ပ္ဍဲဒဵုလက်ဟတ်(လက်ခတ်) ဗ္ဒာဲဍုၚ်ဗြဝတဳ ပေါဲဗတိုက်သ္ကာတ်မြဟ်ဒၟံၚ်

ဗြဝတဳ၊ အဝ်ဂေတ်(၁၆)

သွက်ဂွံကလေၚ်သီကေတ် ကုန်ဗဒိုပ်တိုၚ်တာဝါ ဒဵုလက်ဟတ်(လက်ခတ်) မၞုံဗ္ဒာဲဍုၚ်ဗြဝတဳ တွဵုရးကရေၚ်မာန်ပၠန်ဂှ် ဟိုတ်နူဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန် ဗလးကျာ ဗလးတိ သီုကဵုဇြဟတ်ပေၚ်ၚ်တုဲ သ္ပတံနူ ဂိတုအဝ်ဂေတ် စၟတ်တ္ၚဲ(၁၅) အခိၚ်နူဂယးတုဲ ပေါဲဗတိုက်သ္ကာတ်မြဟ် က္တဵုဒှ်ဒၟံၚ်ရဂှ် ဂွံတီကေတ် အတိုၚ်ပရိုၚ်ဗလးမုက်တိရ။

ကံၚ်ဇြဳပၞာန်ကဵု ဒပ် BGF တအ် သုၚ်စောဲပန်ရီုကဵုလွဟ်ဇၞော်၊ ပန်ရီုကဵုက္ၜၚ်ကျာတုဲ ဟိုတ်နူထ္ပက်ပၞာန် ဗတိုက်ဒၟံၚ်ဗဒိုၚ်တိုၚ်တာဝါ ဒဵုလက်ဟတ် မၞုံဗ္ဒာဲဍုၚ်ဗြဝတဳဂှ်တုဲ ပေါဲဗတိုက်သ္ကာတ်မြဟ် က္တဵုဒှ်ဒၟံၚ်ကဵု အကြာဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA ရ။

ပ္ဍဲကဵုပေါဲဗတိုက်ဂှ် လ္ပာ်ကံၚ်ဇြဳပၞာန် BGF တအ် ဇီုကပိုက်ဒးချိုတ်လဝ် နွံဂၠိုၚ်ဒၟံၚ်တုဲ လ္ပာ်ဒပ်ပံၚ်ကောံ KNLA လေဝ် ပရေၚ်ဇီုကပိုက်လ္ၚဵု နွံဒၟံၚ်ရဂှ် ပြဟ်ဟ်ဏံ ၜိုန်ရဂွံလဝ်ပရိုၚ်ကီုလေဝ် သွက်ဂွံသ္ပဒ္တန် အကာဲအရာပေါဲဗတိုက်ၜါလ္ပာ်ဂှ် နကဵုသြၚ်လောန်တိုၚ်(မ်) ဆက်လ္ၚတ်ဂၠိုက်ဂၠာဲဒၟံၚ်ဖိုဟ်ရ။

ဗဒိုပ်တိုၚ်တာဝါ ဒဵုလက်ဟတ် မၞုံဗ္ဒာဲဍုၚ်ဗြဝတဳ တိဍာ်ဒပ်မဟာ (၆) KNU ပၟိက်ဇၞော်ဒၟံၚ် သွက်ကံၚ်ဇြဳပၞာန် အတိုၚ်မဟာဗျူဟာပရေၚ်ပၞာန်ဂှ် ပ္ဍဲကဵုဂိတုဂျူလာၚ် စၟတ်တ္ၚဲ (၂၁)တုဲကၠုၚ်တေံ ဒပ်ပံၚ်ကောံ ကရောၚ်ပၞာန်ကဝ်ဗရာ KNLA တအ် လုပ်စိုပ်ဗတိုက်သီကေတ်လဝ်ရ။

ကြဴနူဒပ်ပံၚ်ကောံ KNLA တအ် သီကေတ်လဝ် ဗဒိုပ်ကုန်တိုၚ်တာဝါ ဒဵုလက်ဟတ်ဂှ်တုဲ လ္ပာ်ဒပ်ကံၚ်ဇြဳပၞာန်ကဵု ဒပ် BGF တအ် ညံၚ်ဂွံက္လေၚ်ကေတ်ဗဒိုပ်မာန်ပၠန်ဂှ် သုၚ်စောဲပန်ရီုကဵုလွဟ်ဇၞော်၊ ပန်ရီုကဵုက္ၜၚ်ကျာတုဲ ဗတိုက်လဝ်ဂှ် စဵုကဵုဂိတုအဝ်ဂေတ် စၟတ်တ္ၚဲ (၁၃) လၟိဟ်ပေါဲဗတိုက် ဟွံအောန်နူ (၁၀)ဝါ ဒှ်လဝ်ရဂှ် ကရောၚ်ပၞာန်ကဝ်ဗရာ လလောၚ်တြးလဝ်ပရိုၚ်ရ။

ပ္ဍဲပေါဲဗတိုက် အကြာ ဒပ် BGF ကံၚ်ဇြဳပၞာန် ပ္တိတ်ဒၟံၚ်ဇြဟတ် သွက်ဂွံက္လေၚ်သီကေတ် ဗဒိုပ်တိုၚ်တာဝါ ဒဵုလက်ဟတ်ဂှ်ကဵု ဒပ်ပံၚ်ကောံ KNLA တအ် ဒှ်လဝ်ဂှ် လ္ပာ်ကံၚ်ဇြဳပၞာန် သီုဗိုလ်ဇၞော် (၂)တၠ အပံၚ်လၟိဟ် (၁၇)တၠ ဒးချိုတ်လဝ်တုဲ ညးဒးလဝ်ဘဲဝပ် (၃၄) တၠနွံလဝ်တုဲ လ္ပာ်ဒပ်ပံၚ်ကောံတအ်ဂှ် သ္ဂံၚ် (၁) တၠ ဒးပြဟ်လလုဲတုဲ ဒးလဝ်ဘဲဝပ် (၈)တၠရဂှ် ကရောၚ်ပၞာန်ကဝ်ဗရာ လလောၚ်တြးလဝ် ပ္ဍဲဂိတုအဝ်ဂေတ် စၟတ်တ္ၚဲ (၁၄)ရ။

လ္ပာ်ဒပ်ကံၚ်ဇြဳပၞာန် ဂစာန်ပ္တိတ်ဒၟံၚ်ဇြဟတ် သွက်ဂွံက္လေၚ်သီကေတ် ဗဒိုပ်တိုၚ်တာဝါ ဒဵုလက်ဟတ်ဂှ် ဒုအကြာပ်ဒပ်မွဲတၠကဵု ကောန်ဒပ်မွဲတၠ ကၠုၚ်ဖျေံလွဟ်လဝ်လွဟ် ဇရေၚ်ဒပ်ပံၚ်ကောံ KNLA သီုလွဟ်ဇၞော်ဍောတ် ကၠုၚ်စိုပ်လဝ်ရဂှ် ကရောၚ်ပၞာန်ကဝ်ဗရာ လလောၚ်တြးလဝ် ပရိုၚ်ရ။

ပရိုၚ် – သြၚ်လောန်တိုၚ်(မ်)

ဗီုရုပ် – KNU