ဟိုတ်နူရပ်ကောန်ဗၠာဲ ညးမဒှ်က္ဍိုပ်သ္ကိုပ်ဗကပ်ဗဗေၚ်ထဝါဲဂှ်ဟွံဂွံတုဲ ရပ်စပ်ပံက်ဂဗုတ် ကုအပါညး

လံၚ်လုၚ်၊ အဝ်ဂါတ် (၁၅)

ကံၚ်ဇြဳပၞာန် ရပ်စပ်ပံက်လဝ်ဂဗုတ် ကုအပါအံက်ကိုဝ်မေန်လွေန်ဥူ က္ဍိုပ်သ္ကိုပ်ကမ္မတဳဗကပ်ဗဗေၚ်ခရိုၚ်ထဝါဲ ဒၟံၚ်ကွာန်ပျေန်ထုၚ်၊ ပွိုၚ်ဍုၚ်လံၚ်လုၚ်၊ ရးဒေသဇၞော်တၞၚ်သဳ နကဵုၝောံပိုဒ် ၅၀၅ (က) ဂှ် သြၚ်လောန်တိုၚ်(မ်) စၟဳစၟတ်ဂွံတီကေတ်ရ။

ဒပ်ကံၚ်ဇြဳပၞာန် မကၠုၚ်စိုပ်ရပ်ဒက် ကိုဝ်မေန်လွေန်ဥူ က္ဍိုပ်သ္ကိုပ်ဂကောံဗကပ်ဗဗေၚ် ပ္ဍဲကဵုဂိတုဂျောန် (၁၉) တုဲကၠုၚ်တေံဂှ်ဝွံ ဟိုတ်နူဟွံဆဵု ညးမဒှ်ကောန်ဂှ်တုဲ ၜုၚ်တက်ရပ်ဒက်ကော်ဏာလဝ် အပါညး ဥူအံၚ်ဖေ ပ္ဍဲကဵုသ္ၚိဒၟံၚ်ညးဂှ်ရ။

ကြဴနူဂှ်တုဲ ကံၚ်ဇြဳပၞာန်ဝွံ ပ္ဍဲကဵုသ္ၚိကိုဝ်မေန်လွေန်ဥူဂှ် ဟိုတ်နူဂွံဆဵုကေတ်ယာတ်ပါတ်တဲ ကွးဘာသမဂ္ဂမွဲဂှ်ကဵု ပဠောံမွဲဂတှ်ေ နကဵုဟိုတ်သာ်ဏံတုဲ ပ္ဍဲဂိတုအဝ်ဂါတ် ၁၂ ဂှ် ပံက်လဝ်ဂဗုတ် ကုမအံက်ညး နကဵုရာဇာသာတ်ဇၞော် ၝောံပိုဒ် ၅၀၅(က) ရ။

ပ္ဍဲဂိတုအဝ်ဂါတ် (၁၃) ဂှ် ကောန်ဇာတ်ဂမၠိုၚ် ဂွံလဝ်အခေါၚ်ဆဵုဂဗ ကုဥူအံၚ်ဖေ အာယုက် ၆၁ သၞာံ မဒးဒုၚ်ရပ်ချုက်လဝ် ပ္ဍဲကဵုဗ္ဒိုပ်ဗၠာဲသၟိၚ်ၝောံဍုၚ်လံၚ်လုၚ်ဂှ်တုဲ ပရေၚ်ထတ်ယုက်ခိုဟ်ဒၟံၚ်ဂှ် ဂွံတီကေတ်ရ။

ကိုဝ်မေန်လွေန်ဥူဂှ် သွက်ဂၠံၚ်တရဴ ဒပ်ကံၚ်ဇြဳပၞာန် မကဵုဒၟံၚ်ဒဒိုက် ကုကောန်ဇာတ်ဂြောဝ်ဂတာ မုဟွံဆေၚ်တံဂှ်တုဲ မုမွဲမှဟွံဟီုလဝ်ရတုဲ သွက်တၠအဝဵုပၞာန် ဂွံသရိုဟ်စှ်ေအာဂှ်ဟေၚ် ဆက်ထ္ၜးအာဆန္ဒ နကဵုနဲကဲဟွံပကီုပရာပ်တံဏောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ဒပ်ကံၚ်ဇြဳပၞာန် အခိၚ်ကၠုၚ်ရပ်မအံက်ကိုဝ်မေန်လွေန်ဥူ နဒဒှ်ညးဒးဒုၚ်သ္ပဒၞန်ဂှ် နူကဵုသ္ၚိဂှ် ကေတ်ဏာလဝ် ဖုၚ်တဲၜါမကဵု သြန် ၈ ကိုဋ် သီုကဵုကပေါတ်လ္ၚဵုလ္ၚဵုတံ မဒှ်ရ။

ကိုဝ်မေန်လွေန်ဥူ မကၠောန်ဒၟံၚ် ပရေၚ်ချဳဒရာၚ်ဟွံပကီုပရာပ် ဒစဵုဒစးတၠအဝဵုပၞာန် အပ္ဍဲခရိုၚ်ထဝါဲဂှ် ကံၚ်ဇြဳပၞာန်ဂှ် နကဵုတၚ်စောဲစပ် ကၠောန်ဒၟံၚ်ညံၚ်ဍုၚ်ဂွံရုသံၚ်ဂးတုဲ မၞိဟ်ရပ်ကဵုတံဂှ် ဖျေံအာလာဘ်သြန် ၃၀၀ ကိုဋ်ဒ္ကေဝ်ရောၚ် လလောၚ်တြးလဝ်ရ။

ပရိုၚ်−သြၚ်လောန်တိုၚ်(မ်)

ဗီု−Min Lwin Oo-Fb