စပ်ကဵုပရေၚ်ဇီုကပိုက်လီုလာ် ဒၟါနူလဗိုတ်ကျာဂှ်တုဲ ကေန်ဂျုၚ်အောန် ပ္တိုန်ဒုဟ် ကုညးတာလျိုၚ်ဂမၠိုၚ်

ပျုၚ်ယာန်၊ အဝ်ဂါတ် (၁၅)

က္ဍိုပ်သ္ကိုပ်ကိုဝ်ရဳယျာသၟဝ်ကျာ ကေန်ဂျုၚ်အောန်ဝွံ သွက်အရာမ္ဒးလီုလာ် ဟိုတ်နူလဗိုတ်ကျာဒေသသ္ကုတ်ဂမ္တဴ မတတ်ကၠောံပိုက်လဝ် တ္ကအ်ကိုဝ်ရဳယျာ ပ္ဍဲသတ္တာဟတုဲကၠုၚ်တေံဂှ် ပ္တိုန်လဝ်ဒုဟ် ကုသၞာဲဒဴတာလျိုၚ်နွံ သွက်ဂွံစဵုဒၞါတံရောၚ်ဂှ် ပ္ဍဲဂိတုအဝ်ဂါတ် (၁၄) တေံ မဳဒဳယျာကၟိန်ဍုၚ်ပိုၚ် ထ္မံက်ထ္ၜးလဝ်ရ။

လဗိုတ်ကျာဒေသသ္ကုတ်ဂမ္တဴ ခါနာန် ကၠာဂွိုအ်ပ္တဝ်ကၠုၚ်က္ဍိုပ် ကုတ္ကအ်ကိုဝ်ရဳယျာဂှ် တတ်ကၠောံဍုၚ်ဂျပါန်တုဲ လုပ်စိုပ်လဝ်ဂှ်ဝွံ ပ္ဍဲကဵုတ္ၚဲသိုက်တုဲကၠုၚ်တေံ လုပ်စိုပ်ကၠုၚ် ကိုဝ်ရဳယျာသၟဝ်ကျာတုဲ ပ္တဝ်အာက္ဍိုပ် ဗွဲဒိုဟ်သၠုၚ်ကျာတံတုဲ ဗြဲရိုပ်ဂူက္တဵုဒှ်လဝ်ရ။

ဟိုတ်နူဂြိုပ်ဆုဂမၠိုၚ်လီုလာ်အိုတ်တုဲ ၜိုန်ရဒုၚ်အဍေဝ်ဍာ ကုဘဲဒဏ်ဍာ်ဇၞော်ဍာ်ကလိုပ်တံမာန်ကီုလေဝ် ဟိုတ်နူစမြိုၚ်သ္ဇိုၚ်ဟွံခိုၚ်တံဂှ်တုဲ ကိုဝ်ရဳယျာသၟဝ်ကျာ မလ္ၚုလ္ၚန်ကၠၚ်ကၠောန်ဝါတ်ဒိုက်ဂှ်ဝွံ ဘဲအန္တရာယ်သဘာဝတံက္တဵုဒှ်မ္ဂး သ္ကဵုဇီုကပိုက်တဴ ဇၞော်ကဵုဇြဟတ်မာန်ရ။

အခိၚ်ဂေတ်ဗဵုဒၟံၚ် ဝါဗ္ၚဍာ်ဗၠိုက်ဒၟံၚ် မၞုံဗၟံက်ဍုၚ်ဂှ် ကေန်ဂျုၚ်အောန်ဝွံ ဟိုတ်နူပြဝညးတာလျိုၚ် နူဒေသမဆေၚ်စပ်တံ တံၚ်အခိၚ် ဟွံကေတ်တာလျိုၚ်တံဂှ်တုဲ ဒဒှ်ရဒးဒုၚ်စသိုၚ်လဝ် ပရေၚ်လီုလာ်ဆောံလေၚ် ဂၠိုၚ်နူကဵုဒေသတၞဟ်ဟ်တံဂှ် ဟီုဂးလဝ်ဂှ် မဳဒဳယာကၟိန်ဍုၚ်ပိုၚ် (KCNA) ထ္မံက်ထ္ၜးလဝ်ရ။

“သၞာဲဒဴနူကဵုဒေသမဆေၚ်စပ်တံဂှ် ဟွံစွံအာရီုကဵု လ္တူပရေၚ်ရေၚ်တၠုၚ်တွဵုရးဂှ်တုဲ ဟွံကၠောန်သ္ပ ပရေၚ်ပလေဝ်ပလေတ်တံတုဲ ဒေသဏံဝွံ ဒးဇီုကပိုက်လဝ် ဂၠိုၚ်နူကဵုဒေသတၞဟ်ဟ်တံ တၟာဂလိုၚ်ရောၚ်” သာ်ဝွံ နိဿဲကေတ် ဂလာန်ကေန်ဟီုဂးလဝ်ဂှ်တုဲ ထ္မံက်ထ္ၜးလဝ်ရ။

လဗိုတ်ကျာဂှ်ဝွံ ဟိုတ်နူကြပ်ကၠုၚ် ကဵုတ္ကအ်ဂှ်တုဲ ကိုဝ်ရဳယျာသၟဝ်ကျာဝွံ ဒးကၠောန်ၜိုတ်လဝ် အစဳဇန်ချဳဒရာၚ် သွက်ဂွံဆေၚ်မုက် ကုဘဲဒဏ်ရာသဳဥတု ဓမ္မတာဟွံသေၚ်တံဂှ်တုဲ အစဳဇန်မသ္ကဵုဇီုကပိုက်တဴ ဗၞိက်ပ္တိတ်ပရေၚ်ပိုန်ဒြပ်ကၟိန်ဍုၚ် အောန်အိုတ်ဂှ်လေဝ် ကိုဝ်ရဳယျာသၟဝ်ကျာ လလောၚ်တြးလဝ်ရ။

သ္ကုတ်သၟဝ်ကျာဏံဂှ်ဝွံ လဆောဝ်လဆောဝ် ဒးဒုၚ်စသိုၚ်ဒၟံၚ် ဘဲဒဏ်ကၞောဝ်ကၠောဝ်ဗျဵုတံဂှ်တုဲ မၞိဟ်ဂၠိုၚ်ကဵုကၠံ ချိုတ်အာလဝ်တုဲ ပ္ဍဲကဵုသၞာံ ၁၉၉၀ လောန်ကၠုၚ်တေံဂှ် မၞိဟ်ၜတ်ဗၞတ် ဂၠိုၚ်ကဵုပြကောဋိကိုဋ် ချိုတ်အာလဝ်ရ။

သွက်ဂွံသောၚ်ကလး ပြသၞာပရေၚ်တဵုလွဳ ကေုာံ ပရေၚ်ဇွောံမစၞစပိုတ်အိုတ်တံဂှ်တုဲ ပ္ဍဲဂိတုဖေဖဝ်ဝါရဳတုဲကၠုၚ်တေံလေဝ် ကၠောန်ဗဒှ်လဝ် ကောံဓရီုဗော်ကဆံၚ်သၠုၚ်ကၟိန်ဍုၚ်ရ။

Ref: CNA