ကံၚ်ဇြဳပၞာန် ဗက်ပလှ်သီဒၟံၚ် ပၟတ်ဂၠံၚ်လ္တူဍုၚ်မတ်မလီု

မတ်မလီု၊ အဝ်ဂါတ် (၁၅)

နကဵုဟိုတ် ဇြဟတ်ပၟတ်ကၠေံဂးတုဲ ပၟတ်ဂၠံၚ်မဍေန်လဝ် နဇြဟတ်ဇကုဇကု အပ္ဍဲပွိုၚ်ဍုၚ်မတ်မလီု တွဵုရးဍုၚ်မန်တံဂှ် နူကဵုကမၠောန်တြးဇြဟတ်ဓာတ်လလဳ ကံၚ်ဇြဳပၞာန် ဗက်ပလှ်သီဒၟံၚ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ကမၠောန်တြးဇြဟတ်ဓာတ်ပွိုၚ်ဍုၚ် သၟဝ်တဲကံၚ်ဇြဳပၞာန်ဂှ် စၟဳတ်ဂွံဆဵုကေတ်လဝ် ပ္ဍဲကဵုအကြာဂၠံၚ် ပ္ဍဲအရာပ်လ္ၚဵုတံဂှ် ကဵုလဝ်ပရိုၚ် ကုဂကောံဂဵုလဟဵုပွိုၚ်ဍုၚ်တံဟွံမွဲမွဲသာ် စုတ်လဝ်ပၟတ်ဂၠံၚ် ဟွံလုပ်သၞောဝ်တုဲ ရပ်စပ်စကာဒၟံၚ်ရောၚ်ဂှ် သ္ဂးရ။

ဟိုတ်နူပၟတ်ဂၠံၚ်ဟွံလုပ်သၞောဝ်တံ ဂၠိုၚ်ဒၟံၚ်ဗွဲမလောန်ဂှ်တုဲ ညံၚ်ယူနေတ်ပၟတ်တံကၠေံ ဂွံသက်သာဂးတုဲ ကဵုပရိုၚ်ကဵု သ္ကိုပ်အုပ်ဓုပ်အရာပ်မဆေၚ်စပ်တံတုဲ ပလှ်အာပၟတ်ဂၠံၚ်ဟွံလုပ်သၞောဝ်တံဏောၚ်ဂှ် ပ္ဍဲဂိတုအဝ်ဂါတ် သတ္တာဟဒုတိယတေံ လလောၚ်ပ္တိတ်ကၠုၚ်ရ။

ကြဴနူလလောၚ်ပ္တိတ် လိက်စၞောန်ဏံတုဲဂှ် ညးယိုက်ဝန် နူကဵုကမၠောန်တြးဇြဟတ်ဓာတ် ကံၚ်ဇြဳပၞာန်ဂမၠိုၚ်ဝွံ ဗက်ပလှ်သီကၠုၚ် ပၟတ်ဂၠံၚ်မဗဂပ်စုတ်လဝ် နကဵုဇြဟတ်ဇကုဇကုတံဂှ် ညးဒေသလ္တူဍုၚ်မွဲတၠ ဟီုရ။

“လၟုဟ်မ္ဂး သ္ၚိလ္ၚဵုတံ မုဟီုရောဟီုတှ်ေ ဂတမုက်သ္ၚိတံဂှ် ဒးဍေန်ပပဵုလဝ်ပၟတ်တံဏောၚ်။ ဍေံတံကၠုၚ်ပလှ်ဏာ တိုၚ်ပၟတ်တံနွံရ။ ထ္ၜးဟိုတ်သာ်လဵုရောဟီုတှ်ေ ဇုက်ပၟတ်ယှတ်အာတံ၊ ဇုက်ပၟတ်ဂၠိုၚ်ဒၟံၚ်ဂးတုဲ ပလှ်ဏာပၟတ်ဂၠံၚ်တံဏံရ။ ညအ်ဂှ် ကၠောန်ဟွံထေက်ပုဟ်။ သာတုဲခက်ခုဲကၠုၚ်ယျလေဝ်။ ဗီုဇကုဇကုစုတ်ဂှ်လေဝ် ပၟတ်ဂှ်စုတ်ဟွံဂွံပုဟ်။ ဒမၠုဂှ် ဓလီုကၠုၚ်ယျ၊ ညအ်ဂှ်မၞိဟ်ကၠောန်စပ္ဍဲကဵုဒမၠုတံ သာတုဲဒးစိုတ်ရ။ ညးဍုၚ်ကွာန်တံဂှ် သာ်လဵုပ ဂွံတိက်ၜိုဟ်ဟ်မာန်ရော။ သ္ၚိညးတံ ဟွံဂီုကၠီုရပုဟ်။ အရာပ်ညးတံ ဟွံဂီုကၠီုရပုဟ်။ အခိၚ်ဗ္တံ ကိစ္စနွံ တိတ်မ္ၚးတှ်ေ ဒှ်ဒဒိုက်ဏောၚ်။ စိုတ်ဂွိၚ်ဂွါဲတံဂှ် ပရေံကၠုၚ်ယျ၊ ဍေံတံကၠောန်သာ်ဏံဂှ် ညံၚ်ဂွံပရေံစှ်ေရ ကၠောန်ဒၟံၚ်ဂှ် ညာတ်ကေတ်သာ်ဏံရ“ သာ်ဝွံ သ္ဂးရ။

