အခေါၚ်အာကၠုၚ် ဂကောံရပ်လွဟ်တံဂှ် ပ္ဍဲ NCA သၞောတ်ဗ္ၜတ်လဝ်သာ်လဵုရော

လ္ဂုၚ်၊ အဝ်ဂါတ် (၁၆)

ပ္ဍဲကဵုလိက်ကသုက်ဒေါအ်ပန်ပှော်အလုံဍုၚ် (NCA) ဂှ် စပ်ကဵုအခေါၚ်အာကၠုၚ်ဗွဲမဗၠးၜး ဒပ်ပၞာန်ကဵု EAO တံဂှ်တုဲ အရာမသၞောတ်ဗ္ၜတ်လဝ်တံ နွံဒၟံၚ်ရောၚ် က္ဍိုပ်သ္ကိုပ် EAO ထ္ပက်လဝ်စၟတ်တဲဒေါအ်ပန်ပှော်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ပ္ဍဲကဵုလက်ထက်အလဵုအသဳ သမ္မတဥူတုၚ်ဇြုၚ် သ္ကိုပ်ဗိုလ်ပၞာန်တြေံတေံဂှ် ဂကောံရပ်လွဟ်ကောန်ဍုၚ်အရၚ် (၈) ဂကောံတံ စထ္ပက်လဝ်စၟတ်တဲ လိက်ကသုက် NCA ရ။

ကြဴနူဂှ်တုဲ ပ္ဍဲကဵုလက်ထက်အလဵုအသဳကောန်အရာပ် နူကဵုက္ဍိုပ်သ္ကိုပ်ညးဍုၚ်ကွာန် ဒဝ်အံၚ်သာန်သုကျဳ မသ္ကိုပ်သ္ကဂှ် ဂကောံရပ်လွဟ်ကောန်ဍုၚ်အရၚ်တၞဟ်ဟ် ၂ ဂကောံပၠန် ထပ်ထ္ပက်ကၠုၚ်လဝ်စၟတ်တဲ ပ္ဍဲကဵုလိက်ကသုက် NCA ဂှ်ရ။

ဂဥုပ်ဗဵုဇၞော် သဝ်ကျဝ်ညောအ် မဒှ်ညးမၞုံအခေါၚ်ဟီုဂး ဂကောံဒေါအ်ပန်ပှော် (၇) ဂကောံဂှ် နကဵုဂကောံထ္ပက်လဝ်စၟတ်တဲ NCA တံ ရပ်လွဟ်တုဲ ယဝ်ရမိက်ဂွံအာ ပ္ဍဲကဵုတိဍာ် ဂကောံတၞဟ်ဟ်တံ မထိၚ်ဒက်လဝ်ဂှ်မ္ဂး သီုၜါလ္ပာ်ဒစးဒုၚ်ပ္ညဳပ္ညပ် ကေတ်တၚ်တုပ်စိုတ်တုဲမှ အာကၠုၚ်ဂွံဏောၚ်ဂှ် သ္ဂးရ။

“ ဒၟါနူဟိုတ်နာနာတုဲ ရပ်လွဟ်တုဲ ယဝ်ရမိက်ဂွံအာ ပ္ဍဲကဵုတိဍာ်ဂကောံတၞဟ်ဟ်တံ ထိၚ်ဒဝ်လဝ်ဂှ်မ္ဂး သီုၜါလ္ပာ် ကေတ်တၚ်တုပ်စိုတ်ပ္ညဳပ္ညပ်ကၠာတုဲမှ သွက်ဂွံအာကၠုၚ်အိုတ်ဂှ် ဂွံလဝ်တၚ်တုပ်စိုတ်နွံ။ ပ္ဍဲကဵုလိက်ကသုက်ဂှ်လေဝ် ထ္မံက်ထ္ၜးလဝ်သာ်ဏံရ။ ၜိုန်ဂှ်ကီုလေဝ် ပပ္တံနူအခိၚ်ထ္ပက် NCA ဂှ်တုဲ တိဍာ်လဵုဂှ် ဒှ်တိဍာ်ထိၚ်ဒဝ်ဏောၚ်၊ တိဍာ်လဵုဂှ် ဒှ်တိဍာ်စၟတ်လဝ်ဏောၚ် မပ္တံသာ်ဏံ ကိစ္စစပ်ကဵုတိဍာ် ကမၠောန်ရေၚ်တၠုၚ်ပ္ညဳပ္ညပ် ထ္မံက်ရုပ်ရဴမာန်တံဂှ် ပိုယ်တံ ဟွံဂွံထပိုတ်လဝ်ဏီပုဟ်” သာ်ဝွံ ညးသ္ဂးတဴရ။

