ကွဳစက်အချုက်တိတ်ကၠုၚ် နူထံၚ်မုမ်ယွာ ဒးဒုၚ်ဗတိုက်၊ ချိုတ်လဝ်ၜါတၠ

မုမ်ယွာ – အဝ်ဂေတ်(၁၈)

ရးဒေသသေတ်ဂါၚ်၊ ကွဳစက်အချုက် နူထံၚ်စာတ်မုမ်ယွာ အာဒၟံၚ်ထံၚ်စာတ်အၚ်ဝဂှ် ဟိုတ်နူဒးဒုၚ်ဖံက်ခတိုဟ်လဝ်မာၚ်တုဲ ကောန်ထံၚ်ပရေၚ်ဍုၚ်ကွာန်ၜါတၠ ဒးချိုတ်လဝ်ရဂှ် ဒပ်ကံၚ်ဇြဳပၞာန် ကဵုနၚ်ပရိုၚ် ကုဂကောံသ္ၚိကၟိန်ညးတအ်ရ။

ပ္ဍဲဂိတုအဝ်ဂေတ် စၟတ်တ္ၚဲ (၁၅)တုဲကၠုၚ်တေံ ကောန်ထံၚ်ပရေၚ်ဍုၚ်ကွာန် ကၠံပြၚ် ပါလုပ်သီုကိုဝ်ဝေမိုဝ်နိုၚ် ညးလုပ်ဂကောံကဝ်မတဳက္ဍိုက်က္ဍိုပ်ဗကပ်ဗဗေၚ်မုမ်ယွာဂှ် နူကဵုမုမ်ယွာ အဃောပဆုဲပြံၚ်နၚ် ပ္ဍဲထံၚ်မျေန်ချာန်ဂှ် ဒးဒုၚ်ဖံက်ခတိုဟ်လဝ်မာၚ်တုဲ ကောန်ထံၚ်ၜါတၠ ဒးချိုတ်လဝ်ရ။

“နူတနေံတေံ ပလံၚ်ကဵုလဝ်ဂကောံသ္ၚိကၟိန်ညးတအ် ဗီုရုပ်တုဲ ကဵုကၠုၚ်ပရိုၚ်ရ။ ပ္ဍဲဗီုရုပ်ဂှ် ခါတ်လဝ်ဇုက်ဇရေဟ်ရ။ ဒးဒုၚ်ဖံက်ခတိုဟ်လဝ်မာၚ် ဒၞာဲလဵုရောဂှ်လေဝ် ဟွံတီ ချိုတ်တ်ပၠိုတ်တ်ဏီပုဟ်။ စပ်ကဵုပြဝဏံတုဲ နကဵု Myanmar SCM – Magway Region ဟီုပျုက်ဗ္ဒေက်ရ။ ဣဏံဂှ် လ္ပာ်ကံၚ်ဇြဳပၞာန်ရ ကၠောန်လဝ်ဏောၚ် ပတှ်ေကေတ်လဝ်ရ”ဂှ် က္ဍိုပ်သ္ကိုပ်ကွးဘာ Myanmar SCM – Magway တြေံ ကိုဝ်နေမန် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။

ဟိုတ်နူဒးဒုၚ်ဖံက်ခတိုဟ်လဝ်မာၚ်တုဲ ပ္ဍဲကဵုညးဒးပြဟ်လလုဲလဝ်တအ်ဂှ် ဒှ်ကွးဘာတက္ကသိုလ်ဂဥုဲမဂွေတြေံ က္ဍိုပ်သ္ကိုပ်ပရေၚ်ချဳဒရာၚ် ကွးဘာခရေတ်ယာန် (SCM) ဒံက်တာဇြဝ်ထွေအောၚ်ကဵု ကိုဝ်အာကာညုၚ်ချာန် နူဍုၚ်ဗုတလေန်တအ်ရဂှ် ဂွံတီကေတ်လဝ်ရ။

ဇွကောန်ထံၚ်ပရေၚ်ဍုၚ်ကွာန် ဒးပြဟ်လလုဲအာလဝ်တအ်ဂှ် ဟွံဂွံကလေၚ်ပ္အပ်ကဵု ဂကောံသ္ၚိကၟိန်အိန်ထံၚ်ညးတအ်တုဲ စံၚ်ဂြးလဝ် နအစဳဇန်ကံၚ်ဇြဳပၞာန်ရဂှ် ဂွံတီကေတ်တုဲ ဆၜိုတ်ဗီုရုပ်ဟေၚ် အပ်လဝ်ကဵုဂကောံသ္ၚိကၟိန်အိန်ထံၚ်ညးတအ်ရ။

ပရေၚ်ဗတိုက်ပန်ဏံ နူဂကောံလဵု ကၠောန်လဝ်ရောဂှ် စဵုကဵုအခိၚ်လၟုဟ် ဟွံဂွံတီကေတ်လဝ်ဏီတုဲ ကောန်ဒပ်ကံၚ်ဇြဳပၞာန် ပြံၚ်ထံၚ် ဗက်ကၠုၚ်လဝ် (၄)တၠလေဝ် ဒးချိုတ်လဝ်တုဲ ကောန်ထံၚ်ပရေၚ်ဍုၚ်ကွာန်တအ်လေဝ် ဇီုကပိုက်ဒးလဝ်ဘဲဝပ် နွံဒၟံၚ်ရဂှ် ဂွံတီကေတ်ရ။

အခိၚ်လၟုဟ်ဏံမ္ဂး ကံၚ်ဇြဳပၞာန် ကော်ပ္တိတ်ကောန်ထံၚ်ပရေၚ်ဍုၚ်ကွာန် ရပ်လဝ် ပ္ဍဲထံၚ်စာတ်၊ အချုက်ထံၚ် မၞုံအလုံမွဲဍုၚ် မ္ၚးထံၚ် နကဵုတၚ်ထ္ၜးဟိုတ် ပဆုဲပြံၚ်ထံၚ်စာတ်တုဲ ပြိုက်ဂစိုတ်ဒၟံၚ် ဟွံအောန်နူ (၂၀)တၠ နွံကၠုၚ်ဒၟံၚ်ရ။

ပရိုၚ် – သြၚ်လောန်တိုၚ်(မ်)

ဗီုရုပ် -(ဗီုတြေံ)