ကအ်ကြိက်၊ အဝ်ဂါတ် (၁၅)
ပၠန်ဂတးက္ညၚ်ဏံဝွံ ဒှ်ပၠန်ဂတးပြံၚ်လှာဲညးအုပ်ဓုပ်သၟးဟွံသေၚ် ဟိုတ်နူဒှ်ပၠန်ဂတးပြံၚ်လှာဲသၞောတ်ဂှ်ရ ဒးပြံၚ်လှာဲ ဒ္ဂေတ်ပဋိပတ်တြေံတြေံတံဏောၚ်ဂှ် ပဒိုဝ်သဝ်တဝ်နဳ ကေၚ်ကာဗော်ဗဟဵု ဗော်သွးကောန်ဂကူကရေၚ် KNU ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဍုၚ်ဗၟာ ကြဴနူကလိဂွံသၠးပွး နူကဵုညးသၠဲတိတံတုဲဂှ် စဵုကဵုတၠအုပ်ဓုပ်တံ ပြံၚ်လှာဲအာကီုလေဝ် ဒပ်ပၞာန်ဂှ် စနူသၞာံ ၁၉၅၈ တုဲ ပွိုၚ် ၇၀ သၞာံပြၚ် စဵုကဵုအခိၚ်ဏံ သွက်ဍုၚ်ကွာန်ဂှ် ဒှ်ဒၟံၚ်ဇွောံတာဒၞါဇၞော်အိုတ်မွဲရ။
ဒပ်ပၞာန်ဗၟာဝွံ ပရေၚ်ပၞာန်သၟးဟွံက ပ္ဍဲကဵုပရေၚ်ဍုၚ်ကွာန်၊ ပရေၚ်ပိုန်ဒြပ်တံဂှ်လေဝ် ဟိုတ်နူအုပ်ဓုပ်ရပ်စပ်ကၠုၚ်ဂှ်ရ ကၟိန်ဍုၚ်ဝွံ နူဒိုဟ်နာနာ သဝ်စှ်ေကၠုၚ်တုဲ ပဋိပက္ခရပ်လွဟ်တံကဵု ပၟတ်ပၞာန်အပ္ဍဲဍုၚ် သာတုဲဂဵုထၞာန်ကၠုၚ်ရ။
ဟိုတ်နူပၞာန်သီအဝဵုကလေၚ်မွဲဝါပၠန်ဏံတုဲ ပၠန်ဂတးက္ညၚ် မမံက်ဂတဝ်ကၠုၚ်ဂှ်ဝွံ ကရောံအပြံၚ်အလှာဲသၞောတ်တၟိဂှ် တၠအဝဵုပၞာန် အိုတ်တုဲ ညံၚ်ဂွံဒက်ပ္တန်ဍုၚ်ကွာန်တၟိရောၚ်ဂှ် ပဒိုဝ်သဝ်တဝ်နဳ ဟီုရ။
“ဟိုတ်ဂှ်ရ ပိုယ်တံဟီု Regime Change သၟးဟွံကပုဟ်၊ System Change မဒှ်သၞောတ်အပြံၚ်အလှာဲ ကသပ်လညာတ်တြေံတြေံတံ၊ ဒ္ဂေတ်ပဋိပတ်၊ ဗီုပြၚ်ချပ်စၚ်ခြၚ်တံဏံသီုဖအိုတ်ဂှ် ဒးလှာဲထောံဖအိုတ်ဏောၚ်။ ဗွဲတၟေၚ် ပ္ဍဲကဵုဍုၚ်ပိုယ်ဏံဂှ် သၞောတ်တၠအဝဵုပၞာန်ကဵု သၞောတ်တၠအဝဵုပၞာန်လဵုဟွံဟီု သၞောတ်တၠအဝဵုပၞာန်ဂှ် ဟွံခိုဟ်ပုဟ်ဟီုတုဲ တၠအဝဵုကောန်အရာပ် တၠအဝဵုပၞာန်ဟွံသေၚ်ဂှ်လေဝ် နွံဒၟံၚ်ဏောၚ်။ လ္တူဂၠးတိဏံလေဝ် နွံလဝ်ရ။ ဟိုတ်ဂှ်ရ သၞောတ်တၠအဝဵုပၞာန်လဵုဟွံဟီု ညံၚ်ဂွံအိုတ်အးအာဂှ် ပိုယ်တံဒးကၠောန်ဏောၚ်။ ညအ်ဂှ် လစွံစိုတ်ပိုယ်တံရ။ ဟိုတ်ဂှ်ရ ဒက်ပ္တန်အာ ဍုၚ်တၟိဏောၚ် မဒှ်ရ“ သာ်ဝွံ ညးသ္ဂးရ။
ပၠန်ဂတးရပ်လွဟ်တံဝွံ ဒှ်အပြံၚ်အလှာဲညးအုပ်ဓုပ် မသ္ကဵုသၞောတ်တၠအဝဵုပၞာန်တံ ဆက်ဂျိုၚ်တဴအာဟွံသေၚ် ဒှ်ပၠန်ဂတးပြံၚ်လှာဲသၞောတ်ရောၚ်ဂှ် ပ္ဍဲဂိတုအဝ်ဂါတ် (၇) တေံ အလဵုအသဳညဳသၟဟ်ဂကူ NUG ကဵု ကံၚ်ဇြဳကဵုကသပ် ပရေၚ်ညဳသၟဟ်ဂကူ NUCC တံ ပံၚ်တောဲလလောၚ်တြးလဝ်ရ။
ပ္ဍဲကဵုဏံ ဒဒှ်ရတၚ်ဒတူလိုၚ် NUCC, NUG တံကဵု ဗော်သွးကောန်ဂကူကရေၚ် KNU တံ တုပ်ဂှ် ပဒိုဝ်သဝ်တဝ်နဳ သ္ပဒတန်ဟီုဂးကၠုၚ်ရ။
မွဲလ္ပာ်ပၠန်ဂှ် ကံၚ်ဇြဳပၞာန်ဝွံ ပါ်ထ္ကးဆီကဵုမက်ဂၠက် ကု EAO ဂမၠိုၚ် ပါလုပ်သီုကဵုဂကောံရပ်လွဟ်ကောန်ဍုၚ်အရၚ် KNU မပါလုပ်ဒၟံၚ် ပ္ဍဲပၠန်ဂတးက္ညၚ်ဏံတံ နွံမံၚ်တုဲ လၟေၚ်ကမၠောန်ပရေၚ်ၜိုဟ်လလမ် ကံၚ်ဇြဳပၞာန်ဂှ်လေဝ် သ္ဇက်ဂွံဒုၚ်တဲဟွံမွဲပုဟ်ဂှ် ပဒိုဝ်သဝ်တဝ်နဳ ကလေၚ်ခၠေဝ်လဝ်ရ။
“ဒက်ပ္တန် ဒပ်မဟာ ၈ ဏောၚ်ဟီုဂှ် ပိုယ်တံတီလေဝ်ဟွံတီပုဟ်။ မိၚ်လေဝ်ဟွံမိၚ်ပုဟ်။ ဆ္ဂး ဟီုဒၟံၚ်မ္ၚးမ္ၚးဏံဂှ် တၟာဂလိုၚ်ရ။ ရံၚ်ကဵုတၚ်နၚ် လလောၚ်ပ္တိတ်လဝ်ဗွဲမလုပ်သၞောဝ်ဂှ်မ္ဂး ပ္ဍဲဂိတုဂျောန် ၁၀ တုဲကၠုၚ်တေံ နူကဵုတမ်ဒပ် KNLA ၂၇ လလောၚ်တြးလဝ်ရ။ တမ်ဒပ် ၂၇ ဂှ် ဒပ်မဟာ ၈ ဟွံသေၚ်ပုဟ်လေဝ်။ ညအ်ဂှ် ဒှ်ဂကောံနွံဒၟံၚ် ပ္ဍဲကဵုဒပ်မဟာ ၆ ရဏောၚ်။ ပိုယ်တံဂှ် ဒပ်မဟာ ၆၊ ဒပ်မဟာ ၄ တံဂှ် တိဍာ်စုက်ဒၟံၚ်ဏောၚ်။ လ္တူဒၞါဲမသၠးဒၟံၚ်ဏံဂှ် ညးတံ ချဳဒရာၚ်ဂှ် နွံတွဵုရဏောၚ်။ လဆောဝ်လဆောဝ် တတ်အာတတ်ကၠုၚ်ဂှ် နွံ။ တုဲပၠန် ဂေတ်ကၚ် လ္တူဂၠံၚ်ပျဳထံၚ်သု စၟတ် ၈ ဂှ် ဒှ်အာကမၠောန်လၟေၚ်ၚ် ကမၠောန်ကၠောန်ဒၟံၚ်တွဵုယျ။ ဒက်ဒပ်မဟာတၟိဟီုဂှ် ပ္ဍဲကဵုပိုယ်တံ မုဟွံမိၚ်ပုဟ် “ သာ်ဝွံ ညးသ္ဂးရ။
ဗော်သွးကောန်ဂကူကရေၚ် KNU ဝွံ ပ္ဍဲသၞာံ ၂၀၁၅ ပ္ဍဲလက်ထက်အလဵုအသဳဥူတုၚ်ဇြုၚ်တေံ ကရောံဂကောံရပ်လွဟ်ကောန်ဍုၚ်အရၚ် (၁၀) ဂကောံတံဂှ် ထ္ပက်လဝ်စၟတ်တဲ ပ္ဍဲကဵုလိက်ကသုက်ဒေါအ်ပန်ပှော်အလုံဍုၚ် (NCA) ရ။
ဆ္ဂး ဒပ်ပၞာန်ဝွံ ကြဴနူဒပ်ပၞာန်သီအဝဵုတုဲဂှ် ဟိုတ်နူလိုန်ပလီုထောံ သ္ဇိုၚ်မူအခန် (၁) ပါလုပ်ဒၟံၚ် ပ္ဍဲကဵုလိက်ကသုက် NCA တံဂှ်ရ လိက်ကသုက်ဒေါအ်ပန်ပှော် NCA ဂှ် လီုအာယျတုဲ သ္ဇက်ဂွံဒးဒ္ဂေတ်ဗက်လေဝ် ဟွံမွဲပုဟ်ဂှ် အပ္ဍဲအကြာတ္ၚဲတံဏံ KNU လလောၚ်ပ္တိတ်လဝ်ရ။
မွဲလ္ပာ်ပၠန်ဂှ်လေဝ် ညးသၟတ် ဒစဵုဒစးပရေၚ်ပၞာန်သီအဝဵုတုဲ ထောံလသာကၠုၚ် ဍုၚ်ဇၞော်ကွာန်လှုဲတံဂှ် နူကဵု KNU ကဵုဒၟံၚ်တန်ဗ္တောန်ပၞာန်တံနွံတုဲ ပ္ဍဲကဵုပၠန်ဂတးက္ညၚ်ဏံဂှ်လေဝ် ပံၚ်တောဲကဵုဂကောံ PDF တံတုဲ လုပ်ဒၟံၚ်ပေါဲဗ္တိုက်မွဲစွံရ။
အခိၚ်လၟုဟ်ဂှ် ပ္ဍဲကဵုတိဍာ်ထိၚ်ဒဝ် KNU နူကဵုဗွဲဒိုဟ်ပလိုတ် ၜဳသက်တိုၚ် (ခရိုၚ်ညံၚ်လေဝ်ပေန်) စဵုကဵုဒေသ ပျေန်မနာ၊ ဠုက်တိုဝ်၊ ဗွဲဒိုဟ်သၠုၚ်ကျာ ပယျဵုကရေၚ်ဍာဲဂှ်မ္ဂး ကျာ်ထဝ်၊ ၜဳကလေၚ်၊ သဓီု၊ ရေဝ် ကေုာံ ထဝါဲတံ ဒှ်တမ် ကၠောန်ကၠုၚ်ပရေၚ်ပၞာန်တံတုဲ သာတုဲထိၚ်ဒက်ကၠုၚ်မာန်ဂှ် ဟီုပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−KNU
sanlontai