဳ ပွိုၚ်မွဲဂိတုကောန်အရာပ် ဗ္ဒာဲ ၁၉၀ ဒးဒုၚ်ရပ်ဒက်လဝ်တုဲ ဒးဒုၚ်ပြိုက်ဂစိုတ်လဝ် (၉)တၠ

တၞၚ်သြဳ၊ အဝ်ဂေတ်(၁၃)

ပ္ဍဲရးဒေသဇၞော်တၞၚ်သြဳဂှ် ပ္ဍဲဂိတုဂျူလာၚ်တုဲကၠုၚ်ပွိုၚ်မွဲဂိတုဏံ ဒပ်ကံၚ်ဇြဳပၞာန် ထ္ၜးဟိုတ်နာနာ ရပ်ဒက်လဝ်ကောန်အရာပ်ညးဍုၚ်ကွာန် ၁၈၆ တၠတုဲ ကောန်အရာပ် ဒးဒုၚ်ပြိုက်ဂစိုတ်လဝ် နွံ (၉)တၠရဂှ် FE5 Tanintharyi ဂကောံသုတေသန ဖျေံသ္ဇိုၚ်ဒေသဂှ် လလောၚ်တြးလဝ်ရ။

ကောန်အရာပ်ညးဍုၚ်ကွာန်တအ်ဂှ် ဒးဒုၚ်ရပ်ဒးဒုၚ်ရပ်လဝ်နဒဒှ်ဒေၚ်ဒုၚ်ဒၞာမၞိဟ် ဃောဒပ်ကံၚ်ဇြဳပၞာန် ထ္ပက်လုပ်ကရောၚ်ပၞာန်တုဲ ပ္ဍဲမွဲဒမြိပ်ဂၠံၚ်ကရောၚ်ပၞာန် ဇက်တိုန်ကၠုၚ်ဂှ် ဒးဒုၚ်ရပ်ပဝ်တာ၊ ဒးဒုၚ်ရပ်လဝ် နကဵုတၚ်စောတ်စောဲ ညးကၠောန်ထံက်ပလံၚ်ဒၟံၚ် PDF တအ်ရ။

ပၞောဝ်ကဵုညးဒုၚ်ရပ်လဝ် ၁၈၆ တၠဂှ် မၞိဟ် ၁၆၃ တၠ ၜိုန်ရက္လေၚ်ဗၠးတိတ်ကၠုၚ်ကီုလေဝ် ဒပ်ကံၚ်ဇြဳပၞာန် ဆက်ရပ်ဒက်လဝ် မၞိဟ် ၂၃ တၠတုဲ ညးဒေသလ္ၚဵုတအ်ဂှ် ဟွံဂွံအဆက်တုဲ ကၠေံဒၟံၚ်နွံရ။

ပ္ဍဲဂိတုဂျူလာၚ်ဂှ်မ္ဂး ကောန်အရာပ် (၉)တၠ ဒးဒုၚ်ပြိုက်ဂစိုတ်လဝ်တုဲ (၂) တၠဂှ် ကံၚ်ဇြဳပၞာန် ရပ်ဒက်ပြိုက်ဂစိုတ်လဝ်တုဲ သှ်ေ (၂) တၠဂှ် ဒပ်စဵုဒၞာဒေသတအ်စၟတ်ကေတ်လဝ် နဒဒှ်ဒလာန် ပြိုက်ဂစိုတ်လဝ်တုဲ (၅)တၠဂှ်မ္ဂး မၞိဟ်ဂစိုတ်လဝ် ဟွံမံက်ရဂှ် ဟီုသ္ဂးလဝ်ရ။

ပ္ဍဲကဵုဂှ် ရးဒေသဇၞော်တၞၚ်သြဳ ပါဲနူပွိုၚ်ဍုၚ်ကအ်သံၚ်တုဲ ပ္ဍဲပွိုၚ်ဍုၚ်သှ်ေဒၟံၚ် (၉) ပွိုၚ်ဍုၚ်ဂှ် ပေါဲဗတိုက်သ္ကာတ်မြဟ်လဝ်တုဲ ဟိုတ်နူပေါဲဗတိုက်ဂှ် ညးဒေသ ၃၆၀၀၀ ပြၚ် ဒးဂြိပ်ဒဴပါဲဓလေတ်ဒၟံၚ်ရ။

ဟိုတ်နူပေါဲဗတိုက်သ္ကာတ်မြဟ်ဒၟံၚ်ဂှ်ရ နကဵုညးဍုၚ်ကွာန် ပ္ဍဲဒေသရးတၞၚ်သြဳတအ် ကဏ္ဍပရေၚ်ပိုန်ဒြပ်၊ ပရေၚ်မၞိဟ် သွာၚ်နာနာ ဒးဆုတ်စှ်ေဒၟံၚ်တုဲ ဟိုတ်နူၚုဟ်ဗွဝ်ဖျာ က္ဍၚ်တိုန်ကၠုၚ် ဂၠိုၚ်ကဵုချဂှ်ရ သာဒှ်ကၠုၚ် အကြေပ်အဂြတ်ရဂှ် ဂွံတီကေတ် အတိုၚ်တၚ်လလောၚ်တြး FE5 Tanintharyi ရ။

ပရိုၚ် – သြၚ်လောန်တိုၚ်(မ်)

ဗီုရုပ် – CJ (ဟိုတ်နူဒပ်ပၞာန်ထ္ပက်လုပ်ကရောၚ်ပၞာန် ပ္ဍဲရးဒေသတၞၚ်သြဳတုဲ ဂွံညာတ်ကေတ် ဗီုညးဂြိပ်ဒဴပါဲဓလေတ်ဒၟံၚ်)