ၚုဟ်ထဝ်၊ ၚုဟ်ဒဝ်ဠာ ကေုာံ ၚုဟ်သြန်ၝာတ်သေံတံ ထ္ပက်တိုန်ကၠုၚ်မွဲအသိၚ်တုဲ ပရေၚ်သွံရာန်ကြပ်သီုဖအိုတ် ဒးဒေါအ်ဒေၚ်လဝ်

မတ်မလီု၊ အဝ်ဂါတ် (၁၇)

ၚုဟ်ထဝ်၊ ၚုဟ်ဒဝ်ဠာ ကေုာံ ၚုဟ်သြန်ၝာတ် အပ္ဍဲဍုၚ်တံဝွံ ပ္ဍဲဂိတုအဝ်ဂါတ် (၁၆) ဂှ် ထ္ပက်တိုန်ကၠုၚ်မွဲအသိၚ်တုဲဂှ် ပရေၚ်သွံရာန်အပ္ဍဲဗွဝ်ဖျာကြပ်သီုဖအိုတ် ဒေါအ်ဒေၚ်အာယျဂှ် တၠကမၠောန်ထဝ်တံကဵု ညးကၠောန်ကလောန်လှာဲလှုဲတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ပ္ဍဲဂိတုအဝ်ဂါတ်မံက်တေံ ၚုဟ်သြန်ဒဝ်ဠာ နွံကၠုၚ်လဝ် မွဲဒဝ်ဠာ ၃၁၀၀ ဒ္ကေဝ်ဓဝ်ဂှ်ဝွံ ၚုဟ်ထ္ပက်တိုန်ကၠုၚ် စဵုကဵု ၃၇၀၀ ဒ္ကေဝ်ပြၚ်တုဲ ၚုဟ်သြန်ၝာတ်ဂှ်လေဝ် မွဲၝာတ်ဂှ် ၚုဟ်သၠာ်တိုန်ကၠုၚ် စဵုကဵု (၁၀၀) ဒ္ကေဝ်ပြၚ်ရ။

သ္အာၚ်နူဂှ်ပၠန် ထဝ်ဒကောၚ်မဳဠေန် ၚုဟ်သၠုၚ်ဒၟံၚ်ဂှ်လေဝ် မွဲဒ္ကေဝ် နူကဵု ၃၅ ကိုဋ်ဒ္ကေဝ်ဂှ် ၚုဟ်ထပ်သၠုၚ်တိုန်ကၠုၚ် စဵုကဵု ၃၈ ကိုဋ်ပြၚ်တုဲ ဒးဒေါအ်ဇူလဝ် ပရေၚ်သွံရာန်ရ။

ၚုဟ်ထဝ်အပ္ဍဲဍုၚ်၊ ၚုဟ်ဒဝ်ဠာ ကေုာံ ၚုဟ်သြန်ၝာတ်တံဂှ်ဝွံ ဒၟါနူသြန်တၞးကံၚ်ဇြဳပၞာန် တၞး ၂၀၀၀၀ ဒ္ကေဝ်ဂှ်ကီု၊ သီုကဵုပရေၚ်သွံရာန်ဗၞိက်ဍုၚ်ဗၟာ ဒေါအ်ဒေၚ်အာတံကီု၊ ဟိုတ်နူဝေၚ်ၚုဟ် အပ္ဍဲကဵုဗွဝ်ဖျာတံကီုဂှ်တုဲ ၚုဟ်သၠုၚ်တိုန်ဒၟံၚ် ဂၠိုၚ်ကဵုဆရ။

တၠကမၠောန်ထဝ်မွဲတၠဂှ် ၚုဟ်ထဝ်အပ္ဍဲဍုၚ်ဝွံ အဖဝ်ၚုဟ်ဒဝ်ဠာသၠုၚ်တိုန်ကၠုၚ်ဂှ် နူကဵုလ္ပာ်ကံၚ်ဇြဳပၞာန်တံ သောၚ်ကလးရေၚ်တၠုၚ်ကဵုမာန်ဟွံမွဲဂှ်ရ ၚုဟ်သၠုၚ်တိုန်ကၠုၚ် ဂၠိုၚ်ကဵုဆရဂှ် ဟီုတဴရ။

