ဗ္ဒိုပ်ဗၠာဲသၟိၚ်ကေန်မန်ချံၚ် ဒးဒုၚ်ဗ္တိုက်ကဵုဒရုၚ်၊ ဒၟါနူဒပ်ပၞာန်ပန်ပှော်ကြာန်န်တုဲ ညးဗြဴဒေသမွဲတၠ ကလိဂွံဝပ်

ကျာ်ထဝ်၊ အဝ်ဂါတ် (၁၅)

အပ္ဍဲကဵုလၟေၚ်ဒဒှ် ဗ္ဒိုပ်ဗၠာဲသၟိၚ်တိဍာ်ကေန်မန်ချံၚ် မၞုံကွာန်ကေန်မန်ချံၚ်၊ ပွိုၚ်ဍုၚ်ကျာ်ထဝ်၊ တွဵုရးဍုၚ်မန် ဒးဒုၚ်ဗ္တိုက်ကဵုဒရုၚ်ဂှ် ဟိုတ်နူဒပ်ကံၚ်ဇြဳပၞာန်တံ ပန်ပှော်လဝ်ကြာန်န်ဂှ်ရ ညးဗြဴဒေသမွဲတၠ ဒးမကမ်ကလိဂွံဝပ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ပ္ဍဲဂိတုအဝ်ဂါတ် (၁၃) အခိၚ်လဒေါဝ်တ္ၚဲဂှ် ဂကောံဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA, PDF တံ ဗ္တိုက်ဂြာတ်ဖျေံလဝ်ဗုမ် ကုဗ္ဒိုပ်ကေန်မန်ချံၚ် ဒၞါဲဒပ်ကံၚ်ဇြဳပၞာန်ကဵု ကောန်ဒပ်ကံၚ်ဇြဳပၞာန်တံ မဖျေံဒၟံၚ်သ္ဇိုၚ်ဂှ် နကဵုဒရုၚ်ရ။

အပ္ဍဲပရေၚ်ဗ္တိုက်ဏံဂှ် ဒပ်ကံၚ်ဇြဳပၞာန်ဝွံ ဂၠံၚ်ဒရုၚ်ကၠုၚ်ဂှ်ကဵု ပွဳပွူဗ္ဒါဲဗ္ဒိုပ်ဗၠာဲသၟိၚ်တံဂှ် ပန်ပှော်လဝ်ကဵုသေနာတ်ကြာန်န်ရ။

ဟိုတ်နူဒပ်ကံၚ်ဇြဳပၞာန် ပန်ပှော်လဝ်ကြာန်န်ဂှ်တုဲ ဒဝ်သဳတာ အာယုက် ၄၀ သၞာံ ဒၟံၚ်ဗ္ဒါဲဗ္ဒိုပ်ဗၠာဲသၟိၚ်ဂှ်ဝွံ ဒးအာမကမ် ကလိဂွံဝပ် ပ္ဍဲကဵုဇိုၚ်ဂၞိၚ် ကေုာံ သြိုဟ်တံရ။

ဒဝ်သဳတာ မဒးအာမကမ် ကလိဂွံအာဝပ်ဂှ် နူကဵုရုၚ်ဂဥုဲပွိုၚ်ဍုၚ်ကျာ်ထဝ်ဂှ် ဆုဲပြံၚ်ပလံၚ်လဝ်ကဵု ရုၚ်ဂဥုဲခရိုၚ်သဓီုတုဲ ဒုၚ်လွဳဒၟံၚ်ရောၚ် ဂွံတီကေတ် အတိုၚ်ဂလာန် ညးဒေသတံရ။

ဗ္ဒိုပ်ဗၠာဲသၟိၚ်ကေန်မန်ချံၚ်ဂှ်ဝွံ အပ္ဍဲကာလဒပ်ပၞာန်သီအဝဵုဏံ ဒးဒုၚ်ဗ္တိုက်လဝ် (၈) ဝါဟွံကတုဲ အပ္ဍဲပရေၚ်ဗ္တိုက်တံဏံဂှ် မ္ၚးနူကဵုလၟေၚ်ဒဒှ် ဗ္ဒမ်ဗၠာဲသၟိၚ်တံ ပၟတ်တူ ကေုာံ စမြိုၚ်လ္ၚဵု ဇီုကပိုက်လီုလာ်အာလဝ်ဂှ် ကောန်ဒပ်ကံၚ်ဇြဳပၞာန်လ္ၚဵု ဇီုကပိုက်ချိုတ်အာတံလေဝ် နွံဒၟံၚ်ရ။

ပရိုၚ်−သြၚ်လောန်တိုၚ်(မ်)

ဗီု−Social Media