ပ္ဍဲကြုၚ်ဒဵု ဟိုတ်နူဒပ်ပၞာန်ပန်ဖျေံလွဟ်ဇၞော်တုဲ ညးဒေသ (၂) တၠ ဇီုကပိုက်ဒးဘဲဝပ်

ကြုၚ်ဒဵု ၊ အဝ်ဂေတ် (၁၅)

ပ္ဍဲကွာန်ကယျေန်ကျောက်ဖျာ ပွိုၚ်ဍုၚ်ကြုၚ်ဒဵု တိဍာ်ဒပ်မဟာ (၆) ဗော်သွးကောန်ဂကူကရေၚ် KNU ဂှ် ဟိုတ်နူဒပ်ပၞာန်ပန်ဖျေံလွဟ်ဇၞော်တုဲ ညးဒေသ (၂)တၠ ပါလုပ်သီုညးဗြဴ (၁)တၠ ဇီုကပိုက်ဒးလဝ်ဘဲဝပ်ရဂှ် ဗဟဵု KNU လလောၚ်တြးလဝ် ပ္ဍဲဂိတုအဝ်ဂေတ် စၟတ်တ္ၚဲ (၁၄)ရ။

ပ္ဍဲဂိတုအဝ်ဂေတ် စၟတ်တ္ၚဲ (၁၂) အခိၚ်နူဂယး တုဲကၠုၚ်တေံဂှ် နူတံဒပ် ကံၚ်ဇြဳပၞာန် ခမရ (၅၄၅) ဖျေံသ္ဇိုၚ်ပွိုၚ်ဍုၚ်ကြုၚ်ဒဵု ဟိုတ်နူပန်ဖျေံဏာလွဟ်ဇၞော် ပ္ဍဲကွာန်ညးဍုၚ်ကွာန်တအ်မံၚ်တန်တဴဒၟံၚ် နကဵုလွဟ်ဇၞော် ၁၂၀ မမ တုဲ လွဟ်ဇၞော် ဒတုံစှ်ေပါ်ခတိုဟ်လဝ် ပ္ဍဲကွာန်ကယျေန်ကျောက်ဖျာ ပွိုၚ်ဍုၚ်ကြုၚ်ဒဵု ခရိုၚ်ဒူပလာယာ KNU ရ။

ဟိုတ်နူလွဟ်ဇၞော်ဒတုံစှ်ေပါ်ခတိုဟ်လဝ်တုဲ ညးဗြဴအာယုက် ၅၃ မွဲတၠ ကေုာံ ညးတြုံအာယုက် ၆၉ သၞာံ ဒၟံၚ်ကွာန်ကယျေန်ကျောက်ဖျာ မွဲတၠ ဇီုကပိုက်ဂွံလဝ်ဘဲဝပ်တုဲ သ္ၚိဒၟံၚ် (၁) မ ကေုာံ စက်ထဲတိ မွဲဖ္ဍိုက် ဇီုကပိုက်လီုလာ်လဝ်ရဂှ် ဓမံက်လဝ် ပ္ဍဲတၚ်လလောၚ်တြးရ။

တ္ၚဲဂှ်ဟေၚ် ပ္ဍဲပရေၚ်ပရောၚ်ကရောၚ်ပၞာန်ဂလုမ်(ဂဠန်) လုပ်စိုပ်ဗတိုက်လဝ် ဗဒိုပ်ဗၠာဲသၟိၚ် ကြုၚ်ဒဵုကဵု တံဒပ်ခမရ (၅၄၅) ဖျေံသ္ဇိုၚ်ကြုၚ်ဒဵု နကဵုဒရုမ်ဂှ် လ္ပာ်ကံၚ်ဇြဳပၞာန် ဒးလဝ်ဘဲဝပ် (၃)တၠတုဲ ကွဳစက်မွဲဖ္ဍိုက် ဒးလီုလာ်လဝ်တုဲ သ္ကိုပ်တံဒပ် ခမရ (၅၄၅)ဂှ်မ္ဂး ဒးလဝ်ဘဲဝပ်ပ္ဍဲက္ဍိုပ် သ္ကာတ်မြဟ် ဒးလွဳဒုၚ်လွတ်ဒၟံၚ်ရဂှ် ကရောၚ်ပၞာန်ဂလုမ် လလောၚ်တြးလဝ်ရ။

ပရေၚ်ဂကောံဇြဟတ်ပၠန်ဂတးတအ် ဗတိုက်လဝ်ကဵုဒရုမ်ဂှ် ဟိုတ်နူလ္ပာ်ကံၚ်ဇြဳပၞာန်က္လေၚ်ပန်ပှ်ောလဝ်တုဲ ညးဒေသနူကွာန်ကယျေန်ကျောက်ဖျာ ပွိုၚ်ဍုၚ်ကြုၚ်ဒဵု (၂)တၠ ဇီုကပိုက်ဒးလဝ်ဘဲဝပ်ရဂှ် ဂွံတီကေတ် အတိုၚ်တၚ်လလောၚ်တြးရ။

ပ္ဍဲတိဍာ်ဒပ်မဟာ (၆)ခရိုၚ်ဒူပလာယာ KNU ဂှ် ပ္ဍဲဂိတုဂျူလာၚ်တုဲကၠုၚ်ဏံ ဟိုတ်နူဒပ်ကံၚ်ဇြဳပၞာန် ပန်ဖျေံလဝ်လွဟ်ဇၞောန်ကြာန်န်တုဲ ကောန်အရာပ်ညးဍုၚ်ကွာန်မွဲတၠ ဒးချိုတ်လဝ်တုဲ ညးဒေသ (၉)တၠ ပါလုပ်သီုကောန်ကောန်ၚာ်သၟတ်မွဲတၠ ဇီုကပိုက်ဒးလဝ်ဘဲဝပ်ရဂှ် KNU လလောၚ်တြးလဝ်ရ။

ပရိုၚ် – သြၚ်လောန်တိုၚ်(မ်)

ဗီုရုပ် – KNU