တၞၚ်သဳ၊ အဝ်ဂါတ် (၁၇)
ဒၞါဲဝန်ဇၞော်ဂီုကၠီုပယျဵု သ္ကိုပ်ဗိုလ်ဇၞော် တုၚ်လေန် မဒှ်ကောန်ဂကောံအလဵုအသဳကံၚ်ဇြဳပၞာန် ရးဒေသဇၞော်တၞၚ်သဳ မဒးဒုၚ်ရပ်စၟဳတ်ဒၟံၚ် နကဵုတၚ်စောဲစပ် ဗက်စအဂတိဂှ်တုဲ ထ္ပက်စုတ်အဇာ ခါန်ကၞက်လဝ် မွဲတၠပၠန်ဂှ် ကံၚ်ဇြဳပၞာန် လလောၚ်ပ္တိတ်လဝ်ရ။
လ္ဂောံကဵုသၞောဝ်သ္ဇိုၚ်ဒက်ပ္တန် ၝောံပိုဒ် ၄၁၉ ဂှ်တုဲ ဒၞါဲဝန်ဇၞော်ဂီုကၠီုပယျဵု သ္ကိုပ်ဗိုလ်ဇၞော်တုၚ်လေန်ဂှ် ထ္ပက်အဇာခါန်ကၞက်လဝ် သ္ကိုပ်ဗိုလ်ဇၞော်မေန်န်လာတ် မဒှ်သၞာဲဒဴထ္ၜးနဲကဲ နူကဵုတက္ကသိုလ်ပၞာန်ဂှ်ရောၚ် သ္ဂးရ။
သ္ကိုပ်ဗိုလ်ဇၞော် မေန်န်လာတ် မဒးဒုၚ်ခါန်ကၞက်လဝ် နဒဒှ်ဝန်ဇၞော်ဂီုကၠီုပယျဵုဂှ်ဝွံ ယိုက်ဂၠေၚ်ဒၟံၚ်တာလျိုၚ် နူကဵုဂိတုတုဲကၠုၚ်တေံတုဲ လိက်ခါန်ကၞက်ဂှ် လၟုဟ်မှဂွံလလောၚ်ပ္တိတ်ဂှ် ညးမစုက်လုက်ကဵု ဂကောံအလဵုအသဳရးတၞၚ်သဳ ကံၚ်ဇြဳပၞာန်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဒုသ္ကိုပ်ရး ဌာန်ဂအုပ်ပၞာန်ရးပရၚ်ၜဳ ဂအုပ်ဗဵုဇၞော် တေတ်လွေန်ထူ၊ ဌာန်ဂအုပ်ကောပ်ကာဲပရေၚ်ပၞာန် စၟတ် (၂၀) သ္ကိုပ်ၝောံဒပ် ဂအုပ်ဗဵုဇၞော် ဝေန်ကျဝ် ကေုာံ ဝန်ဇၞော်ဂီုကၠီုပယျဵုတြေံ သ္ကိုပ်ဗိုလ်ဇၞော် တုၚ်လေန်တံဂှ် ပ္ဍဲဂိတုဂျူလာၚ် ၂၆ တုဲကၠုၚ်တေံ ဂကောံဒပ်ဗွဲတၟေၚ်ကံၚ်ဇြဳပၞာန် နူကဵုနေဗျဳဒဝ်တေံ ကၠုၚ်စိုပ်ရပ်ဒက်ဏာလဝ်ရ။
ပိုန်ဒြပ်အရပ်ရာ ဝန်ဇၞော်ဂီုကၠီုပယျဵုတြေံ သ္ကိုပ်ဝန်ဇၞော် တုၚ်လေန် မဒးဒုၚ်စၟဳတ်ဒၟံၚ် နကဵုဂဗုတ်ဗက်စအဂတိဂှ် ကံၚ်ဇြဳပၞာန် ကၟာတ်လဒဵုလဝ်တုဲ ဆက်စပ်ဒၟံၚ်ကဵု ပရေၚ်ကဵုကေတ်လာပ်ဗဇဴတံရောၚ်ဂးတုဲ တၠကမၠောန်နူကဵုဗိက် ကေုာံ ကအ်သံၚ် ဟွံအောန်နူကဵု (၁၀) တၠ ဒးဒုၚ်ကော်စၟဳတ်ဒၟံၚ်ရောၚ် ဂွံတီကေတ်ရ။
သ္အာၚ်နူဂှ်ပၠန် ဒၞါဲဒုသ္ကိုပ်ရး မဒးဒုၚ်ရပ်စၟဳတ်ဒၟံၚ်ဂှ် ပြံၚ်လှာဲခါန်ကၞက်လဝ် ဂအုပ်ဗိုလ်ဇၞော် အံၚ်မျဵုထောန် နူကဵုဌာန်ဂအုပ်ဗျူဟာပၞာန်၊ ဒၞါဲသ္ကိုပ်စကခ စၟတ် ၂၀ ဂှ် ပြံၚ်လှာဲခါန်ကၞက်လဝ် ဂအုပ်ဗိုလ်ဇၞော် ဇြေယျာလေန် နူကဵုဌာန်ဂအုပ်ပၞာန်ရးဗၟံက်သၟဝ်ကျာတံဂှ် ဂွံတီကေတ် ဇရေၚ်ညးမစုက်လုက်ကဵု ကံၚ်ဇြဳပၞာန်တံရ။
ပရိုၚ်−သြၚ်လောန်တိုၚ်(မ်)
ဗီု−Social Media
sanlontai