စပ်ကဵုအခေါၚ်အာကၠုၚ်ချဳဒရာၚ် ဒပ်ပၞာန်ကဵု ဂကောံဒပ် EAO ပ္ဍဲကဵုလိက်ကသုက် NCA အခန် (၃) ၝောံပိုဒ် (၈) ဂှ်တုဲ ပါဲနူကဵုဒၞါဲသၞောတ်ဗ္ၜတ်လဝ် လ္ဂောံကဵုပရေၚ်ဂီုကၠီုတုဲမ္ဂး ဒၞါဲလဵုဟွံဟီု ဟွံရပ်လွဟ်မွဲသာ် ကဵုလဝ်အခေါၚ်အာကၠုၚ် ဗွဲမဗၠးၜးရ။

ဆ္ဂး ဂကောံဗော်သွးမွဲလ္ပာ်တေံ ယဝ်ရနွံပၟိက် သ္ဒးအာကၠုၚ် အပ္ဍဲတိဍာ်ထိၚ်ဒဝ်လဝ်တံ နကဵုလွဟ်လက်နက်မ္ဂး ကေတ်တၚ်တုပ်စိုတ်ပ္ညဳပ္ညပ်သီုၜါလ္ပာ်ကၠာတုဲမှ သွက်ဂွံအာကၠုၚ်ဂှ် စၞောန်ပျးလဝ်ရ။

ဂဥုပ်ဗဵုဇၞော် ဃောန်ဥက္ကာ မဒှ်နာယက ဂအုပ်ဂကောံဗၠးၜးကောန်ဂကူပအိုဝ် (PNLO) ဂှ် လ္တူတိဍာ်ထိၚ်ဒဝ်တံဂှ် ပရေၚ်ကယျာန်ဓဝါန်တံနွံဒၟံၚ်တုဲ ပ္ဍဲကဵုပရေၚ်ဒေါအ်ပန်ပှော်ကဆံၚ်တွဵုရး မွဲဂကောံတုဲမွဲဂကောံဂှ် ပယျဵုဒၞက်တိဍာ်တံ ပါလုပ်ဒၟံၚ်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“တိဍာ်ထိၚ်ဒဝ်ဂှ် ဣလဵုရောဟီုမ္ဂး သ္ဇက်ဂွံဒးကယျာန်ဓဝါန်ဂှ် နွံဒၟံၚ်ညိည။ လ္ၚဵုတံပၠန်ဂှ်လေဝ် ဂကောံဒေါအ်ပန်ပှော်တံဂှ် ဇၟာပ်ဒၞါဲဒေါအ်လဝ်ပန်ပှော်ဂှ် အာကၠုၚ်ဂွံဒၟံၚ်ဏောၚ် ထေၚ်လဝ်သာ်ဏံ။ ဍာံဍာံဂှ် တိဍာ်စၟတ်လဝ် ဒေါအ်ပန်ပှော်ဂှ် ၜါလ္ပာ်ပ္ညဳပ္ညပ်စၟတ်သမ္တီလဝ်နွံဒၟံၚ်ရ။ ဗွဲတၟေၚ် Bilateral မကော်ဂး ပ္ဍဲဒၞါဲထ္ပက်လဝ်စၟတ်တဲ အလဵုအသဳတွဵုရးကဵု မွဲဂကောံတုဲမွဲဂကောံတံဂှ် အရာမကၞာတ်လဝ်ပယျဵုတံ ပါဒၟံၚ်ရ။ တိဍာ်ပါလုပ်ဒၟံၚ် ပ္ဍဲကဵုလိက်ကသုက်ဏံဂှ် ညးလဵုမွဲမှ ဟွံကယျာန်ပါဲပုဟ်။ ပ္ဍဲကဵုလိက်ကသုက်ဂှ်တှ်ေ ကၠောန်အတိုၚ်ဏံဂွံဒၟံၚ်ရ။ စိုပ်အာမ္ၚးတိဍာ် ဟွံပါလုပ်ပ္ဍဲကဵုလိက်ကသုက်ဂှ်ပုဟ်မ္ဂး သ္ဇက်ဒးကယျာန်ဓဝါန်ဂှ် နွံလေပ်ရ။ ဟိုတ်ဂှ်ရ အခိၚ်ချုက်လိက်ကသုက်တေံ ဂကောံဟွံကၠောန်လဝ်တိဍာ်တံ ချိုတ်တ်ပၠိုတ်တ်ဂှ်ပုဟ်ဟီုမ္ဂး က္တဵုဒှ်ပြဒ္ဒညာလေပ်ရ” သာ်ဝွံ ညးသ္ဂးရ။

