ရေၚ်ယာဉ်ကွဳစက်ကံၚ်ဇြဳပၞာန် ဒးဒုၚ်ဗတိုက်လဝ် ပ္ဍဲကျာ်ထဝ်တုဲ ဟွံအောန်နူ (၅)တၠ ဇီုကပိုဒးချိုတ်လဝ်နွံမာန်

ကျာ်ထဝ်၊ အဝ်ဂေတ်(၁၆)

တွဵုရးဍုၚ်မန်၊ ပွိုၚ်ဍုၚ်ကျာ်ထဝ်၊ ပ္ဍဲဂၠံၚ်ဇၞော် လဂုၚ်-မတ်မလီု ကွာန်တယျေတ်ကုမ်ဂှ် ပ္ဍဲဂိတုအဝ်ဂေတ် စၟတ်တ္ၚဲ (၁၅)အခိၚ်နူဂယး ၜိုတ် (၁၀)နာဍဳဂှ် ကြတ်ဗတိုက်လဝ် ရေၚ်ယာဉ်ကွဳစက်ဇွောံမ ကံၚ်ဇြဳပၞာန်ရဂှ် ညးတာလျိုၚ် PDF ခရိုၚ်သဓီု ကိုဝ်အေမေန်ထောန် ဟီုကဵု ဌာန်ပရိုၚ်သြန်လောန်တိုၚ်(မ်)ရ။

ရေၚ်ယာဉ်ကွဳစက်ဇွောံမကံၚ်ဇြဳပၞာန် ကွဳစက်ပါလုပ် (၅)ဖ္ဍိုက် ဒဳလုပ်ကၠုၚ် ပွိုၚ်ဍုၚ်ၜဳကလေၚ် နူကဵုပွိုၚ်ဍုၚ်ကျာ်ထဝ်ဂှ် ဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA၊ PDF တအ် ပန်ပှော်ဗတိုက်လဝ် နကဵုလွဟ်ဇၞော်ဍောတ်ရ။

ဟိုတ်နူကြတ်ဗတိုက်လဝ်တုဲ ကွဳစက်ပၞာန် (၂) ဖ္ဍိုက် ဇီုကပိုက် ဒးလီုလာ်လဝ်နွံတုဲ ကောန်ဒပ်ကံၚ်ဇြဳပၞာန် ဟွံအောန်နူ (၅)တၠ ဇီုကပိုက် ဒးချိုတ်လဝ်နွံမာန်ရဂှ် ဟီုသ္ဂးလဝ်ရ။

ကြဴနူဒးဒုၚ်ဗတိုက်လဝ်တုဲ ရေၚ်ယာဉ်ကွဳစက်ကံၚ်ဇြဳပၞာန် ဒဳဓရိပ်ဏာဂှ် ပန်ပှ်ောဏာလဝ် ပ္ဍဲသ္ကဲဂၠံၚ်ကွဳစက် လဂုၚ်-မတ်မလီု ပ္ဍဲမွဲဗွိုၚ်ဂှ် ကြာန်န်ရဂှ် ဂွံတီကေတ် နူညးဒေသတအ်ရ။

ပ္ဍဲချာန်နေဝ်တေဝ်လဳဂရာမ် ဠဝ်ဗဳဒပ်ပၞာန်တအ်ဂှ်မ္ဂး ပရေၚ်ကြတ်ဗတိုက်လဝ် ရေၚ်ယာဉ်ကွဳစက်ကံၚ်ဇြဳပၞာန်ဂှ် ကောန်ဒပ်ကံၚ်ဇြဳပၞာန်လ္ၚဵု ဇီုကပိုက်ဒးလဝ်ဘဲဝပ် နွံဒၟံၚ်ရဂှ် ချူပ္တိုန်ဓမံက်ထ္ၜးလဝ် နွံဒၟံၚ်ရ။

ဂိတုဂျူလာၚ် စၟတ်တ္ၚဲ (၂၈)တုဲကၠုၚ်တေံလေဝ် သၞေဟ်ကၚ်စၟဳစၟတ် တၞုၚ်ဂၠံၚ်ဒဒန်သတိုၚ် ကွာန်မုက်ပြေၚ် ပွိုၚ်ဍုၚ်ကျာ်ထဝ်ဂှ် ဒပ်ပံၚ်ကောံ KNLA တအ် အာစိုပ်ဗတိုက်လဝ်တုဲ ပ္ဍဲပရေၚ်ပန်ဗတိုက်လဝ်ဏံ ပရေၚ်ဇီုကပိုက်ဒးချိုတ်လဝ် နွံသီုၜါလ္ပာ်ရ။

ပရိုၚ် – သြၚ်လောန်တိုၚ်(မ်)

ဗီုရုပ် – Social Media