လ္ဂုၚ်၊ အဝ်ဂါတ် (၁၆)
သွက်ၚုဟ်သ္ၚုအပ္ဍဲဍုၚ် ဂွံညိၚ်ဂးတုဲ နူကဵုဂအုပ်ဂကောံသြောံသ္ၚုဍုၚ်ဗၟာ ၜိုန်ရပ္တိတ်သွံဒၟံၚ် သ္ၚုအရန်တံဂှ်ကီုလေဝ် အပ္ဍဲဗွဝ်ဖျာ ၚုဟ်သ္ၚုတိုန်ဒၟံၚ်ဖိုဟ်ဂှ် သၟာဗၞိက်သ္ၚုတံကဵု ညးဗြဴတၠသ္ၚိတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဂအုပ်ဂကောံသြောံသ္ၚုဍုၚ်ဗၟာဂှ် ညံၚ်ၚုဟ်သ္ၚုဂွံညိၚ် ကေုာံ သွက်ညးဍုၚ်ကွာန်စသုၚ်ဒၟံၚ်တံ ညံၚ်ဂွံဒှ်ၚုဟ်ဍာံ ကပေါတ်ဍာံဂှ် နူကဵုသွာၚ်ပုဂ္ဂလိကဂှ် စနူဂိတုအဝ်ဂါတ် (၇) တုဲကၠုၚ်တေံတုဲ သွံကဵုဒၟံၚ်သ္ၚုအရန် ၅၀၀၀၀ ရိုက်ရ။
ပ္ဍဲအရာပ္တိတ်သွံကဵု သ္ၚုအရန်ဂှ် သ္ၚုမောဝ် (ရွှေဘို၊ ပေါ်ဆန်မွှေး) မွဲရိုက်ဂှ် ၁၂၀၀၀၀ ဒ္ကေဝ်၊ သ္ၚု (ပေါ်ဆန်မွှေး) ဨရာဝတဳမွဲရိုက်ဂှ် ၉၇၀၀၀ ဒ္ကေဝ်၊ သ္ၚု (ဧည့်မထ) ဂကူသ္ၚုကြံၚ် မွဲရိုက် (၆၅၀၀၀) ဒ္ကေဝ် သာ်ဝွံ နူကဵုဗွဝ်ဖျာလ္ဂုၚ် သွံတြးကဵုဒၟံၚ်ရ။
ၚုဟ်သ္ၚုအပ္ဍဲဍုၚ် ဂိတုအဝ်ဂါတ် ၁၅ ဂှ် သ္ၚု (ရွှေဘိုပေါ်ဆန်း) မွဲရိုက်ဂှ် ၁၄၅၀၀၀ ဒ္ကေဝ်၊ သ္ၚု (ပေါ်ဆန်း) မွဲရိုက်ဂှ် ၁၁၀၀၀၀ ဒ္ကေဝ် ကေုာံ သ္ၚု (ရက် ၉၀) မွဲရိုက်ဂှ် ဗ္ဒါဲ ၈၀၀၀၀ ဒ္ကေဝ် ၚုဟ်သၠုၚ်တိုန်ကၠုၚ်လဝ်ရောၚ် ဂွံတီကေတ် နူကဵုဒေၚ်ဗၞိက်သ္ၚုဝါတာန် ဍုၚ်လ္ဂုၚ်ရ။
ကၠာဂွိုအ်ပ္တိတ်သွံသ္ၚုအရန်ဏီ ပ္ဍဲကဵုဂိတုအဝ်ဂါတ်မံက်တေံ သ္ၚု(ရွှေဘိုပေါ်ဆန်း) ဂှ် မွဲရိုက် ၁၃၀၀၀၀ ဒ္ကေဝ်၊ သ္ၚု (ပေါ်ဆန်း) ဓမ္မတာမွဲရိုက်ဂှ် ၉၅၀၀၀ ဒ္ကေဝ်၊ သ္ၚု (ရက် ၉၀) မွဲရိုက်ဂှ် ပွဳပွူ ၇၆၀၀၀ ဒ္ကေဝ်ဓဝ် ဂွံလဝ်ၚုဟ်ကီုလေဝ် အခိၚ်လၟုဟ်ဂှ် ၚုဟ်ထ္ပက်တိုန်ကၠုၚ်ပၠန်ရ။
ၚုဟ်သ္ၚုဝွံ ဟိုတ်နူၚုဟ်လှုဲဗၟာ စှ်ေကၠုၚ်အဆက်က်ကီု၊ သ္ၚုသှ်ေအပ္ဍဲဍုၚ် အောန်စှ်ေကၠုၚ်ကီု၊ ခရိတ်အိုတ်နာနာ သၠုၚ်တိုန်ဒၟံၚ် ဂၠိုၚ်ကဵုဆဂှ်တုဲ ၚုဟ်ထပ်ဗက်တိုန်ကၠုၚ်ကီုဂှ် သၟာဗၞိက်သ္ၚုမွဲတၠ ဟီုရ။
ဟိုတ်နူၚုဟ်သ္ၚုအပ္ဍဲဍုၚ် ထပ်သၠုၚ်တိုန်ကၠုၚ်ဂှ်ရ ညးဍုၚ်ကွာန်သ္ဇိုၚ်တံဝွံ သွက်ဂွံရာန်စသုၚ်လၟေၚ်တ္ၚဲရဂှ် ဒှ်ကၠုၚ်ဒၟံၚ်အခက်အခုဲဂှ် ဂွံတီကေတ်ရ။
ညးစိုန်သ္ကီု ကမၠောန်သ္ၚုတံဂှ် ၚုဟ်သ္ၚုဝွံ ကရောံပရေၚ်ဍုၚ်ကွာန်ဟွံညိၚ်ဝတ်ဂှ် ပရေၚ်တဵုလွဳတံ ထပ်အောန်စှ်ေကၠုၚ်ကီု၊ ဟိုတ်နူတၚ်နွံပၟိက်ဗွဝ်ဖျာ ဇၞော်သၠုၚ်ကၠုၚ်ဂှ်တုဲ အပ္ဍဲပွိုၚ် (၃) ဂိတုကၠုၚ်စိုပ်ဏံ ညးဍုၚ်ကွာန်တံ ထပ်ဒးဒုၚ်စသိုၚ် ဘဲဒဏ်ၚုဟ်ဖျာက္ဍၚ်တံ နွံမာန်ဂှ် သ္ၚဳဂၠိပ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−Social Media
sanlontai