ဂကောံရပ်လွဟ်ကောန်ဍုၚ်အရၚ် မထ္ပက်လဝ်စၟတ်တဲ ပ္ဍဲလိက်ကသုက် NCA တံဂှ်ဝွံ ထ္ပက်လဝ် Bilateral မကော်ဂး မွဲဂကောံတုဲမွဲဂကောံ ထ္ပက်လဝ်လိက်ကသုက်ဒေါအ်ပန်ပှော်ၜါလ္ပာ် ကုအလဵုအသဳတွဵုရး တိဍာ်မဆေၚ်စပ်တံဂှ်ရ။

ဆ္ဂး ကြဴနူပရေၚ်ပၞာန်သီအဝဵုကလေၚ်မွဲဝါပၠန်တုဲဂှ် အကြာဂကောံရပ်လွဟ်ကောန်ဍုၚ်အရၚ် မထ္ပက်လဝ်စၟတ်တဲ ဒေါအ်ပန်ပှော်တံဂှ်ကဵု ဒပ်ပၞာန်တံဂှ် ပေါဲဗ္တိုက်တံ က္တဵုဒှ်ကၠုၚ် ဗွဲမသ္ကာတ်မြဟ်ရ။

သ္အာၚ်နူဂှ်ပၠန် ဒပ်ပၞာန်ဂှ် အလုံဍုၚ်မွဲပြးဇး ပံက်လဝ်မုက်ပၞာန် ကုဂကောံဒပ်စဵုဒၞါညးဍုၚ်ကွာန် မမံက်ဂတဝ်ကၠုၚ် ဟိုတ်နူပရေၚ်ပၞာန်သီအဝဵုတံဂှ်တုဲ ဒးဆေၚ်ဒၟံၚ်မုက် ကုပရေၚ်ဗ္တိုက်တရဴကျာ ပါလုပ်သီုကဵုပန်ပှော်လွဟ်ဇၞော်တံ၊ ပရေၚ်ပြုပြေၚ်ပရေၚ်ပၞာန်ဗလးတိတံရ။

ညးစၞးကောန်အရာပ်မွဲတၠ မပါလုပ်လဝ် ပ္ဍဲကဵုကမ္မတဳမၚ်ရံၚ်ပံၚ်တောဲ စပ်ကဵုပရေၚ်ဒေါအ်ပန်ပှော် ကဆံၚ်တွဵုရး JMC-S ဂှ် ကြဴနူဒပ်ပၞာန်သီအဝဵုတုဲ ပွမဒ္ဂေတ်ဗက် NCA နတဲဂှ် သ္ဇက်ဂွံဟီုဟွံမွဲရဂှ် သ္ဂးရ။

