ဍာ်ဗု၊ အဝ်ဂါတ် (၁၆)
ဒပ်ကံၚ်ဇြဳပၞာန် မထ္ပက်ကၠုၚ်ကရောၚ်ပၞာန် အပ္ဍဲကွာန်ဨကနီ ပွိုၚ်ဍုၚ်ဍာ်ဗု၊ ရးဒေသဇၞော်တၞၚ်သဳဂှ် ဟိုတ်နူစံၚ်ပလီုပလာ်လဝ်တုဲ သ္ၚိဒၟံၚ် ဟွံအောန်နူကဵု ၄၀ မ ပၟတ်တူလီုလာ်အာလဝ်ရောၚ် ညးဒေသတံကဵု ညးတာလျိုၚ် ပကဖ ပွိုၚ်ဍုၚ်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တုဲကၠုၚ် ပ္ဍဲဂိတုအဝ်ဂါတ် (၁၄) တေံ ကရောၚ်ပၞာန်ကံၚ်ဇြဳပၞာန် ဇြဟတ်ဒပ် ၁၀၀ ပြၚ်ပါဂှ်ဝွံ လုပ်စိုပ်ထ္ပက်ကၠုၚ်ပၞာန်ဂှ်ရ က္တဵုဒှ်လဝ်ပေါဲဗ္တိုက်ၜါလ္ပာ် ကုဂကောံဒပ်ပံၚ်ကောံစဵုဒၞါဒေသတံ ပ္ဍဲကဵုကွာန်ဨကနီဂှ်ရ။
ဒပ်ကံၚ်ဇြဳပၞာန်ဝွံ အပ္ဍဲပေါဲဗ္တိုက်ဂှ် စံၚ်ပလီုပလာ်လဝ် ကွာန်ဨကနဳဂှ်တုဲ ပြဟ်ဟ်ဏံဂှ် သ္ၚိဒၟံၚ် ဟွံအောန်နူကဵု ၄၀ မ လီုလာ်အာလဝ်တုဲ အပ္ဍဲကဵုကွာန်ဂှ် ဟိုတ်နူယက် ထပ်တိုန်ကၠုၚ်ဒၟံၚ်ဂှ်ရ သ္ၚိဒၟံၚ်ပၟတ်တူလီုလာ် ထပ်ဂၠိုၚ်တိုန်ကၠုၚ်မာန်ရောၚ်ဂှ် ဂွံတီကေတ် အတိုၚ်ဂလာန်ညးဒေသတံရ။
ဟိုတ်နူဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန်ဂှ်ရ ညးဍုၚ်ကွာန်ဒေသ ၜိုတ် ၂၀၀၀၀ ပြၚ် နူကဵုကွာန် (၈) ကွာန် ပါလုပ်သီုကဵုကွာန် ဨကနီ၊ ဝသောန်တဝ်တံ ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲတံရ။
ပ္ဍဲဂိတုအဝ်ဂါတ် (၁၅) ဂှ် ဒပ်ကံၚ်ဇြဳပၞာန်ဝွံ စိုပ်ကၠုၚ်ကရပ် ဒၞါဲညးဍုၚ်ကွာန်ပါဲဒဴဘဲပၞာန် မ္ဒးဂြိပ်ဒဴပါဲဒလေတ်ဒၟံၚ်တံတုဲ ရပ်လဝ် ညးဍုၚ်ကွာန်ဒေသ ဟွံအောန်နူကဵု (၅) တၠတုဲ ဟိုတ်နူပရေၚ်ပန်ပှော် ဒပ်ကံၚ်ဇြဳပၞာန်တံဂှ်တုဲ ညးဍုၚ်ကွာန်ပါဲဒဴဘဲပၞာန်မွဲတၠ ကဵု သၚ်မွဲဇကု ဒးသေနာတ် ကလိဂွံလဝ်ဝပ်ရ။
အပ္ဍဲပေါဲဗ္တိုက် မက္တဵုဒှ်လဝ် နူဏေံတေံဂှ် လ္ပာ်ဂကောံဒပ်စဵုဒၞါဒေသတံဂှ် ကောန်သ္ဂံၚ် ပဳဒဳအာဖ် ၂ တၠ ကလိဂွံလဝ်ဝပ်တုဲ လ္ပာ်ကံၚ်ဇြဳပၞာန်ဂှ်လေဝ် ဇီုကပိုက်ချိုတ်ဂျိုၚ်တံ နွံဒၟံၚ်ကီုလေဝ် လၟိဟ်ချိုတ်တ်ပၠိုတ်တ်ဂှ် ဆက်ဂၠိုက်ဂၠါဲဒၟံၚ်ဖိုဟ်ရောၚ် ညးတာလျိုၚ် ပကဖ ပွိုၚ်ဍုၚ်ဍာ်ဗုမွဲတၠ ဟီုရ။
ဟိုတ်နူဒပ်ကံၚ်ဇြဳပၞာန် ထ္ပက်လဝ်ကရောၚ်ပၞာန်ဂှ်ရ ပေါဲဗ္တိုက်တံ ထပ်သ္ကာတ်မြဟ်ကၠုၚ်မာန်တုဲ နကဵုညးဍုၚ်ကွာန်ဒေသတံ ဗွဲမပြဟ် သွက်ဂွံပါဲဒဴ ဒၞါဲဗၠးဘဲတံဂှ်ကဵု သွက်ဂွံဒ္ဂေတ်ဗက်ကဵု စေဝ်ပၞောန် မလလောၚ်ပ္တိတ်လဝ်တံအိုတ်ဂှ် ဂကောံပကဖ ပွိုၚ်ဍုၚ်ဍာ်ဗု ဒုၚ်လဝ်ဂုဏ်နမေတ္တာရ။
ပရိုၚ်−သြၚ်လောန်တိုၚ်(မ်)
ဗီု−Social Media
sanlontai