“ၚုဟ်ဒဝ်ဠာဂှ် နူဏေံတေံ ၚုဟ်မ္ၚးဂှ် (၃၆၈၀) ၊ ၚုဟ်ထဝ်ဂၠးတိဂှ် စှ်ေဒၟံၚ်ကီုလေဝ် နကဵုၚုဟ်ဏံမ္ဂး ၚုဟ်ထဝ်ဍုၚ်ဗမာဂှ် (၃၇) ကိုဋ်ပြၚ်အာယျလေဝ်။ ယဝ်ရတော်ကဵုၚုဟ်ဒဝ်ဠာဏံမ္ဂး ဒှ်အာ (၃၇) (၃၈) ယျဏောၚ်။ ဟိုတ်ဂှ်ရ ပရေၚ်သွံရာန်တံဂှ် ကၟာတ်အိုတ်ရ။ ပြဟ်ဟ်ဏံ ဖေက်ဒှ်ဒၟံၚ်အကာဲအရာ အန္တရာယ်နွံမာန်တံဂှ်တုဲ ဗွဲမဂၠိုၚ်ဂှ် ဟွံမိက်ဟီု ၚုဟ်ထဝ်အိုတ်ရပုဟ်။ မၞိဟ်သွံတံဂှ်လေဝ် ဟွံရာန်ရပုဟ်ဂးတုဲ ဟီုဂးကၠုၚ်အိုတ်ရ။ သွံကီု ရာန်ကီုဂှ် ဟွံဂံၚ်ကၠောန်အိုတ်ရပုဟ်။ ချိုန်ခဏဓဝ် ဍေံတံဂြဲဖျေံမ္ဂး ၚုဟ်စှ်ေအာမာန်ဒၟံၚ်ဏောၚ်။ ဖျေံဟွံမာန်ပုဟ်ဟီုမ္ဂးလေဝ် ဆက်တိုန်ဏောၚ်မ္ဂးလေဝ် စိုပ်အာၚုဟ်သၠုၚ်ၚ်တံမာန်ရ။ မၞိဟ်တံဂှ် ဖေက်တုဲ ဆေၚ်ဖျာတံဂှ် ကၟာတ်သွံရာန်တုဲ ဟွံဂံၚ်ကၠောန်အိုတ်ရပုဟ်။ ၚုဟ်ဒဝ်ဠာဂှ် နကဵုအသိၚ်အလိုန် သြန်တၞး (၂) ဠက်ဂှ်တုဲဂှ် ထ္ပက်တိုန်အာဟဂှ်ရ။ ၚုဟ်ဒဝ်ဠာထ္ပက်တိုန်အာတုဲ ထိၚ်ဟွံမာန်ဒှ်ဒၟံၚ်ဂှ် အဓိကဂှ်တှ်ေ ဒှ်ဒၟံၚ်ဗီုဏံရ “ သာ်ဝွံ သ္ဂးရ။

ဟိုတ်နူၚုဟ်ထဝ်သၠုၚ်တိုန်ကၠုၚ် ဂၠိုၚ်ကဵုဆဂှ်တုဲ ဆေၚ်ထဝ်ဗွဲမဂၠိုၚ် ကၟာတ်လဝ်ပရေၚ်သွံရာန်တံဂှ်တုဲ ထဝ်ဒကောၚ်မဳဠေန် မွဲဒ္ကေဝ်ဂှ် စဵုကဵု ၂ ကိုဋ်ဒ္ကေဝ်ပြၚ် ခြာတုဲ ရာန်ကေတ်ဒၟံၚ်တံ နွံဒၟံၚ်ညိညဂှ် ညးဆက်ဟီုရ။

မွဲလ္ပာ်ပၠန်ဂှ် ဟိုတ်နူသြန်ၝာတ်သေံ သၠုၚ်တိုန်ဒၟံၚ် ဂၠိုၚ်ကဵုဆဂှ်ရ တိုက်သြန်ဗဟဵု ကံၚ်ဇြဳပၞာန်ဂှ် ပ္ဍဲဂိတုအဝ်ဂါတ် ၁၄ တေံ စၟတ်ထောံလဝ် သြန်ၝာတ်သေံ နဒဒှ်သြန်ရပ်စပ်ဍုၚ်သ္အာၚ် ကေုာံ သြန်ရပ်စပ် ပ္ဍဲအရာသောၚ်ကလးစရၚ်တံရ။

ဆ္ဂး ၚုဟ်သြန်ၝာတ်ဝွံ မွဲကိုဋ်ဒ္ကေဝ်ဂှ် ဟိုတ်နူၚုဟ်မၞုံကၠုၚ် စဵုကဵု ၉၇၀ ဒ္ကေဝ်ဂှ်ရ ရဲသၠာဲဂတးလှုဲဗွဲမဂၠိုၚ် ဒေါအ်ဇူလဝ်တုဲ မၞိဟ်လှာဲဂတးလှုဲတံ ဒးဂဗဒၟံၚ်အခက်အိုတ်ရ။

ပ္ဍဲဂိတုဂျူလာၚ် ၅ တုဲကၠုၚ်တေံဂှ်လေဝ် ကံၚ်ဇြဳပၞာန်ဝွံ ဒက်ပ္တန်လဝ် ကမ္မတဳကောပ်ကာဲရပ်စပ်သြန်ဍုၚ်သ္အာၚ် နူကဵုသ္ကိုပ်ဗိုလ်ပၞာန်ဂမၠိုၚ် မသ္ကိုပ်သ္ကဂှ်တုဲ ကၠောန်ဒၟံၚ်ကီုလေဝ် ဒဵုကဵုအခိၚ်လၟုဟ် ဒဒှ်မသြန်ဍုၚ်သ္အာၚ်သၠုၚ်တိုန်ဒၟံၚ်ဂှ် ထိၚ်ဒက်ဟွံမာန်ဏီရ။

ညးစိုန်သ္ကီုပ္ဍဲအရာသြန်လှုဲတံဂှ် လ္ပာ်ကံၚ်ဇြဳပၞာန်တံ ယဝ်ရသောၚ်ကလးကၠုၚ် ပြသၞာ သြန်ဍုၚ်သ္အာၚ်ဇၞော်သၠုၚ် မက္တဵုဒှ်ဒၟံၚ်လၟုဟ်ဏံ ဟွံမာန်မ္ဂး ပရေၚ်ပိုန်ဒြပ်ဍုၚ်ဗၟာ ထပ်စိုပ်အာ အကာဲအရာပရေံအိုတ်မွဲမာန်ရောၚ်ဂှ် သ္ၚဳဂၠိပ်ဒၟံၚ်တံ နွံဒၟံၚ်ရ။

ပရိုၚ်−သြၚ်လောန်တိုၚ်(မ်)

ဗီု−Social Media