ညးဍုၚ်ကွာန်ဂမၠိုၚ်ဝွံ ပ္ဍဲကဵုအရာပ်၊ ကွာန် မၞုံပ္ဍဲပွိုၚ်ဍုၚ်မတ်မလီုတံဂှ် အခိၚ်ဗ္တံ ညံၚ်ဂွံအာကၠုၚ်လောဲ ညံၚ်ဂီုကၠီုဂွံနွံ ကေုာံ ညံၚ်ပရေၚ်ပၠံၚ်ၜးကၠတ်ဂၠံက်တံ ဂွိုအ်က္တဵုဒှ် ရန်သာ်ဏံတုဲ အပ္ဍဲအကြာအရာပ်တံဂှ် ဍေန်လဝ်ပၟတ်ဂၠံၚ်တံရ။

ပၟတ်ဂၠံၚ်အပ္ဍဲအရာပ်ဂမၠိုၚ်ဝွံ ကၠာတေံဂှ် ကၠောန်ကၠုၚ်ဒၟံၚ် နကဵုဇြဟတ်ဇကုဇကုတုဲ ဟိုတ်နူဗက်ပလှ်ကၠုၚ်ပၟတ်ဂၠံၚ်တံ သာ်ဏံဂှ်တုဲ ပါဲနူပရေၚ်အာကၠုၚ်ဂှ် နူကဵုသၞကမၠတ်ဒမၠတံဂှ်လေဝ် ဒးဖေက်ဒၟံၚ်ရောၚ်ဂှ် ညးလ္တူဍုၚ်မွဲတၠ ထပ်ဟီုလဝ်ရ။

“ကၠာတေံဟီုမ္ဂး နဇြဟတ်ဇကုဇကုဂှ် မွဲဂၠံၚ်တှ်ေ မွဲသ္ၚိစုတ်မူစိ။ သ္ပဗီုဏံတုဲ စုတ်ကၠုၚ်ပၟတ် ပ္ဍဲကဵုတိုၚ်ပၟတ်တံရ။ ဂၠံၚ်တံဂှ် သာယာကျေဝ်ဂေါဝ်အာရ။ ဂၠံၚ်တၟးအာတုဲ မံၚ်စလေဝ်ခိုဟ်။ ဟွံဒးဖေက် သၞကမၠတ်ဒမၠတံရပုဟ်။ အရိုဟ်တွဵုလေဝ် ပၟတ်ဂၠံၚ်တံဏံဂှ် သုၚ်စောဲဒၟံၚ်ရဏောၚ်။ ပ္ဍဲလက်ထက်အလဵုအသဳကၠာတေံဂှ်လေဝ် ကဵုဒၟံၚ်ခေါၚ်ရဏောၚ်။ အရာအိုဿီု ရုမ်ဂပ်ဒၟံၚ်ဖအိုတ်ရ။ စိုပ်လက်ထက်ညးမှ ဟွံရုမ်ဂပ်ပုဟ်ဟီုတှ်ေ ဟွံပြေပြံၚ်စအှ်ေပုဟ်။ နူကဵုသၞကမၠတ်ဒမၠတံဂှ် အကာဲအရာအုပ်ဓုပ်ဒၟံၚ်သာ်ဏံရမ္ဂး သာ်လဵုမှ ဖျေံစိုတ်ဟွံဂွံပုဟ်။ လၟုဟ် ပၟတ်ဂၠံၚ်တံမုတံဟွံမွဲရပုဟ်ဟီုတှ်ေ သ္ၚိဇကုဇကုမံၚ်ရဂှ် ဂီုကၠီုဟွံမွဲရပုဟ်။ တုဲပၠန် ဒှ်အာအကာဲအရာ ဟွံဂံၚ်တိတ်နူအပ္ဍဲသ္ၚိတံမာန်ဏောၚ် “ သာ်ဝွံ သ္ဂးရ။

ကံၚ်ဇြဳပၞာန် ဗက်ပလှ်သီဒၟံၚ် ပၟတ်ဂၠံၚ်အပ္ဍဲပွိုၚ်ဍုၚ်မတ်မလီု နကဵုဟိုတ်ယူနေတ်ကၠေံဂှ် အကြာညးဍုၚ်ကွာန်ဒေသတံ ပရေၚ်ပါ်ပါဲဂမၠိုၚ် သၠုၚ်တိုန်ဒၟံၚ်ရ။

ကမၠောန်တြးဇြဟတ်ဓာတ်လလဳ ပွိုၚ်ဍုၚ်မတ်မလီုဂှ် မိက်ဂွံစုတ်ပၟတ်ဂၠံၚ် အပ္ဍဲအရာပ်ဇကုတံဂှ်မ္ဂး ကေတ်အဆက်ကဵုပရိုၚ် ကုရုၚ်ဂဵုလဟဵု ကေုာံ ရုၚ်ဓာတ်လလဳတံဂှ်တုဲ ရေၚ်တၠုၚ်မာန်ရောၚ် ပါလုပ် ပ္ဍဲတၚ်လောၚ်တြးဂှ်ရ။

မွဲလ္ပာ်ပၠန်ဂှ် ညးဍုၚ်ကွာန်မတ်မလီုဂမၠိုၚ်ဝွံ လ္တူနူကဵုက္ညၚ်ဂှ် အခိၚ်ကသီုဏံဏောၚ် သာတုဲဒးဂဗဒၟံၚ် ပၟတ်ဓာတ်လလဳပိုတ်ပၠိုတ်တံရ။

ဟိုတ်နူပၟတ်ဓာတ်လလဳ ပိုတ်ပၠိုတ်ကၠုၚ် ပရေံပရေံဂှ်တုဲ ထပ်ဒးဒုၚ်စသိုၚ်ကၠုၚ် အခက်အခုဲပရေၚ်မၞိဟ် သီုကဵုခရိတ်အိုတ်နာနာဇၞော်သၠုၚ်တံဂှ်ရ။

ပရိုၚ်−သြၚ်လောန်တိုၚ်(မ်)

ဗီု−(သာသနာနွယ်လူမှုကွန်ရက်)