ပ္ဍဲကဵုပေါဲဗ္တိုက်ဖရူသဵုဂှ် ဒပ်ကံၚ်ဇြဳပၞာန် ဒးဂိတုဲ ကလေၚ်ဆုတ်အာဒပ်

ဖရူသဵု၊ အဝ်ဂါတ် (၁၇)

ဒပ်ကံၚ်ဇြဳပၞာန် မထ္ပက်ကၠုၚ်ကရောၚ်ပၞာန် ဍုၚ်ဖရူသဵု၊ တွဵုရးကရေၚ်ဍာဲဂှ် ပရေၚ်ဇီုကပိုက်ပြဟ်လလုဲတံ ဂၠိုၚ်ဒၟံၚ်တုဲ ကလေၚ်ဆုတ်အာဒပ်ဂှ် ဒပ်စဵုဒၞါကောန်ဂကူကရေၚ်ဍာဲ KNDF ဟီုရ။

တုဲကၠုၚ် ပ္ဍဲဂိတုဂျူလာၚ် ၁၂ တုဲကၠုၚ်တေံတုဲ ဒပ်ကံၚ်ဇြဳပၞာန်ဝွံ နူကဵုဒဳမအ်သဵု ဟိုတ်နူလုပ်စိုပ်ထ္ပက်ကၠုၚ်ကရောၚ်ပၞာန် လ္ပာ်ဖရူသဵုဂှ်ရ ပ္ဍဲဗ္ဒါဲကွာန်ထဳဒဝ်ကူဂှ် က္တဵုဒှ်လဝ်ပေါဲဗ္တိုက် ကုဂကောံဇြဟတ်ပၠန်ဂတးတံရ။

ပေါဲဗ္တိုက်တံဏံဝွံ စဵုကဵုဂိတုအဝ်ဂါတ် ၁၅ ကြဴနူၜါလ္ပာ်ပေါဲဗ္တိုက်သ္ကာတ်မြဟ်တုဲဂှ် ဒပ်ကံၚ်ဇြဳပၞာန်ဝွံ နူကဵုကွာန်ထဳဒဝ်ကူ ကလေၚ်ဆုတ်အာဒပ် လ္ပာ်ကွာန်ကဒါလာဂှ်တုဲ ကလေၚ်ဗပေၚ်ဒၟံၚ်ဇြဟတ်ဂှ် နူကဵုကောန်သ္ဂံၚ် KNDF မွဲတၠ ဟီုလဝ်ကဵု ဌာန်ပရိုၚ်သြၚ်လောန်တိုၚ်(မ်) ရ။

အပ္ဍဲပေါဲဗ္တိုက်ၜါလ္ပာ်တံဂှ် ကရောၚ်ပၞာန်ပံၚ်တောဲ နူကဵုဌာန်ဂအုပ်ၝောံဒပ် ဒပ်တိုက် စၟတ် (၅၅) ဂှ် သ္ကိုပ်တမ်ဒပ် မွဲတၠ၊ ဗိုလ်ဇၞော်မွဲတၠ သၞာဲဒဴနူကဵုကဆံၚ်တၞဟ်ဟ်တံလေဝ် ဗွဲမဂၠိုၚ်ဂၠေၚ် ချိုတ်အာလဝ်နွံဒၟံၚ်ကီုလေဝ် လၟိဟ်ချိုတ်တ်ပၠိုတ်တ်ဂှ် ဆက်ဂၠိုက်ဂၠါဲဒၟံၚ်ဖိုဟ်ရောၚ် သ္ဂးရ။

နူကဵုဒပ်ကံၚ်ဇြဳပၞာန် မထ္ပက်ကၠုၚ်ကရောၚ်ပၞာန် ပ္ဍဲဖရူသဵုဂှ် မ္ၚးနူလွဟ်ဇၞော်၊ လွဟ်ဍောတ်တံဂှ် သီဂိုၚ်ဂွံလဝ် မကမ်ဗွဲမဂၠိုၚ်ဂၠေၚ်ရောၚ် ဂွံတီကေတ် နူကဵုဒပ်စဵုဒၞါကောန်ဂကူကရေၚ်ဍာဲ KNDF ရ။

ပ္ဍဲကဵုထလဳဂရာမ်ချာန်နေဝ် ကံၚ်ဇြဳပၞာန် တြးဝါဒတံဂှ်လေဝ် အပ္ဍဲပေါဲဗ္တိုက်ဖရူသဵုဂှ် သၞာဲဒဴနူကဵုဒပ်ပၞာန်လ္ၚဵုတံလေဝ် ချိုတ်အာလဝ်ဂှ် ထ္မံက်ထ္ၜးလဝ်တံ နွံဒၟံၚ်ရ။

အခိၚ်လၟုဟ်ဂှ် ဒပ်ကံၚ်ဇြဳပၞာန် မဒးဂိလဝ်ဂှ်ဝွံ အပ္ဍဲကွာန်ဂှ် ပစူလဝ်မာၚ်တိုပ်တိတံဂှ်တုဲ ပွဳပွူဗ္ဒါဲဂှ်တံဂှ်လေဝ် ဗက်ဗ္တိုက်ဒၟံၚ် နကဵုတရဴကျာဂှ် ဂွံတီကေတ်ရ။

ကံၚ်ဇြဳပၞာန် ဂ္စါန်ထိၚ်ဒက်ဒၟံၚ် သ္ကုတ်ဂၠံၚ် ဒဳမအ်သဵု−ဖရူသဵုဂှ်ဝွံ သွက်ဂွံကလေၚ်သီ ကုန်ဗ္ဒိုပ်မေဝ်သေအ် နူကဵုပယျဵုသေံ−ကရေၚ်ဍာဲ မဒးဆောံလေၚ်လဝ်ဂှ်ရောၚ်ဂှ် ညးသ္ၚဳဂၠိပ်ဒၟံၚ်တံလေဝ် နွံဒၟံၚ်ရ။

ကြဴနူဒပ်ပၞာန်သီအဝဵုတုဲ ပ္ဍဲကဵုပၞာန်ဒစဵုဒစးရပ်လွဟ် တွဵုရးကရေၚ်ဍာဲ ဇြဟတ်ခိုဟ်ဒၟံၚ်ဂှ် ဒပ်ကံၚ်ဇြဳပၞာန်ဝွံ ပန်ပှော်ဗ္တိုက်ဒၟံၚ်လွဟ်ဇၞော် နကဵုတရဴကျာကီု၊ ပွမဝးပ္ကဝ်အခေါၚ်အရာမၞိဟ်တံကီု စံၚ်ပလီုပလာ်သ္ၚိဒၟံၚ်ညးဍုၚ်ကွာန်တံဂှ် ကၠောန်ဒၟံၚ်ရ။

ပရိုၚ်−သြၚ်လောန်တိုၚ်(မ်)

ဗီု−KNDF