သေတ်တွေ – အဝ်ဂေတ်(၁၅)
တွဵရးရခေၚ်၊ ပ္ဍဲဍုၚ်သေတ်တွေ ကောန်အရာပ် (၅)တၠ ပါလုပ်သီုဒဝ်ညောညောအေ ဒှ်ညးချဳုရာၚ်ကတိုၚ်ကၟဟ်ပရေၚ်ညးဗြဴရခေၚ်ဂှ် ဒပ်ကံၚ်ဇြဳပၞာန် ရပ်ကော်ဏာလဝ်ရဂှ် ဂကောံကၟိန်အိန်ထံၚ်ညး ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
တ္ၚဲဏံ အခိၚ်ဒေါဝ်တ္ၚဲ ဗၠာဲသၟိၚ် သီုညးကျိုၚ်ဗိုက်လ္တက်လဝ် ကယိုၚ်ကောန်အရာပ်တအ် စိုပ်ကၠုၚ်သ္ၚိဒၟံၚ်ညး သွက်ဂွံသၟာန်သၟုက် နွံဒၟံၚ်ဂးတုဲ နူကော်ကေတ်ဏာတုဲဂှ် ဒးဒုၚ်ရပ်လဝ်ရ။
“မိပိုဲ ဂွံအာယုက် (၆၇) သၞာံယျ။ ယဲဆီၜေတ် သီုယဲဆီဍာတ် နွံဒၟံၚ်။ ကၠာညးဟွံဂွံစပုၚ်က္ဍၚ်ဏီ သွက်ဂွံဒးသၟာန် နွံဒၟံၚ်ဟီုတုဲ ဗၠာဲသၟိၚ် ကဵုညးကျိုၚ်လဝ် ကယိုၚ်အရာပ် ကၠုၚ်ကော်ဏာလဝ်ရ။ လၟုဟ်ပိုဲဗက်အာဂှ် ကေတ်ရမာန်ညးတုဲ ပၠုပ်စုတ်ထောံထံၚ်ယျ။ စၞစကဵုဂဥုဲ သွက်ညး ဒးဂစာန်စုတ်လဝ် တၟာကလှ်ေရ။ ဣဏံဂှ် ဒှ်ကိစ္စ ပရေံဟိန်လောန်ရ”ဂှ် ကောန်ဝုတ်ဒဝ်ညောအေ ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ကံၚ်ဇြဳပၞာန် ဂွံရပ်ဏာလဝ် ကောန်အရာပ် ပါလုပ်သီုဒဝ်ညောညောအေဏံဂှ် ဟိုတ်နူစၟတ်သမ္တီ တ္ၚဲပြဒ္ဒညာသြောံသ္ၚု တွဵုရးရခေၚ် ကၠောန်ဗဒှ်လဝ် ပ္ဍဲဂိတုအဝ်ဂေတ် စၟတ်တ္ၚဲ (၁၃)တေံရဂှ် ပရေၚ်ဟီုဂးပါ်ပါဲ နွံဒၟံၚ်ရ။
အခိၚ်လၟုဟ်ဏံ ညးဒးဒုၚ်ရပ်လဝ် (၅)တၠ ပါလုပ်သီုဒဝ်ညောညောအေတအ်ဂှ် ပံက်လဝ်ဂဗုတ် နကဵုၝောံပိုဒ် ၅၀၅ (ခ) ရဂှ် ညးစုက်လုက်ကဵု ဗဒိုပ်ဗၠာဲသၟိၚ်တအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ရာဇသာတ်ဇၞော် သၞောဝ်ဥဒေ ၅၀၅(ခ) ဂှ် ဒဏ်ထံၚ်ၜါသၞာံကဵုဒှ်၊ ဒဏ်သြန်ကဵုဒှ်၊ သီုဒဏ်ၜါဂကူကဵုဒှ် ဒှ်ၝောံပိုဒ်ဖျေံမာန်ရဂှ် ဂွံတီကေတ်ရ။
ကြဴနူဒပ်ပၞာန်သီအဝဵုကၟိန်ဍုၚ်ဗၟာတုဲ ညးချဳဒရာၚ်အခေါၚ်အရာမၞိဟ် ကေုာံ ညးချဳဒရာၚ်ဒဳမဝ်ကရေဇြဳ ဗ္ဒာဲ (၂၅၀၀၀) ပြၚ် ဒးဒုၚ်ရပ်ဒက်ထိၚ်ဒဝ်လဝ်ရဂှ် AAPP လလောၚ်တြးလဝ်ရ။
ပရိုၚ် – သြၚ်လောန်တိုၚ်(မ်)
ဗီုရုပ် – CJ
sanlontai