“လၟုဟ် ကြဴနူသၞာံ ၂၀၂၁ တုဲတေံတုဲ လ္တူလၟေၚ်ဒဒှ် ၂၀၂၁ ဂှ် နကဵုကောန်အရာပ်မွဲတၠ ပ္ဍဲအဲလေဝ် မုသွဟ်မှကဵုဟွံမာန်ပုဟ်။ မၞိဟ်မအုပ်ဓုပ်ဒၟံၚ်လၟုဟ်တံဂှ် ရပ်စပ်စကာ အတိုၚ် NCA တံဂှ် အလဵုပိုယ်တံ လဆောဝ်လဆောဝ် ဟီုဟွံဂွံဒှ်ဒၟံၚ်ရ။ လ္ပာ်ဒ္ဂေတ်ဗက်တံဂှ် သွဟ်ဂွံဟီုဂှ် ဟွံမွဲရပုဟ်” သာ်ဝွံ ညးသ္ဂးရ။

ကမ္မတဳမၚ်ရံၚ်ပံၚ်တောဲ စပ်ကဵုပရေၚ်ဒေါအ်ပန်ပှော် (JMC) ဂှ်ဝွံ သွက်ဂွံဒ္ဂေတ်ဗက် လိက်ကသုက် NCA နူကဵုအလဵုအသဳဒဳမဝ်ကရေဇြဳၜါအဆက် မထ္မံက်လဝ်တံဂှ်တုဲ ဒက်ပ္တန်လဝ် နကဵုကဆံၚ်ကၟိန်ဍုၚ်၊ ကဆံၚ်တွဵုရး၊ ကဆံၚ်ဒေသမဆေၚ်စပ်တံရ။

ဆ္ဂး ကြဴနူသၞာံ ၂၀၂၁ တေံတုဲ အတိုၚ်တၚ်တုပ်စိုတ် မၞုံပ္ဍဲ NCA ဂမၠိုၚ် ဒေါအ်ဒေၚ်အာအိုတ်တုဲ NCA လမျီုဟွံလုပ်ရပုဟ်ဟီုဂှ် ဒှ်ဓဝ်ပကတိရောၚ် ဂဥုပ်ဗိုလ်ဇၞော် သဝ်ကျဝ်ညောအ် ဟီုရ။

“စနူသၞာံ ၂၀၂၁ တုဲ အတိုၚ်တၚ်တုပ်စိုတ်ပါလုပ်ပ္ဍဲကဵု NCA တေံဂှ် ပိုယ်တံ ကိစ္စစပ်ကဵုလ္ပာ်ဒပ်ပၞာန်တံဒှ်ဒှ်၊ ကိစ္စစပ်ကဵုပေါဲသဳကၠဳပရေၚ်ဍုၚ်ကွာန်တံဒှ်ဒှ် ပိုယ်တံ ကၠောန်ဟွံမာန်လဝ်ပုဟ်။ မိက်ဂွံသ္ဂးဂှ်တှ်ေ စက်ယန္တယာ မၞုံပ္ဍဲ NCA တံသီုဖအိုတ် ညံၚ်ရဴ JMC, UPDJC, JICM တံဂှ် ဒေါအ်ဒေၚ်အာယျ။ ပေါဲသဳကၠဳပရေၚ်ဍုၚ်ကွာန်တံဂှ်လေဝ် ဒေါအ်ဒေၚ်အာယျ။ ဟီုမ္ဂး NCA လီု၊ ဟွံလီုဟီုဂှ် တန်တဴဒၟံၚ် လ္တူလညာတ်ညးတၠခန္ဓ မဆေၚ်စပ်တံဏောၚ်။ ချိုတ်ပၠိုတ်မွဲဂှ်တှ်ေ စနူသၞာံ ၂၀၂၁ တေံတုဲ ကမၠောန်မကၠောန်ဒၟံၚ် ပ္ဍဲကဵု NCA တံသီုဖအိုတ် ဒေါအ်ဒေၚ်အာရ။ NCA လမျီုဟွံလုပ်ရပုဟ်ဟီုဂှ် ဒှ်ဓဝ်ပကတိနတဲရ” သာ်ဝွံ ညးသ္ဂးရ။

ဗော်သွးကောန်ဂကူကရေၚ် မပါလုပ်ဒၟံၚ် ပ္ဍဲကဵုပၠန်ဂတးက္ညၚ်ဂှ် ဟိုတ်နူဒပ်ပၞာန်ဗၟာ လိုန်ပလီုပလာ်ထောံ သ္ဇိုၚ်မူ အခန် (၁) မပါလုပ် ပ္ဍဲကဵုလိက်ကသုက် NCA ဂှ်တုဲ လိက်ကသုက် NCA ဂှ်ဟွံမွဲရတုဲ နကဵု KNU သ္ဇက်ဂွံဒးဒ္ဂေတ်ဗက် ဟွံမွဲရပုဟ်ဂှ် လလောၚ်ပ္တိတ်လဝ်ရ။

ပ္ဍဲကဵုသ္ဇိုၚ်မူ အခန် (၁) ပါလုပ်ပ္ဍဲကဵုလိက်ကသုက် NCA ဂှ် ပြဒ္ဒညာပရေၚ်ဍုၚ်ကွာန်ဂှ် ညံၚ်ဂွိုအ်သောၚ်ကလး နကဵုပရေၚ်ပၞာန်ဂှ်ကီု၊ သွက်ဂီုကၠီုလမျီု၊ ဒြပ်ရတ်သ္ၚိဌာန် အလုံညးဍုၚ်ကွာန်မွဲ ကေုာံ ဘဝညးဍုၚ်ကွာန်တံ ဂွံသၠုၚ်တိုန် သွက်ဂွံဂ္စါန်ရေၚ်တၠုၚ်အာတံ ဒှ်တမ် တၚ် (၁၁) တၚ် ပါလုပ်ရ။

ဆ္ဂး ကြဴနူဒပ်ပၞာန်သီအဝဵုတုဲ ဂကောံရပ်လွဟ်ကောန်ဍုၚ်အရၚ် မပါလုပ်ဒၟံၚ် ပ္ဍဲကဵုပၠန်ဂတးက္ညၚ်တံဂှ် ဟွံဒုၚ်တဲ လိက်ကသုက် NCA တံရကီုလေဝ် EAO မသဳကၠဳဒၟံၚ် ပရေၚ်ၜိုဟ်လလမ် ကုကံၚ်ဇြဳပၞာန်တံဂှ် ဆက်ဒုၚ်လဝ်တဲ လိက်ကသုက် NCA ဂှ်ဖိုဟ်ရ။

မွဲလ္ပာ်ပၠန်ဂှ် ကမ္မတဳပ္ညဳပ္ညပ် ထ္မံက်ရုပ်ရဴပရေၚ်ၜိုဟ်လလမ် ကေုာံ ပရေၚ်ညဳသၟဟ်ဂကူ ကံၚ်ဇြဳပၞာန် (NSPNC) နူကဵုဒုသ္ကိုပ်ဗိုလ်ဇၞော် ယျာပျေအ် မသ္ကိုပ်သ္ကဂှ် နကဵုဂကောံရပ်လွဟ်ကောန်ဍုၚ်အရၚ် မထ္ပက်လဝ်စၟတ်တဲ ပ္ဍဲကဵုလိက်ကသုက် NCA တံဂှ် သွက်ဂွံဒ္ဂေတ်ဗက် အတိုၚ်တၚ်နၚ် မပါလုပ် ပ္ဍဲကဵုလိက်ကသုက်တံအိုတ်ဂှ် လေပ်ကဵုသတိ ပလံၚ်ဗစိုပ်လိက် မွဲဏှမွဲဏှဂှ် နွံဒၟံၚ်ရ။

ပရိုၚ်−သြၚ်လောန်တိုၚ်(မ်)ဗီု−Bud-4